ལུ་གུ་མེ་ཏོག་ལྷན་དུ་ཁྱོད་ཉིད་འཚར།།

ཨ་མའི་བྱམས་སྐྱོང་འོག་ནས་ཁྱེད་ཉིད་སོན།།

སྤྲིན་དཀར་འདབ་མ་ལྟར་དུ་ཁྱོད་ཉིད་གྲོལ།།

དབྱར་དུས་སྦྲང་ཆར་ལྷན་དུ་ཁྱོད་ཉིད་འབབ།།

མཛེས་སྡུག་པདྨོའི་ཐོག་ཏུ་ཁྱོད་ཉིད་འཛུམ།།

བདག་གི་དྲན་པའི་གཏིང་ནས་ཁྱོད་ཉིད་རྩེན།།

ཁྱོད་ཉིད་ཟེར་བ་འཇིག་རྟེན་ཉི་ཟླ་ཡིན།།

ང་ཡི་སེམས་ལ་དཀར་ཞིང་འོད་དུ་འཚེར།།

ཁྱོད་ཉིད་ཟེར་བ་ཁོ་བོའི་སྙན་ངག་ཡིན།།

བདག་གི་ཚོར་འདུ་ཡོད་ཚད་ཁྱོད་ལ་འཐིམ།།

ད་ནི་ཁོ་བོས་མང་པོ་མི་བཤད་དེ།།

བརྩེ་བའི་འཛུམ་ཀོང་མ་བོར་བརྟན་པར་ཤོག།

དུང་བའི་སོ་ཕྲེང་མ་ཡལ་མངོན་པར་ཤོག།

མདོར་ན་ཁྱོད་ཉིད་སྐྱིད་ཀྱིས་འཚོ་བར་ཤོག།