བརྩེ་གདུང་གི་ལས་བསྐོས་དང་།

ཡིད་སེམས་ཀྱི་གསང་བ་མཐའ་དག་སྙན་མོ་ངག་ལ་དྲངས་ནས་གླུ་རུ་བླངས་དུས།

གཞོན་པའི་འཆར་ཡན་རི་མོར་ངོ་མཚར་གྱི་ཕྱུག

འདུ་འབྲལ་མིག་ཆུའི་ལོ་ཟླར་བདེ་སྐྱིད་ལྡན།

སྒོ་ཁྱིའི་ཟུག་སྐད་དང་།

ཁུ་བྱུག་གསུང་སྐད་གང་ཡང་མ་ཡིན་པའི།

འགྱུར་ཁུགས་ཀྱི་གདངས་ནས་ན་ཟུག་མངོན་ཅིང་།

སྡེབ་སྦྱོར་གྱི་དབྱངས་ལ་བརྩེ་བ་སྦས་པ།

ཉམས་འགྱུར་གྱིས་མིག་ཆུ་སྟེར་ལ།

གླུ་ངག་གི་ཡིད་སེམས་བཀུག་པ།

འཇིག་རྟེན་པའི་ངག་དབང་ལྷ་མོ།

བརྩེ་བའི་ཟབ་གཏེར་སྦས་ཏེ།

འཇིག་རྟེན་གང་ཞིག་ལ་བཞུགས་ཡོད།

རི་བོ་དེའི་དར་ལྕོག་ཟད་སོང་།

རེ་སྒུག་གི་འདབ་ལོ་ཡང་ཡལ་སོང་།

ཡིན་ནའང་།

ཟླ་ནས་ཟླ་བར། ལོ་ནས་ལོ་བར།

བསྐལ་བ་ནས་བསྐལ་བ་བར།

ཚ་དྲོད་མ་ཡལ་བའི་སེམས་པ་ཞིག་གིས།

འཁྱག་སིབ་སིབ་ཀྱི་དགུན་གཞུང་ཁྲོད་ན་ཁྱོད་ལ་སྒུག་འདུག

སྔོ་ལྗང་ལྗང་གི་ལོ་མའི་གསེབ་ནས་ཁྱོད་ལ་བལྟས་འདུག

འདར་སིག་སིག་གི་གསེར་ལྗོངས་ཡུལ་ནས་ཁྱོད་རང་དྲན་གྱིན་འདུག

རླུང་དམར་གྱི་རི་ལུང་གང་བའི་དཔྱིད་ཀའི་དུས་ཀྱང་ཁྱོད་རང་བཙལ་བཞིན་འདུག

ལང་ཤོར་དང་བརྩེ་བའི་བསླུས་པའི་སེམས་པ་དེ།

ཡང་ཤི་ཡང་སོས་ཀྱི་སྡུག་བསྔལ་ཁྲོད་ནས་རིང་དུ་གྱེས།

རིང་དུ་གྱེས། རིང་དུ་གྱེས་་་་་་་་་་་