བདེན་གྲུབ་ཟླ་ཤེལ་གཙང་མའི་སྒེའུ་སྟེགས་ལ།།

ཕྱོགས་ཞེན་ཡོལ་ནག་མཐུག་པོས་མ་སྒྲིབ་པར།།

དད་གསུམ་ཆུ་སྐྱེས་དཀར་པོའི་ཟེའུ་འབྲུའི་མདངས།།

ངག་རིགས་མཚོ་མོའི་རླབས་རྩེར་འཛུམ་གྱིས་འཕྱོ།།

ཐུགས་བསྐྱེད་དངུལ་དཀར་གཙང་མའི་མེ་ལོང་ལ།།

རང་འདོད་རྡུལ་ཆ་སྟུག་པོའི་སྒྲིབ་བྲལ་མགོན།།

སྐུ་བཞིའི་ཁོ་ལག་རྫོགས་པ་ཞིང་འདིའི་སྐྱབས།།

ལྷ་སྲས་དམ་པ་ཏོག་དཀར་ཨེ་མ་བསྟོད། །

དགེ་སྡིག་ཚགས་སུ་འདྲེན་པའི་ན་རཀ་ནས།།

གྲོགས་ཀྱི་སྡུག་བསྔལ་ཐུགས་ཀྱིས་མ་བཟོད་པར།།

ཉིད་ཀྱིས་ཁུར་དུ་བཞེས་པའི་བཟོད་སེམས་ཅན།།

བྱམས་ཆེན་པཀྵི་ཏ་ལ་ཕྱག་འཚལ་ལོ།།

གཟོད་ཀའི་ཡུལ་གྱི་བྲམ་ཟེ་ལོག་སྲེད་པས།།

གཙུག་གི་ནོར་བུ་མཚོན་གྱིས་བཅད་པའི་མོད།།

གསེར་མདོག་ཞལ་རིས་ཁྲག་ཏུ་བསྲེས་པའི་ཚེ།།

བདེ་གཤེགས་ཁྱེད་ལ་འོ་རྒྱལ་མ་བྱུང་ངམ།།

བལ་ཡུལ་ཚང་ཚིང་ལྗོན་པའི་གྲིབ་འོག་གི།

སྟག་མོ་བཀྲེས་པའི་སྡུག་བསྔལ་ཆེར་མཐོང་ནས།།

གཅེས་འཛིན་ལུས་ཀྱང་བཏང་བའི་སྙིང་ཁམས་ཅན།།

རྒྱལ་སྲས་དོན་ཀུན་གྲུབ་ཁྱེད་སྐྱབས་སུ་བསྙེན།།

ལུམྦིའི་ཚལ་དུ་ལང་ཚོའི་འཛུམ་དཀར་བཞད།།

འཁོར་བསྒྱུར་དབང་གི་ཆོ་ལོ་བསྙེས་ན་ཡང་།།

ནོག་ཆུང་འཁོར་བའི་རྙི་ལས་མ་ཟིན་པར།།

སེར་སྐྱའི་གྲོང་ནས་གཏན་བདེའི་རྔ་ཆུང་དཀྲོལ།།

ཇི་ལྟར་འཁོར་བསྒྱུར་མཚན་ལ་རེག་པས་ཀྱང་།།

དེ་ལྟར་འཁོར་བའི་གཤིས་ཁམས་གཏིང་ནས་དཀྲུགས།།

སྐྱེ་འཆིའི་སྙིང་ཁམས་གསོ་བའི་ཨ་ག་རུ།།

སྟོན་པ་བདེ་གཤེགས་སྐྱོབས་ལ་སོར་བཅུས་བཏུད།།

ནཻ་རཱན་ཛྙ་ཡི་ནགས་ཚུལ་མཛེས་པའི་ལྗོངས།།

ཏིང་འཛིན་འཚོ་བའི་སིལ་ཏོག་ཉམས་སུ་བཞེས།།

སྲིད་གཞི་གཉིས་སུ་མེད་པའི་འབྲུག་སྒྲ་ཞིག།

སྲིད་གསུམ་ཁམས་ལ་ལྷད་མེད་དལ་གྱིས་སྡུར།།

གཞན་ཕན་གསེར་གྱི་མཆོད་སྡོང་མཐོན་པོའི་རྩེར།།

མཚན་དཔེ་གདུགས་དཀར་ཡང་མོ་གྱེན་དུ་བཏེགས།།

བསླབ་གསུམ་བརྟུལ་ཞུགས་དངུལ་ཀྱི་གོ་ཆ་ལ།།

ཡང་དག་རྣམ་མཁྱེན་དབྱིག་གི་ཁྲ་ཚོམ་བཀོད།།

འཚེ་བ་ཆོས་སུ་སྨྲ་བ་མ་བཟོད་པར།།

ལོག་སྨྲའི་དུག་གི་ཁ་ཆུ་གཏོར་ན་ཡང་།།

ཚར་བཅད་རྗེས་འཛིན་བརྩེ་བའི་ལྟ་སྟངས་ཅན།།

སེམས་དཔའ་ལྷ་ཡི་ལྷ་དེར་ཕྱག་འཚལ་བསྟོད།།

བརྒལ་བརྟག་ཤེས་དཔལ་རལ་གྲིའི་སོ་ཁ་ལ།།

ལུང་རིགས་གནམ་ལྕགས་སྔོན་མོས་ངར་ཁ་བྱུགས།།

ལྷས་བྱིན་འཁོར་བཅས་སྐྱེངས་ཏེ་མགོ་བོ་སྨད།།

རྒྱལ་ཆེན་སྡེ་བཞིའི་གཟི་བརྗིད་མོག་པོར་བྱས།།

ནགས་མའི་དགའ་ཚལ་བྱ་རྒོད་ཕུང་པོ་སོགས།།

བདེན་བཞིའི་དབྱར་རྔ་ལྷང་ལྷང་བསྒྲོགས་པའི་ཚེ།།

དཔག་ཚད་བྱེ་བ་མང་པོའི་ཕར་ནང་གི།

འདྲ་མིན་སྐྱེ་བོའི་སེམས་ལ་བདེ་མཆོག་སྟེར།།

དེང་སང་གོ་ལའི་ཕྱོགས་བཞི་བར་མཚམས་སུ།།

ཚན་རིག་ཤེས་བྱའི་མཚོན་མདོག་བཀྲ་ན་ཡང་།།

འདི་ཕྱིའི་བདེ་ལེགས་དཀྲོག་པའི་འབོད་བརྡ་ཞིག།

སྙིགས་མཐའི་སྐྱ་རེངས་ངོགས་ན་ཁྱེད་ཀྱི་གསུང་།།

དངོས་རིག་པ་དང་སེམས་གཙོ་སྨྲ་བ་སོགས།།

མི་ཚེ་སྐྱོ་བའི་གར་སྟེགས་འདོད་ན་ཡང་།།

ལྟོས་སྒྲུབ་ཡུལ་གྱི་དགའ་བདེ་འཚོལ་བ་ལས།།

ཡུལ་གྱི་གཤིས་ལུགས་རིག་པས་གཞལ་བ་མེད།།

ཇི་ལྟར་ཁྱེད་ཀྱི་ལྟ་བར་དཔྱད་པ་ན། །

དེ་ལྟར་འཁོར་བའི་མཚང་ཆེན་རྟིང་ནས་རྡོལ།།

ཁྱེད་ཀྱི་དགོངས་པའི་གསེང་ལམ་རེ་རེ་ན།།

ལོག་རྟོག་ཐལ་མར་དབུག་པའི་ཤེས་དཔལ་རེ།།

དེ་སྐད་དད་གསུམ་དྲན་པའི་དོ་ར་ནས།།

བསྟོད་ཚིག་ངག་གི་རྒྱུད་དྲུག་དཀྲོལ་བ་འདི།།

རྒྱལ་བུ་སྙིང་སྟོབས་ཅན་གྱིས་གསན་ལགས་ན།།

འདྲེན་པའི་ལྕགས་ཀྱུ་བདག་ལ་རྐྱོངས་སུ་གསོལ།།