ངས་རང་ཉིད་གླུ་རུ་ལེན་ན་འདོད།

སྒྱུ་འཕྲུལ་གྱིས་བཞེངས་བའི་རི་ངོགས་འདི་ནས།

སྲིད་པའི་ཕུན་ཚོགས་ཀྱི་རི་རྒྱབ་ཡང་ཡང་བརྒལ་ནས།

ཚེ་སྲོག་གསར་བ་ཞིག་གི་དབུ་ཁྱུད་དང་དབྱངས་རྟའི་

ཁྲོད་ནས།

ངས་སྐད་གསང་མཐོན་པོའི་སྒོ་ནས་རང་ཉིད་གླུ་རུ་ལེན་

ན་འདོད།

ངས་རང་ཉིད་གླུ་རུ་ལེན་ན་འདོད།

གཉུག་གཤིས་ཀྱི་ངོ་བོར་ཁ་བའི་རེ་ཁཱ་བྲིས་ནས།

མཐའ་མི་མངོན་ཞིང་གཏིང་ཟབ་པའི་འཇིག་རྟེན་འདི་ནས།

སྐད་གདངས་ཀྱི་འགྱུར་བ་སྣ་ཚོགས་སྲིད་པའི་རྒྱན་དུ་

བཞག་ནས།

རང་གཤིས་ཀྱི་ཤོག་དཀར་འདི་དག་མཁའ་དབྱིངས་སུ་

བསྐུར་ན་འདོད།

ངས་རང་ཉིད་གླུ་རུ་ལེན་ན་འདོད།

དགའ་སྐྱོ་ཆགས་སྡང་གིས་གྲུབ་པའི་འཇིག་རྟེན་འདི་ནས།

ཚོར་ཤེས་ཀྱི་བྱེའུ་ཆུང་འདི་དག་དབྱིངས་སུ་འཕུར་

ཐེངས་ཤིག་གིས།

མཛེས་དཔྱོད་ཀྱི་ལྟ་བའི་ངོ་བོ་རྨ་ཆུ་དང་འབྲི་ཆུ་བཞིན་

གང་སར་བཞུར།

ངག་གི་སྒྲིབ་པ་མཐའ་དག་ཀྱང་བྱེ་མའི་ཐང་ཆེན་དུ་རླུང་

བུ་བཞིན་གང་སར་སྤུར།

ངས་རང་ཉིད་གླུ་རུ་ལེན་ན་འདོད།

ལྷ་སྒྲུང་རིང་མོ་ཞིག་འདི་ལྟར་རིམ་གྱིས་བཀླགས་རྗེས།

འགྲན་རྩོད་ཀྱི་རྒྱལ་ཁམས་འགྲིམ་ཞིང་རང་འགྲེལ་བྱས་ནས།

ཞོགས་པར་དུང་བའི་བག་ཆགས་ཟབ་མོ་དེ་སྐྱ་རེངས་

དང་འགྲོགས་ནས།

ཚ་ཚ་འུར་འུར་དང་བཅས་ཏེ་སྣང་བའི་སྒེའུ་ཁུང་གི་ཕྱི་

རོལ་ནས་བཙལ་མྱོང་།

བདག་གི་སྐད་ངག་དྭངས་མོ་ཁྱེད་གང་ན་ཡོད་ངས་རང་

ཉིད་གླུ་རུ་ལེན་ན་འདོད།