བསིལ་འཇམ་རླུང་བུ་ཁྱེད་ཀྱི་ན་བཟའ་རེད།།

གཡུ་ལྗོངས་སྡེ་བ་ང་ཡི་སྡོད་གནས་རེད།།

གཡང་དཀར་ནོར་ལུག་འུ་གཉིས་འཚོ་རྟེན་རེད།།

ཁྱོད་དང་འུ་གཉིས་ལས་དབང་གཅིག་པ་རེད།།

སྤང་ཐང་མེ་ཏོག་ཁྱེད་ཀྱི་རྒྱན་ཆ་རེད།།

དྭངས་གཙང་ཆུ་བོ་ང་ཡི་སྐོམ་ཆུ་རེད།།

འབྲུ་རིགས་སྣ་ལྔ་འུ་གཉིས་གསོ་སྨན་རེད།།

ཁྱོད་དང་འུ་གཉིས་ལས་དབང་གཅིག་པ་རེད།།

གླིང་དཀར་འབྲུག་མོ་ཁྱེད་ཀྱི་ཨ་ཅེ་རེད།།

གེ་སར་རྒྱལ་པོ་བདག་གི་ཕུ་བོ་རེད།།

དགེ་བཅུའི་ལུགས་སྲོལ་འུ་གཉིས་བགྲོད་ལམ་རེད།།

ཁྱོད་དང་འུ་གཉིས་ལས་དབང་གཅིག་པ་རེད།།

རིག་པའི་གནས་ལྔ་ཁྱོད་ཀྱི་སྦྱང་བྱ་རེད།།

བྱམས་བརྩེའི་ཟེགས་མ་བདག་གི་སློབ་གླིང་རེད།།

ཕ་མའི་དྲིན་ལན་འུ་གཉིས་འཇལ་དབང་རེད།།

ཁྱོད་དང་འུ་གཉིས་ལས་དབང་གཅིག་པ་རེད།།