༼ ༡ ༽

འཁོར་བའི་སྒེའུ་ཁུང་འདི་ལས་གྲོང་ལ་བལྟས་ན།།

ཞེ་འཛིན་མེ་ཏོག་སྐམ་པས་སྟོན་མཇུག་མཇལ་ཡོང་།།

མིག་མཐའི་གྲོང་ཚོ་དེ་ཡི་ན་བུན་གསེབ་ན།།

བརྩེ་བའི་ཁྲུས་ལ་རོལ་བའི་ངང་བ་ཁྱུ་གཅིག།

ལོ་བརྒྱའི་སྨུག་པ་འདི་ལ་སུན་སྣང་སྐྱེས་ཏེ།།

རྫིང་བུ་མེ་ཏོག་ཅན་དེར་བདེ་མོ་བཞག་ནས།།

རི་སྐྱེས་རི་དྭགས་མ་བུས་རྐང་རྗེས་དོད་པའི།།

ནམ་མཁའི་པང་དུ་འཁོད་པའི་རི་སྒང་ཞིག་ནས།།

ཏིང་འཛིན་ཕྱག་རྒྱས་གདོང་ལ་རི་མོ་བྲིས་ཤིང་།།

ཉི་ནུབ་མཚམས་སྤྲིན་དམར་པོའི་ཆང་གི་མཆོད་པ།།

རི་ཁྲོད་རི་དྭགས་ཚོགས་དང་ལྷན་དུ་བཏེགས་ནས།།

ཚེ་མཐའི་སྲོད་ཀར་གཟས་པའི་སྒྲོ་ལྡན་མདའ་མོ།།

དག་པའི་ཞིང་དུ་སླེབས་པའི་རྨི་ལམ་རྨིས་ཡོད།།

༼ ༢ ༽

སྲོད་ཀའི་རི་བོའི་གྲིབ་མ་བདག་མདུན་གྱི།།

ནགས་ཀྱིས་ཟོས་པའི་སྒང་གཤོང་འདི་ལ་ལྷུང་།།

བསམ་གཏན་པ་དེ་བྲག་ཕུག་སྐྱ་བོའི་ནང་།།

མེ་སྒོང་གམ་དུ་ཏིང་འཛིན་སྟན་ལ་བསྡད།།

མི་རྟག་སྤྲིན་པའི་ཁམས་ལ་ཅེར་ནས་འདུག།

སྡུག་བསྔལ་གཙང་བོའི་རླབས་ལ་ཉན་ཏེ་འདུག།

སྟོང་བ་ནམ་མཁའི་ལྷ་མོ་བདག་མེད་འདིས།།

རྒྱང་རིང་ཀུན་དགའི་རི་ལ་ཁྲིད་དམ་སྙམ།།

ཐར་བ་ཞེས་པའི་གཙང་བོའི་ནང་རོལ་ནས།།

ངང་ཕྲུག་ལྷ་ཡི་འདབ་ཆགས་ཡིན་ན་སྙམ།།

འོན་ཀྱང་སྲིད་པའི་གྲིབ་མ་མཐུག་དྲགས་པས།།

རི་སྤྱང་སྡིག་ཅན་བཀྲེས་པས་ངུས་པ་ན།།

དམིགས་རིམ་མདའ་མོ་འཁོར་བའི་རི་རྒྱུད་ཀྱི།།

རི་དྭགས་བྲོས་པའི་སྟེང་ལ་གཟས་ཏེ་འཕངས།།

ཞེན་ཆགས་རྦབ་རྡོ་འདི་ནི་འདྲིལ་བའི་རྗེས།།

རི་དྭགས་རྗེས་སུ་ཁྲིད་པའི་མདའ་ཁུར་ཅན།།

ཐར་བའི་སེང་གེ་དམིགས་པའི་རྔོན་པ་ཡིན།།