རྒྱལ་དང་རྒྱལ་སྲས་ཀུན་གྱིས་བསྔགས་པའི་ལམ།།

མུ་མེད་འགྲོ་བ་སྒྲོལ་བའི་ཁུར་བཞེས་ཏེ།།

གང་འདུལ་བཤེས་གཉེན་དམ་པའི་ཚུལ་འཆང་བ།།

དགེ་ལེགས་མཚན་ཅན་སྙིང་གི་མུན་སེལ་རྒྱལ།།

མདོ་ཁམས་མི་ཉག་གྷ་ཞེས་འཛིན་མའི་སྤོར།།

ཁྱེད་སྐུ་རྟགས་དང་རྟེན་འབྲེལ་བསུ་མ་བཅས།།

མཚན་དཔེ་གསར་དུ་བཞད་པའི་ངོ་མཚར་འབུམ།།

སྐྱེ་དགུའི་བསོད་ནམས་དཔལ་གྱི་བླ་ན་བརྗིད།།

དཀའ་ཐུབ་བཙན་པོས་ཐོས་བསམ་སྦྱངས་པ་ལས།།

ཆོས་དང་ཆོས་མིན་འབྱེད་པའི་རྣམ་དཔྱོད་ཀྱིས།།

སྐལ་ལྡན་སྐྱེས་བུའི་བླང་དོར་འཇུག་ངོགས་ལ།།

གདམས་ངག་དབུགས་དབྱུང་བྱེ་བས་དགའ་སྟོན་བསྐྲུན།།

ལྡོག་མེད་བརྩེ་བ་ཆེན་པོའི་ཉེར་ལེན་གྱིས།།

དབྱངས་གསལ་སོ་བཞི་བསྟར་ལ་བརྒྱུས་པ་ཡི།།

དྲན་དབང་དགྱེས་པའི་ལེགས་བཤད་མུ་ཏིག་ཕྲེང་།།

བློ་གསལ་མགྲིན་པ་མཛེས་པའི་རྒྱན་དུ་འཆང་།།

སྐད་དང་ཡི་གེ་ཁ་བའི་བླ་སྲོག་ཉིད།།

ཆོ་འཕྲུལ་བདུད་དུ་རློམ་པའི་འཕྲང་ལམ་ལས།།

མྱུར་སྐྱོབ་སྤེལ་མཛད་འཕྲིན་ལས་རླབས་པོ་ཆེ།།

ཁྱེད་ཀྱི་ལེགས་བྱས་མཛད་པའི་རྒྱན་དུ་ཆེ།།།

ཕན་དང་བདེ་བ་མ་ལུས་གཅིག་འདུས་པའི།།

འདོད་རྒུ་ལེགས་ཚོགས་འབྱུང་བའི་སྒོ་གཅིག་པུ།།

གང་སྐུ་བཤེས་གཉེན་དཔག་བསམ་དབང་པོ་སྟེ།།

མ་ནོར་ལམ་བཟང་སྟོན་པའི་འགྲོ་བའི་མགོན།།

གང་གིས་ཐུགས་བརྩེ་ཆེན་པོས་ཉེར་བཟུང་སྟེ།།

གདམས་ངག་བདུད་རྩིའི་གྲུ་ཆར་འབེབས་མཛད་པས།།

དམུ་རྒོད་སེམས་འདི་དགེ་བའི་ལམ་ཕྱོགས་ལ།།

ཅུང་ཟད་གཞོལ་འདི་བསོད་ནམས་མངོན་པར་མཐོ།།

སྙན་པའི་ངག་ཅེས་སྙན་ཆ་མི་ལྡན་ཡང་།།

བསམ་དང་སྦྱོར་བ་གཙང་མས་ལྷུར་བླངས་ཏེ།།

སྤོས་ཀྱི་དྲི་ངད་ལྡང་བའི་གྲོང་ཁྱེར་ནས།།

དད་གསུམ་སྙིམ་པའི་མེ་ཏོག་འདི་གསོལ་ལོ།།