རླུང་ཡོར་ཞེད་སྣང་ཆུ་སྒར་རིངས་སྟབས་ཀྱི་བྱིས་བློ།།

བྱེ་མར་ཟགས་པའི་གར་མའི་བཞུད་ཤུལ་གྱི་དབུ་རྨོག།

འུར་ཆོམ་ཁ་ཆར་རྨས་པའི་གདོང་དམར་གྱི་ཉི་འོད །།

རུས་པའི་སྒྲོམ་ཚིགས་གྲལ་རིའི་སོ་ཁ་ཡི་སྲ་མཁྲེགས།།

བས་མཐའི་ཆར་ཟིམ་སྡོང་རྩེར་ལྷུང་བའི་ལོ་ཟླ།།

འཚོ་བའི་ཐང་ཤིང་ཁ་གང་བྱས་པའི་རྨི་ལམ།།

གཞོན་པའི་ལེ་མདའ་དངན་པ་མེད་པའི་འཛུམ་ཀོང་།

ལུས་སེམས་སྲད་བུས་གཅུན་པའི་རྨ་ཤུལ་གྱི་རྒྱང་མིག།

ལུང་བའི་ཕུ་མདའ་སྐྲ་ཡི་གཉེར་རིས་ཀྱི་དོལ་རྙི།།

གྲང་རེག་སྦུབས་རྒྱ་ངག་སྒོའི་བབ་སྟེགས་ཀྱི་དཔྱིད་རླུང་།།

འདི་སྣང་འགྲུལ་བཞུད་རི་ཁུད་ཚེར་ཕུང་གི་འཚོ་རྟེན།།

མདུན་གྱི་མེ་ལོང་གནས་མོའི་ཕུཊ་མདུན་གྱི་འོབས་རིང་།།

སྨུག་པའི་རལ་གྲི་ཉི་ཟླའི་ཇག་ལམ་གྱི་ལས་བགོས།།

ཕུཊ་མདུན་དཀར་ནག་མདུན་གྱི་བར་སྣང་གི་སྤར་མོ།།

མདུན་རྒྱབ་སོར་མོས་མི་ཚེའི་གབ་ཚིག་གི་ཇ་ཡུན།།

འཁོར་ལོ་སུམ་བརྒྱ་དྲུག་བཅུའི་མནོ་བསམ་གྱི་སྣང་ངོ།།

མཚོ་མཐའི་དབུས་ཁུལ་རྡོ་བའི་གྲོང་ཁྱེར་གྱི་རྩིཊ་ལྡེབས།།

མདང་ནུབ་འཁྱག་རོམ་བྱ་རྒོད་ཞེན་ཆགས་ཀྱི་ངེས་ཤེས།།

འོ་དོད་རྩད་ཞིབ་ཀླག་ཅོར་ཕྱིད་ཐབས་ཀྱི་ཉམས་ཆག།

རི་མོ་སྙིང་སྐྱེས་ཚེར་མའི་མེ་ཏོག་གི་རྦད་ཆོད།།

སྐྱེས་པའི་ཁུ་སིམ་བཅད་པའི་དོ་བཞག་གི་ལོག་མལ།།

ཚོད་གམ་མེ་རོ་སྐྱོ་བའི་དགུ་ཚིགས་ཀྱི་སྒྲུང་གཏམ།།

བྱ་བཞག་དྲི་ངད་ངན་སྐྱུགས་རོ་བཅུད་ཀྱི་ཤུགས་གླུ།།

མྱ་ངན་ཅོ་འདྲི་གཟུང་ཐག་བྱམ་འཁོར་གྱི་རང་རྣམ།།

མི་རྐྱང་སྣེ་འཛིང་མཉེན་མོའི་འཆར་ནུབ་ཀྱི་ཁྲབ་རྨོག།