རིག་པ་གོམས་པར་བྱེད་པའི་རྒན་ལ། །

ཤེས་བྱ་རིག་པའི་རྣམ་དཔྱོད་ལྡན་ཡོད། །

དཀའ་སྡུག་རླབས་རྩེར་སྤོབས་པས་འགྲེང་ཡོད། །

སློབ་བུ་སྐྱོང་བའི་བྱེད་པོ་མཆོག་ཡིན། །

བྱམས་བརྩེ་དྲོན་མོའི་ཉིན་བྱེད་ཤར་ནས། །

ལེགས་བཤད་སྦྲང་ཆར་ཟམ་ཟིམ་འཇོ་བྱུང་། །

བློ་དམན་བདག་ཡིད་ཞིང་ས་བྲན་ནས། །

སྣ་ཚོགས་ཤེས་བྱའི་མྱུ་གུ་འབུས་སོང་། །

འབྱམས་ཀླས་མཁའ་ལ་འགྲན་པའི་ཐུགས་ངོར། །

ཐམས་ཅད་ཤེས་བྱ་རྒྱུ་སྐར་ལྟར་བཀྲ། །

བྱམས་དང་བརྩེ་བའི་ཐུགས་རྒྱུད་ཡངས་མོ། །

ཉི་འོད་ཇི་བཞིན་ས་གཞིར་ཁྱབ་སོང་། །

དུས་རབས་སྲས་མོ་ཁབ་ཏུ་བཞེས་ཏེ། །

བློ་དམན་བདག་སོགས་བུ་བཞིན་བསྐྱངས་ཤིང་། །

ཤེས་བྱའི་རྒྱགས་བྲོ་རུམ་ལ་བཅུག་ནས། །

ཚན་རྩལ་རིག་པའི་ལམ་དུ་མངགས་བྱུང་། །

ལྷུག་རྩོམ་འཕྱོར་གོས་ལུས་ལ་སྤྲས་ཡོད། །

སྙན་རྩོམ་རིན་ཆེན་མགུལ་ལ་སྒྲོན་ཡོད། །

དབྱིན་ཡིག་སྤྱན་ཤེལ་གདོང་ལ་མནབས་ཡོད། །

གངས་འདབས་ན་མཉམ་ཡིད་སྨོན་ཤོར་སོང་། །

འཕགས་བོད་སྔོན་བྱུང་ལོ་པཎ་རྣམས་ཀྱི། །

གཞུང་ཆེན་པོ་ཏི་རྒྱ་མཚོའི་ཀློང་ལ། །

བརྩོན་པའི་གྲུ་གཟིངས་རྟག་ཏུ་འཇུག་པས། །

ཤེས་རིག་ནོར་བུའི་གླིང་ལ་སླེབས་སོང་། །