མངོན་གྱུར་རྟགས་ཀྱི་བདེན་པ་ངོ་སྤྲད་ཀྱང་། །
ངམ་གནག་བཞིན་གྱི་གཉེར་མ་མི་སངས་པ། །
མདོར་ན་ཕྲག་དོག་ཅན་གྱི་སྐྱེས་བུ་དེའི། །
དགའ་བའི་དངོས་པོ་གཞན་གྱི་རྒུད་པ་ཉིད།།
ཕྲག་དོག་ཁྲག་གིས་མྱོས་པའི་ཨུ་ཚུགས་སྟག།
འཇིགས་པའི་ང་རོ་སྒྲོག་པའི་ཚང་ཚིང་ན། །
གཅིག་པུར་ལུས་པའི་བདེན་པའི་བུ་ཆུང་ལ། །
ཤེས་རབ་ཅན་གྱིས་སྙིང་རྗེའི་ཡུལ་དུ་དགོངས། །
བླུན་པོ་རང་གི་རྗེས་སུ་མི་འབྲང་ཡང་། །
རང་ཉིད་བླུན་པོའི་རྗེས་སུ་མི་འབྲང་བ། །
དེ་ནི་མཁས་པའི་དམ་ཚིག་དང་པོ་སྟེ། །
སྲོག་ལ་བབས་ཀྱང་འབད་པས་སྲུང་བར་གྱིས།།
སིངྒ་ལ་ཡི་གནས་བརྟན་སྡེ་པ་དང་།།
གངས་རིའི་ཁྲོད་ཀྱི་ཡོད་པར་སྨྲ་བ་གཉིས། །
སྟོན་པ་གཅིག་གིས་བསྐྱངས་པའི་སློབ་མ་སྟེ།།
བཅོ་བརྒྱད་སྡེ་པ་ནུབ་པའི་ལྷག་མ་ཉིད། །