དབུ་ཆུའི་གཙང་འགྲམ་ཞིག་ནས།།

སེམས་ཀྱི་གཞས་ཤིག་བསྐུར་ཡོད།།

འབྲོག་རིའི་ལུང་པའི་ནང་གི།།

མདངས་ལྡན་མེ་ཏོག་སེར་ཆེན།།

གཞས་ཆུང་ཞེ་ལ་འཕྲད་ན།།

ལུས་ཀྱི་དྲིལ་ཆུང་འགྲོལ་རོགས།།

དབྱིངས་ཀྱི་རྒྱན་ལ་བཞུགས་པའི།།

སྤྲིན་གསེབ་ཉི་མ་ཟླ་བ།།

འཇའ་ཚོན་འོད་ཐག་སྣ་ལྔ།།

བྱམས་པའི་ལས་འཕྲོ་ཡིན་ན།།

འཁོར་བའི་སྒོ་ཆེན་མཐའ་ནས།།

བརྩེ་བའི་དབྱངས་རྟ་ལེན་ཆོག །

སེམས་ཀྱི་སྐར་ཁུང་ནང་གི།།

ཞེ་ཡི་སྨིན་དྲུག་ཁྲ་མོ།།

ཟླ་བའི་འོད་ངོགས་ཤིག་ནས།།

དམ་བཅའི་རི་མོ་གསལ་ན།།

དྭངས་བའི་རྨི་ལམ་ཞིང་ནས།།

འཛོམས་པའི་ཕོ་བྲང་ངས་བཞེངས།།

ནམ་ཟླ་དབྱར་ཁ་ཚེས་ཀྱང་།།

ནང་སེམས་དགུན་ཁ་ཐོན་པའི།།

བྱམས་པའི་དགྱེས་ཞལ་མེད་ན།།

ཚེ་ཡི་ཕྲེང་བ་གཏོར་འདོད།།

སུན་སྣང་ལྷགས་རླུང་དམར་པོ།།

ལ་དང་ལུང་ནས་གཡུག་བྱུང་།།

ལས་འཕྲོའི་མེ་ཏོག་སེར་ཆེན།།

བསོད་ནམས་སྐལ་བཟང་ཕོག་ན།།

མཛའ་བརྩེ་འཛུམ་དཀར་ཟེའུ་འབྲུ།།

ངང་ཆུང་ཟས་སྣ་འགྲིག་ཡོད།།

ལང་ཚོ་མཆོད་པའི་ཁ་ལ།།

བྱིན་རླབས་མེ་དྲོད་འཁྱིལ་ཡོད།།

དྲན་པ་རི་ལ་བཀུགས་ན།།

རི་ཆེན་སྨུག་པས་དཀྲིས་འདུག།

སྨུག་པ་སྤྲིན་དང་བསྡེབས་ནས།།

ཁྱོད་ཕྱོགས་ས་རུ་བཞུད་ཐལ།།

རླུང་བུ་ཡར་ཡོང་ཞིག་ལ།།

ཚིག་གི་མེ་ཏོག་བསྐུར་རོགས།།

གཡང་གི་རྔོག་ཆུང་ཁམ་པ།།

སྒ་སྲབ་བསྒྲིག་འདོད་ཡོད་ཀྱང་།།

སེམས་མེད་ཀི་སྒྲ་ཞིག་གིས།།

རྟ་ཕོ་རི་ལ་ཤོར་ཐལ།།

འཁྱམས་པོ་རྐང་ཐང་ཞིག་གི།།

གོམ་ཁ་རྒྱང་གཏད་བྱུང་སོང་།།

ཨ་ཇོ་ཁྲེལ་མེད་མ་གསུངས།།

དམ་ཚིག་རུས་རྐང་གསེང་ཡིན།།

ཐུགས་སེམས་སྐྱོ་བ་མ་གནང་།།

འཁྱམས་པོའི་ལས་དབང་ཡིན་འདུག །