དམིགས་ཡུལ་གྱི་ཆེད་དུ་གཤོག་པ་བསྣད་པ་ཐེངས་གཅིག་མིན་ཡང་།

སྒྱུ་མའི་མུན་འོབས་ནས་སྣང་བ་འཚོལ་བའི་གོམ་ཁ་ལྷོད་མ་མྱོང་།

ལམ་ལ་ཆས་ཐེངས་གང་མང་ཞིག་ལ།

སྡིག་སྒྲིབ་འཁོར་བའི་ཐ་སྙད་ག་ཚོད་ཅིག་རླུང་ལ་བསྐུར་ཡོད།

མིག་འབྲས་གཉིས་ཀ་གཙང་མར་བྱས་ཏེ།

རྨི་ལམ་གྱི་མཁའ་དབྱིངས་ནས་ཡང་ཡང་ལྡིང་སྐོར་བྱས།

གཤོག་ཟུང་གི་སྒྲོ་སྤུ་ཟད་པར་ཞེད་ཀྱིན།

ཡབ་མེས་ཀྱི་རྒྱང་སྐྱོད་སྙིང་སྟོབས་གང་དུ་བཙལ་ཀྱང་།

རླུང་གི་གཤོག་པས་གང་སར་ཁྱེར་བའི།

ཡབ་མེས་ཀྱི་སྒྲོ་སྤུ་ཙམ་ཡང་།

ལ་ལུང་གང་དུའང་བཞག་མེད་དོན་ཅི།

བྲག་ཐེམ་གང་ནའང་གཡུགས་མེད་དོན་ཅི།

ཁྱོད་ཀྱིས་གཟབ་ནན་གྱིས་འཚོལ་དགོས།

གཟབ་ནན་གྱིས་འཚོལ་བ་ནི་ཁྱོད་ལ་བཞག་པའི་བགོས་སྐལ་ཉག་གཅིག་གོ།

རྩོམ་སྒྲིག་པ། མགར་རྒྱལ་སྲས།