སྤང་མཐའ་མེད་ཨ་ལོང་ཁུག་གི།

མདོག་དཀར་དམར་མེ་ཏོག་སྟེང་ལ།།

གཡུ་སྦྲང་མས་མཆུ་འདབ་སྦྱར་ན།།

རྟ་འདོ་བའི་བྱང་ལམ་མེད་རུང་།།

ཞེ་སྣང་མཐུན་མཛའ་མོའི་ཕྱོགས་ལ༎

རྒྱུག་གོམ་པས་གཅད་ན་སྙམ་བྱུང་།།

མཚོ་དྭངས་མོ་མེ་ལོང་ཁུག་གི།

རླབས་ཕྲེང་བའི་བང་རིམ་ནང་ལ།།

ཉ་གསེར་མིག་རང་འཁྱིལ་བྱས་ན།།

རླུང་བསེར་བུའི་རྒྱུ་རྩལ་མེད་རུང་།།

ཞེ་སྣང་མཐུན་མཛའ་མོའི་ཕྱོགས་ལ༎

དུས་མྱུར་མོར་རྐྱལ་ན་བསམ་བྱུང་།།

ནགས་རྒྱ་རྫོང་ཚང་ཚིང་ཀློང་ནས།།

ཤིང་གསོམ་དཀར་ལྕུག་ཕྲན་སྟེང་ལ།།

བྱིའུ་འཇོལ་མོས་གསུང་དབྱངས་སྒྲོག་ན།།

སྙན་ཚངས་པའི་དབྱངས་འགྲོས་མེད་རུང་།།

ཞེ་སྣང་མཐུན་མཛའ་མོའི་ཕྱོགས་ལ༎

ཡིད་འགུག་པའི་གཞས་ཤིག་བསྐུར་འདོད།།

མཚོ་སྔོན་པོ་གཡུ་ཡི་གཞོངས་ཀྱི།།

བྱ་འདབ་ཆགས་བརྒྱ་ཚོགས་ཁྲོད་ནས༎

བྱ་ངང་ངུར་མཚོ་ནས་ཆགས་ན།།

དུང་བརྩེ་བའི་རྣམ་འགྱུར་མེད་རུང་།།

ཞེ་སྣང་མཐུན་མཛའ་མོ་མཉམ་དུ༎

ལུས་གྲིབ་གཟུགས་གཤིབ་ན་བསམ་བྱུང་།།

དགུང་མཐོན་མཐིང་ཨ་སྔོན་དབྱིངས་ཀྱི།།

མཛེས་རྒྱུ་སྐར་སྟོང་འདུས་ཁྲོད་ནས༎

འོད་གསལ་ལེའི་ཉི་ཟླ་འཛོམས་ན།།

ཚ་ལམ་ལམ་དྲོད་ཅིག་མེད་རུང་།།

ཞེ་སྣང་མཐུན་མཛའ་མོ་མཉམ་དུ༎

ཤ་མཆིན་པ་ལན་གཅིག་གླན་འདོད།།

དབྱངས་གསལ་བྱེད་ཕྲེང་བའི་རྒྱུན་ནས།།

སེམས་ཡ་ཆུང་དམར་པོའི་སྟེང་གི།

དྲན་གདུང་འབོད་གསང་མཐོར་སྒྲོག་ན།།

ཡིད་མཛའ་མོས་མཐོང་ཐོས་དབེན་རུང་།།

ཐག་རྒྱང་རིང་སྙིང་སྡུག་ཕྱོགས་ལ།།

ངས་དྲན་པའི་ཚིག་གསུམ་བསྐུར་འདོད།།