སྤང་མེ་ཏོག་སྣ་བརྒྱའི་ཡང་སྟེང་ན།།

དགོང་སྐར་ཚོགས་འབུམ་གྱི་མར་ཞབས་ན།།

སྦྲ་མཐིང་སྨུག་གྲུ་བཞི་ལྷམ་མེར་ཆགས།།

ང་འབྲོག་པའི་འཚོ་གནས་དེ་ན་ཡོད།།

རྟ་ནོར་ལུག་མང་པོའི་སུག་རྗེས་ན།།

སྙན་རྫི་གླུ་རིང་མོའི་བར་གསེང་ན།།

ཞོ་འོ་མའི་མཚོ་མོ་དགུང་ལ་འཕྱུར།།

ང་འབྲོག་པའི་འཚོ་བ་དེ་ན་ཡོད།།

རི་ལ་ལུང་མང་པོའི་སྦྲེལ་མཚམས་ན།།

ཆར་སེར་བ་མོད་པོའི་སྦྲ་མཐིལ་ན།།

མར་ཆུར་བ་རི་བོའི་གཏོས་དང་མཉམ།།

ང་འབྲོག་པའི་དགོད་སྒྲ་དེ་ན་ཡོད།།

དུས་ནམ་གུང་ཙམ་གྱི་མུན་ཁྲོད་ན།།

གན་སྒོ་ཁྱིའི་ཟུག་སྐད་འཇགས་དུས་ན།།

ཁྱིམ་སྒྱེད་པུའི་འགྲམ་ན་ཤབ་ཤུབ་ཅིག།

ང་འབྲོག་པའི་སྙན་ངག་དེ་ན་ཡོད།།

ན་མེ་ཏོག་བཞད་པའི་རྩྭ་ཐང་ན།།

ལུག་གཡང་དཀར་སྟོང་གི་སྣེ་མཐའ་ན།།

སེམས་བསམ་པ་འདྲིས་པའི་སྙིང་གཏམ་ཞིག།

ང་འབྲོག་པའི་གཏམ་རྒྱུད་དེ་ན་ཡོད།།

སྦྲ་མཐིང་སྨུག་གྲུ་བཞིའི་སྒོ་འགྲམ་ན།།

སྐྱིད་གཡང་ལ་འཁོར་བའི་ལྷས་ར་ན།།

བཞོ་དགོ་དགོ་འབྲོག་མོའི་ངག་ན་སྙན།།

ང་འབྲོག་པའི་དབྱངས་རྟ་དེ་ན་ཡོད།།