བདག་གི་འཇིག་རྟེན་གས་གྱུར་པས།།

སྐར་མ་ལག་གང་ཁྱེར་ཡོང་ཞིང་།།

ཁྱེད་ཀྱི་རུམ་དུ་བསྒྲུགས་པའི་ཚེ།།

ཟླ་བའི་འོད་ནི་རབ་ཏུ་གསལ།།

གཙང་བོ་གཞུང་ལ་འགྲིལ་པ་དེ།།

གཤོག་པ་འཐོར་བའི་ཕྱེ་ལེབ་བཞིན།།

སྐྲ་རྩེའི་ཟིལ་བ་ཟགས་གྱུར་པས།།

མདུན་དུ་སྤུངས་པའི་རྡོ་ཡི་ཚོགས།།

མེ་ཏོག་རེ་རེར་གྱུར་པའི་ཚེ།།

མཁའ་མཐའི་འཇའ་འོད་ཕྱེ་མ་ལེབ།།

བྲོ་གར་རྡུང་ཞིང་བར་མེད་འཕུར།།

ཁྱོད་ཀྱི་མིག་གི་མདའ་མོ་བཞིན།།

རྡོ་ལ་བྲིས་པ་སྐར་མའི་འོད།།

ཁྱོད་ཀྱིས་ཡུལ་ནས་མ་བརྐོས་ཀྱང་།།

ང་ཡི་ལུས་ཀྱི་ཕྱེད་ཀ་ཡིས།།

མཚན་མོ་དེ་ནས་རུམ་དུ་བསྡུས།།

གཤོག་པ་ཐོགས་པའི་སྨུག་སྤྲིན་ལ།།

མཛུབ་མོ་གཅིག་གིས་བཟི་བར་བྱེད།།

སྒང་དུ་གཡུགས་པའི་དར་ལྕོག་ལ།།

སྲོག་གི་དབང་པོ་སུ་ཡིས་བཙལ།།

མ་ཎི་རི་ནས་གྱེར་པའི་ཚེ།།

ང་དང་ཁྱོད་ཀྱི་འཇིག་རྟེན་ལ།།

རྩེད་རྡོ་སྒྲིག་པ་ག་ཙམ་ཡིན།།

སྙན་ངག་བྲིས་པ་ཇི་ཙམ་འདས།།

ཁྱོད་ཀྱི་རུམ་དུ་བྱེ་མ་ཡོད།།

རླུང་གི་བུ་ཡུག་ང་ཡིས་བརྩལ།།

རྡུལ་ཕྲན་རེ་ལ་ཆར་ཐིགས་ཀྱིས།།

འདབ་ལོ་དམར་པོ་བཏབ་པའི་ཚེ།།

རྨི་ལམ་ནང་གི་ཕྱེ་མ་ལེབ།།

ངུ་ཞིང་ངུས་ཏེ་ཞབས་བྲོ་རྡུང་།།

དྲ་མའི་ངོས་ལ་རླངས་པ་ཐུལ།།

མདང་གི་མཚན་མོ་འཇིག་རྟེན་བརྫུས།།

ཨེ་མ་མཚར་རོ་བདག་གི་མིག།