ཞལ་སྐྱེམས་ངག་འཕྲུལ་རྒུམ་པ་ཡིས།།

ལུས་ཀྱི་ཁྲེས་པོའི་མྱོང་གོམས་བསྣམས།།

ཁྱོད་ཞལ་ཁྲག་རྩའི་འདུ་བྱེད་ལས།།

སླར་ཡང་སྤོབས་པས་རྣམ་རྟོག་སྤྲོས།།

སྐྱེ་འབྲས་དཔྱིད་རླུང་འཛུམ་པ་ཡིས།།

ཐ་སྙད་མེ་ཏོག་པང་བའི་ཁྱོད།།

སྲོག་གིས་འཁྱུད་པའི་མདུན་རྒྱབ་ནས།།

རྒྱང་རིང་ལན་གྲངས་བཙལ་བ་ཡིན།།

ལོ་མས་བྲིས་པའི་ཚེས་རིས་ཤིག།

དྲན་སྣང་མཉེན་མོའི་ལྗོངས་ན་རྒྱུ།།

རྣམ་ཤེས་ཐེད་པའི་ཟླ་གཞོན་ཁྱོད།།

འཛུམ་ཟེར་བསྟར་བའི་དོ་ཤལ་ཞིག།

བས་མཐའི་སེམས་ཚེགས་བཙིར་བ་ཡིས།།

དྲན་དང་གདུང་བའི་གཡབ་མོ་བྱེད།།

ནགས་ཀྱི་སྨྲ་ལྕེའི་སྨྲེང་བ་བསྡམས།།

ཆར་ཟིམ་དབུས་ན་སྙིང་སྡུག་མཐོང་།།

སྟོང་ཁམས་དུབ་པའི་མཚོ་ངོགས་སུ།།

དགའ་དུང་བྲུལ་བའི་ཕྱེ་ལེབ་ཆ།།

རྨི་ལམ་རི་ནས་བདག་ཡིད་རྩེ།།

རླུང་གིས་བདས་པའི་བག་ཆགས་སད།།

དྲན་འདུན་བྲོ་བས་མཚན་ལྗོངས་སུ།།

མེ་ཏོག་ལན་བུ་འཁོར་ནས་བྱུང་།།

གནས་འདིར་སྒྲ་མེད་ལྷིང་འཇགས་ཅན།།

གངས་རླུང་འཚུབ་པའི་འཇིག་རྟེན་བཟི།།

གཅིག་པུར་ཆང་ཕོར་བཏེགས་པ་ལས།།

མཆི་མས་གསང་གཞས་མགྲིན་པར་སྐུངས།།

ཟིལ་བ་སྒུལ་བའི་རྒྱབ་གཟུགས་དེས།།

སྣང་བའི་གྲུ་ཆར་ལོ་འདིར་ཕབ།།