གང་གི་མཁྱེན་པའི་ཆ་ཤས་ལ།།

གློ་བུར་གློག་གི་རླབས་ལུད་པས།།

བརྩེ་བའི་ཤས་ཀྱི་ཆུ་རྡུལ་ནི།།

ལུས་མེད་ཚོགས་ཀྱི་སྙིང་ལ་འཕྱ།།

རེ་བའི་ཁྱུང་གཤོག་མཁར་བརྐྱངས་ཏེ།།

ཤེས་རིག་འབུམ་གྱི་ན་དར་བའི།།

ལྷོ་ཕྱོགས་ནགས་མའི་སྐྱེད་ཚལ་ལ།།

འཕུར་གང་སྲིད་པའི་མཐོངས་སུ་བྲེས།།

ལུས་ཀྱི་ལྗོན་པའི་དཔག་བསམ་ཤིང་།།

མ་ལ་ཡ་ཡི་ནགས་ཀློང་ནས།།

རང་གི་བྱམས་པའི་དྲི་བཟང་སྟོང་།།

ཁྲིད་དེ་སེམས་ཀྱི་ཕུགས་སུ་ཐོན།།

དེའི་ཚེ་སྐལ་བཟང་ཆོས་སྙན་གྱི།།

མཛའ་ན་མོ་དེར་རབ་སྲེད་པའི།།

དྲི་བཅས་སེམས་པ་གློ་བུར་བས།།

རྟོག་འགྱུའི་ལམ་གྱི་སྣེ་མོ་རྙེད།།

དུངས་པ་འཇའ་ཚོན་སྣ་ལྔའི་གཞུ།།

ཆོས་ཉིད་དབྱངས་ལ་བརྒྱུས་པའི་དཔུང་།།

རང་གི་འདུ་བྱེད་འཁྱུག་ལས་སྤུར།།

རྣམ་རྟོག་ན་བུན་འཁྲིགས་པ་ལས།།

རི་བོ་འགུལ་བའི་སྐེད་པ་ལ།།

འཁྱུད་པའི་ཚེ་ཡི་འཇའ་རིས་གང་།།

སེམས་ཀྱི་ཐིགས་པའི་ཟེགས་མར་འཁྲུལ།།

ལས་མཁན་གང་གི་དཔྱོད་མིག་ལས།།

རང་ལ་ཐོབ་པའི་རེ་ཁཱའི་དཔལ།།

སྐལ་བཟང་དུང་གི་ལང་ཚོ་མར།།

ཆགས་པ་བཞིན་ནམ་འཕྱང་མོ་ཉུག།

ངག་རིག་སྦྲང་རྩིའི་རོ་མཆོག་ལ།།

སྲེད་པའི་རྐང་གཉིས་གཞོན་ནུ་མས།།

དབྱངས་སྙན་དར་དིར་སྒྲོགས་པ་ལས།།

སེམས་པར་དབྱར་གཞུང་ཚེས་པ་དྲན།།

རྟོག་འགྱུ་ཡོན་པོའི་ལམ་སྣེ་ནས།།

རི་མོ་ག་ཙམ་མཐོང་བས་ཚེ།།

ཚེ་དཀར་ལྗོན་པའི་ཤིང་ལོ་ཚོགས།།

འགུལ་ལས་འདི་ཙམ་འབྲི་དགོས་བྱུང་།།

མི་རྟག་སྒྱུ་མའི་འཇིག་རྟེན་ལ།།

སྐྱེས་པའི་དོན་ནི་མ་ངེས་ཀྱང་།།

དབྱངས་གསལ་སོ་བཞིའི་ངུར་སྨྲིག་གོས།།

གྱོན་པའི་ལས་ནི་སུ་ཡིས་བྱས།།

ཀྱེ་མ་སྐྱེ་འཆི་སྐད་ཅིག་མའི།།

རླུང་བུ་གང་སར་ལྡང་བའི་ཚེ།།

གཤེད་མའི་དྲུང་ནི་སྙེགས་པ་བཞིན།།

བགྲོད་ལ་སུ་ཞིག་མི་སྐྲག་གམ།།

སྙིང་གི་ཁང་བཟང་དགའ་ཚལ་མར།།

ཞེན་པའི་ནང་སེམས་རི་མོ་གང་།།

བྱམས་དང་བརྩེ་བའི་བཞེངས་མཁན་དེར།།

རིང་ནས་གུས་ཕྱག་འཚལ་ལོ་སྐད།།

ཨེ་མ་རང་བྱུང་ཆུ་མོའི་འགྲོས།།

སྙན་ལས་ལྷིང་འཇགས་ཞི་བའི་གྲོང་།།

སྙེགས་པའི་བུས་པ་གཞོན་ནུ་དེར།།

ཡུལ་གྱིས་སྐལ་འདི་ཅི་ཞིག་ལགས།།