རང་ཡུལ་ས་སྐྱ་ཚ་རོང་ལྕང་གཞོངས་ཞེས་པ་ཡུན་རིང་བྲལ་བའི་སེམས་ཀྱི་མེ་ལོང་ངོས་ཀྱི་དྲན་རྟོགས་པད་དཀར་ཆུན་པོ།

ས་ཆེན་གྱི་སྒང་ལ་བཏབ་པའི་རིན་ཆེན་མུ་ཏིག

ཡབ་མེས་ཀྱི་དགོངས་པར་བསྟིམས་པའི་གསེར་གྱི་ཨ་ལོང་།

གནམ་སྔོན་པོར་ཉི་ཟླ་དཀར་གསུམ་མཛེས།

དེའི་གསེབ་ན་སྤྲིན་དཀར་མེ་ལོང་མདོག

རི་མཐོན་པོའི་རྩེ་མོར་དཔྱངས་ཤིང་འགྱིང་།

ཕྱི་ལྷུན་པོ་རྩེ་ཡི་ཀ་བ་སྔར་ནས་འགྱེལ་མོད།

ནང་ཕུ་ནུའི་བློ་གྲོས་དར་ཤིང་བླ་ནས་གསོ་ཆོག

ཨ། ངའི་ཕ་ས།

གངས་ལ་ཉི་མ་ཤར་ན་ཡིད་ལ་རྫིང་ཆུ་འཁྱིལ་བའི་ཕ་ས།

ཡིད་ལ་རྫིང་ཆུ་འཁྱིལ་ན་གདོང་ལ་གངས་མདངས་དོད་པའི་ཕ་ས།

རི་ཀླུང་གི་སྙིང་ལ་ཟུག་པའི་འཇའ་ལུས་མཚར་པོ།

མ་མེས་ཀྱི་པང་ལ་འཁྲུངས་པའི་དངུལ་དཀར་ཆུན་པོ།

ས་དོག་མོར་གྲོ་ནས་སྲན་གསུམ་གང་།

ཆུ་སྔོན་མོ་གཡོན་དུ་དལ་ཞིང་རྒྱུ།

ཕྱོགས་བཞི་བོར་ས་འཛིན་ཕྲེང་བས་བསྐོར།

བར་བར་ན་ཁང་གཞིས་དཀྱིལ་འཁོར་བཟང་།

སྔོན་ལུང་ཆུང་འཚོ་ཚིས་ཀ་རྟེན་ཡེ་ནས་བྲལ་ཡང་

མ་སྲུ་མོའི་ཐབ་ལ་དྲོད་ཁོལ་གྱི་རྩ་བ་སོས་ཡོད།

ཨ། ངའི་ཕ་ས།

སེམས་ལ་རང་ཡུལ་འཁོར་ན་ཞེ་ལ་ཁྱུང་དཀར་འཁོར་བའི་ཕ་ས།

ཞེ་ལ་ཁྱུང་དཀར་འཁོར་ན་ངག་ལ་རྨོས་གླུ་བསྐྱིལ་བའི་ཕ་ས།