ཀྱེ་ཕུར་མཆོག་གསུམ། 2019-05-24
དེ་རིང་ནས་ཁྱོད་ཀྱང་བྱ་བར་ཞུགས་ཡོད།
ཉལ་ཁྲི་གཅིག་དང་ཉལ་ཐུལ་གཅིག
སླ་ང་གཅིག་དང་དཀར་ཡོལ་གཅིག་གི་བདག་མོ་ཡིན།
ཁ་ཟས་ཞིམ་པོ་ཞིག་རང་གིས་གཡོས་ཏེ་ཟས་ཆོག་ལ།
འཕོས་ཚོས་སྤྲུག་སྤྲུག་བྱས་ཏེ་ཕྱི་ལ་འཁྱམ་ཡང་ཆོག
དེ་ལ་རང་དབང་དང་ཁེར་རྐྱང་ཟེར་ངེས།
མི་འགྱངས་པར་སྐད་འཕྲིན་ཆ་མེད་འགའ་དང་།
ཨང་གྲངས་རྒྱུས་མེད་འགའ་ཁྱོད་ཀྱི་འདུག་
གྲོགས་སུ་འབྱོར་ངེས་ཤིང་།
ཡུན་གྱིས་ཡུན་གྱིས་ཁྱོད་ལ་སྙིང་ཉེ་འབོད་པའི་མི་ཞིག་གིས།
བརྩེ་དུང་ཟེར་བའི་གཏམ་རྒྱུད་ཅིག་ཁྱོད་ཀྱི་
རྣ་བར་ཡང་ཡང་འཆད་ངེས་ལ།
དེ་ལས་གཅིག་གིས་ཁྱོད་ཀྱི་ཡ་ཁོག་ལ་ཚང་
མལ་བཅའ་ངེས་ཤིང་།
མེད་ན་མི་སྡོད་ཅིང་ཡོད་ན་མི་ངོམས་པའི་
རླུང་བུ་ཅང་ཅང་གཡུག་སྟེ།
དཀར་ཡོལ་གཉིས་དང་སྐད་ཆ་གཉིས་སུ་འགྱུར་ངེས།
དེ་ལ་འཁོར་བ་དང་ཁྱིམ་ཚང་ཟེར་ངེས།
དེ་ནས་ཡུན་ཙམ་སོང་རྗེས།
ཁྱོད་ལ་ཨ་མ་ཞེས་འབོད་པའི་མགྲོན་པོ་ཆུང་
ཆུང་ཞིག་ཁྱོད་ཚང་ལ་སླེབས་ཤིང་།
དེ་ནི་ཁྱོད་རང་མི་ཚེ་འདིར་འཁེན་སའི་
ལག་རྟེན་དུ་འགྱུར་ངེས།
དེ་ནི་ཁྱོད་ཀྱི་ཟ་རོགས་ཡིན།
ཉལ་རོགས་ཡིན། དགོད་རོགས་ཡིན།
ཐ་ན་ཁྱོད་རང་དུར་སར་བསྐྱལ་མཁན་ཡང་དེ་ཡིན།
སྐབས་དེར་ཁྱོད་ནི་འཁོར་བ་གཡས་སུ་བཀལ་ཅིང་།
འགན་འཁྲི་གཡོན་དུ་བཀལ་བའི་ཆུ་གཡག་ཅིག་སྟེ།
འཚོ་བའི་ཁྲོད་ཀྱི་ཐབ་ཀ་དང་སྔ་ང་ཡིན།
ཕྱགས་མ་དང་མེ་འདྲུ་ཡིན།
རྩམ་པ་བརྫི་བྱེད་ཀྱི་དཀར་ཡོལ་དང་།
ཐིག་པ་གཡོ་བྱེད་ཀྱི་ཐོམ་བུའང་ཡིན།
དེ་དུས་ཁྱོད་ནི་རང་ཁྱིམ་ལ་གད་བརྡར་བྱ་བའི་ཕྱགས་མ་ཡིན།
བཟའ་མི་ཚོའི་སེམས་ཁོང་ལ་དྲོད་ཁོལ་སྟེར་བའི་མེ་དཔུང་ཡིན།
ཁོ་ཚོས་འགྲོ་ཞོར་འདུག་ཞོར་ལ། ཁྱོད་ལ་ལག་པ་ཕྱི་ངེས།
ལག་པའི་ཕྱི་ནང་གི་ནག་ནོག་ཁོ་ནས།
ཁྱོད་རང་རྨང་ནས་བརྫོད་མི་སྲིད་ཀྱང་།
དྲན་པའི་རས་ཡུག་དཀར་པོའི་ཚོས་ཁ་ནོག་ངེས།
མ་སྐྱོ། མ་སྡུག
དེ་དུས་ཀྱང་ཁྱོད་ཀྱི་ཕྱི་ལོགས་ན་སྟོབས་ཤུགས་
གཞན་ཞིག་སྐུང་ཡོད་པ་ང་ཡིན།
ཆུ་གཙང་བོ་འཁྱུག་པའི་ལྟེབ་ཁུག་ན་ཡོད།
ཁྱོད་ཆུ་ཁར་ཤོག་དང་གསང་བས་མཇལ་ཆོག
ཁྱི་རྒྱ་ལིའི་ལྕགས་ཐག་ཕུར་བར་སྦས་ཡོད།
ཁྱོས་ཁྱི་ལྟོ་བླུད་དང་བརྩེ་བས་མཇལ་ཆོག
ཁྱོའི་ལག་གི་དཀར་ཡོལ་འབྲུག་མ་རུ་འཛུལ་ཡོད།
ཁྱོས་འོ་ཇ་བཞེས་དང་མཆི་སྒྲོས་གླན་ཆོག
འདི་ལ་གྱེས་བྲལ་དང་དྲན་གདུང་ཟེར།
སྡུག་གི་དངན་པ་ཤུར་ཤུར་འཐེན་ཡང་སྐྱོ་བ་མི་སངས།
དྲན་པའི་མིག་ཆུ་ཤམ་ཤམ་ལྷུང་ཡང་ན་ཟུག་མི་འཇགས།
ཡིན་ཡང་། ངས་སེམས་ལ་ཟགས་ལྷན་སྦྱར་ནས།
མ་མགལ་སོ་ཡིས་བཅིངས་ཏེ་བསྲན་ངེས།
འདི་ནི་དུས་ཀྱིས་བསྐྱལ་ཡོང་བའི་ལས་དབང་ཡིན།
རྩོམ་གསར། 10