རྩོམ་རིག་གྱི་ཆུ་ཀླུང་བྲུག་ཞིང་།།

ཕོ་གསར་གྱི་རུས་པ་ཆགས་སའི།།

བདེ་སྐྱིད་ཀྱི་སྐྱ་རེངས་བསུ་བའི།།

འུ་ཅག་གི་དཀར་མཛེས་ཚགས་པར།།

དབྱངས་གསལ་གྱི་རྣམ་ཤེས་སྦྲུམ་ཞིང་།།

ན་གཞོན་གྱི་རྨི་ལམ་སྒུལ་བའི།།

ཕ་སྐད་དང་མ་ཡིག་འཕྱུར་སའི།།

རེ་སྨོན་གྱི་དཔྱིད་ཀ་ཆུང་ཆུང་།།

ཤེས་རབ་ཀྱི་ཁྲབ་རྨོག་གྱོན་པའི།།

རྩོམ་པོ་ཡི་ཆགས་སྡང་བྱོ་ས།།

འཆར་ཡན་གྱི་རྟ་ཕོ་འདྲོགས་སའི།།

སྒྱུ་རྩལ་གྱི་གངས་ཐང་རིང་མོ།།

མཐོ་སྒང་གི་མཛེས་སྡུག་མཐའ་དག།

གྲོང་གསེབ་ཀྱི་འདུ་འཛི་སྣ་ཚོགས།།

ཚོར་སྣང་གི་ཕྱི་ནང་འབབ་ས།།

གླུ་ངག་གི་ཕྱེ་མའི་ཐང་ཆེན།།

སྙན་ངག་གི་ལན་བུ་བསླ་སའི།།

བློ་རིག་གི་རྣམ་དཔྱོད་འབར་སའི།།

ལོ་རྒྱུས་ཀྱི་ལུག་ཁྱུ་ཞོགས་ས།།

རྒས་མེད་ཀྱི་ཞིང་ས་གཤིན་པོ།།

ཁོ་བོ་ཡི་ལོ་ཟླ་དག་གི།

སྐྱིད་སྡུག་གི་མཆི་མ་བཞུར་ས།།

སེམས་རྒྱབ་ཀྱི་ཕུག་འདུན་བཤད་ས།།

ཡིད་འདྲིས་ཀྱི་དགའ་མ་གཅིག་ཡིན།།