སྙན་རྟོགས་སད། 2019-12-11
སྨུག་སྤྲིན་གྱོན་པའི་ཟླ་བ་དེ་ཡང་།།
སྒེའུ་ཁུང་ངོས་ནས་ག་ལེར་བཞུད་དུས།།
བསྐལ་བ་སྟོང་གི་ལན་ཆགས་ཤིག་ལ།།
གཙང་བོའི་རབ་ནས་དུས་ཆད་བྱས་ཡོད།།
རྒྱུ་མཚན་མེད་ལ་སྟ་གོན་མེད་པར།།
ད་ལོའི་དགུན་ཁའི་གུང་གསེང་ཞིག་ལ།།
མཉམ་དུ་རོལ་ནས་སེམས་ཚོར་ཐར་ཐོར།།
དམིགས་མདུན་འཆད་ཀྱིན་སྙན་ངག་འབྲི་སྟངས།།
བར་ཐག་ཅིག་ལ་འཁོན་རེས་བྱེད་ཀྱིན།།
མིག་ཟུང་བཙུམས་ནས་ཡིད་དུ་སྒོམ་པ།།
མེ་ལོང་ངོས་ཀྱི་གཟུགས་བརྙན་དེ་ལ།།
གཞན་ལས་ལྷག་པའི་བརྩེ་བ་སྤྲད་སྟངས།།
ཐོག་མར་འཕྲད་སའི་མཛེས་ལྗོངས་དེ་ནས།།
ལག་པ་བསྲིངས་ནས་འཇུ་བར་འདོད་པ།།
རྨི་ལམ་ནང་གི་ཚོད་ཚོད་ཡིན་རུང་།།
སེམས་ཀྱི་མཛའ་བ་ཁྱོད་ཀྱི་གྲིབ་མ།།
དུས་ཚོད་འགྲོ་བའི་ཐག་སྒྲ་དེ་ཡང་།།
རྒྱུན་ལྡན་མིན་པའི་ཚོར་སྣང་ཟབ་པ།།
ཁྱོད་དང་བསྐལ་བའི་རྒྱང་རིང་དེ་ན།།
དོ་ནུབ་ཁོ་བོ་ཁེར་རྐྱང་ཡིན་ཚུལ།།
ཁྱོད་ཀྱི་སྐྲ་ནས་སེན་རྩེའི་བར་གྱི།།
མཛེས་ཆ་དེ་དག་ཡིད་དུ་འཚུབ་དུས།།
ཤི་གསོན་སྟོང་གི་རྣམ་ཤེས་འཁྲི་སའི།།
པོ་ཏ་ལ་ཡང་བརྗོད་བྱ་མི་འོས།།
འབྲི་རྒྱུ་མིན་པར་མྱོང་རྒྱུ་ཡིན་པས།།
ཐ་སྙད་འདི་ཚོས་ཕྱེད་ཀ་མི་མཚོན།།
དབུགས་དང་འགྲོགས་ཤིང་སྙིང་དང་སྡེབ་པའི།།
རྒྱང་གི་འོད་དེ་གཞན་དང་མི་འདྲ།།
རྩོམ་གསར། 10