ཁྱེད་རང་རླུང་བུ་ཞིག་ཡིན་ན།

ཕྱི་གསལ་ནང་གསལ་ཞིག་ཡིན་ངེས།

ངའི་སྐྲ་ལོ་དང་སེམས་པ་སྒུལ་བའི་གོ་རིམ་དེ་ཡང་།

ངས་ཁྱེད་ལ་བྲིས་མྱོང་བའི་སྙན་ཚིག་རྐང་གཅིག་བཞིན།

ཕྱི་གསལ་ནང་གསལ་ཞིག་ཡིན་ངེས།མི་ལོ་གཉིས་ཀྱི་ཡར་སྔོན་ལ།

ངས་དེ་ལྟར་བསམ་མྱོང་།

ཡིན་ནའང་ཁྱེད་རང་མ་གཞི་ནས་རླུང་བུ་ཞིག་ཡིན་འདུག

ངའི་སྐྲ་ལོ་དང་སེམས་པ་སྒུལ་བའི་གོ་རིམ་དེ་ཡང་།

རླུང་བུ་ཞིག་རྒྱང་ལ་གཡུག་ཞོར་བཞག་པའི་དྲན་ཤིང་ཙམ་ཞིག

ཁྱེད་རང་ཆུ་མིག་ཅིག་ཡིན་ན།

དྭངས་གཙང་ལྷད་མེད་ཅིག་ཡིན་ངེས།

ངའི་བརྩེ་བ་དང་བྲང་གཞོང་བརླན་པའི་གོ་རིམ་དེ་ཡང་།

ངས་ཁྱེད་ལ་བཤད་མྱོང་བའི་སེམས་གཏམ་ཚིག་གཅིག་བཞིན།

དྭངས་གཙང་ལྷད་མེད་ཅིག་ཡིན་ངེས།

མི་ལོ་གཅིག་གི་ཡར་སྔོན་ལ།ངས་དེ་ལྟར་བསམ་མྱོང་།

ཡིན་ནའང་ཁྱེད་རང་མ་གཞི་ནས་ཆུ་མིག་ཅིག་ཡིན་འདུག

ངའི་བརྩེ་བ་དང་བྲང་གཞོང་བརླན་པའི་གོ་རིམ་དེ་ཡང་།

ཆུ་མིག་ཅིག་རྒྱང་ལ་བཞུར་ཁར་བཞག་པའི་རྨ་ཁ་ཙམ་ཞིག