ཞིང་སྡེ་གསར་སྐྲུན་གྱི་རླུང་ནག་འཚུབ་མས༎

རི་གྲོང་སྐྱ་བོ་འདིའི་ཡོད་ཚད་འཁུར་སོང་༎

ལོ་ལོན་རྒན་རྒོན་དང་མཁར་གྱང་སྐྱ་བོ༎

བོད་གྲོང་ཡིན་ལུགས་ཀྱི་མཛེས་རིས་ཡིན་ནམ༎

ཆུ་མིག་ཆུང་ཆུང་དེའི་འབབ་རྒྱུན་མཐོང་ན༎

ཁོ་བོ་རི་གྲོང་འདིར་འོང་བ་འཕྱུག་འདུག།

ཞོགས་པའི་དུང་དཀར་གྱི་འགྱུར་ཁུགས་ཐོས་ན༎

སེམས་པ་འཁྱགས་པོ་འདིར་དྲོད་ཅིག་རྒྱས་འོངས༎

ཉེ་རིང་ཆགས་སྡང་གི་ཟུར་མིག་ལིང་ལིང་༎

གཉེན་སྡེབ་དཔུང་སྒྲིག་གི་མགོ་བོ་ཀྲོག་ཀྲོག།

རི་གྲོང་སྲིབ་འཁོར་འདིའི་རྔམས་ཁ་བརྒལ་དུས༎

ཚངས་པའི་ཐིག་ཤིང་ཞིག་འཛིན་མཁན་སུ་ཡོད༎

རྒྱན་འཇོག་ཤོ་རྒྱག་གི་ཐག་སྒྲ་དིར་དིར༎

ཁྱོད་ཕམ་ང་རྒྱལ་གྱི་ཀི་སྒྲ་སིང་སིང་༎

མཚན་ནམ་རིང་མོ་འདིའི་སྐར་ཚོགས་གཏོར་དུས༎

གསོང་བོའི་སྙིང་གཏམ་ཞིག་ཤོད་མཁན་སུ་མཆིས༎

དྲང་པོའི་སེམས་པ་འདི་གནའ་སྐྱོ་ད་སྐྱོ༎

འཇགས་མེད་སྨྱུ་གུ་འདི་ད་འཁྱུག་ཡང་འཁྱུག།

ལྷ་ཁང་རྒས་འཁོགས་དེའི་ནང་སྙིང་མཇལ་དུས༎

སྤྱན་ཆབ་དྭངས་མ་རེ་འཕོ་མཁན་དུ་ཡོད༎

རི་སྡེ་ཁྲ་མོ་འདི་མུན་པས་བསྒྲིབས་སོང་༎

གྲེ་ཆེན་རི་བོ་ཡི་རྔམས་བརྗིད་མ་མཐོང་༎

ཤེས་མེད་ཚོར་མེད་ཀྱི་སྣང་བ་ཐན་ཐུན༎

སྐྱོ་སྣང་དགུ་བརྩེགས་ཀྱི་ཀློང་ནས་འཐོར་སོང་༎