ནུབ་ཁའི་མཚམས་སྤྲིན་མཁའ་མཐར་བརྒྱན་ཅིང་བསམ་གཞིག་མཚོ་མོའི་ཀློང་ལ་བསྐྱལ།།
མི་རྟག་འཁོར་བའི་རང་བཞིན་གྱིས་ནི་མཚན་ཐུན་རྨི་ལམ་བརྐུས་ནས་སོང་།།
སྐྱོ་བས་མནར་བའི་ངལ་དུབ་ཀློང་གི་སེམས་པ་སྐྱ་མོའི་འོ་དོད་འདི།།
འཇགས་པའི་ཐབས་ཤིག་བསྐལ་བའི་བར་དུ་འཇིག་རྟེན་འདི་ན་མཆིས་ལགས་སམ།།
རང་ལ་ཅི་མཁོ་ཧམ་པའི་སྒོ་མོ་ཤེད་ཤུགས་བཀོལ་ན་འབྱེད་བདེ་ཟེར།།
གཞན་གྱི་མི་འདོད་ཟོལ་འཛུམ་བཅོས་མ་བཙན་གྱིས་བསྟན་ལ་བཟང་རབ་ཟེར།།
རང་གཞན་ཀུན་ལ་གནོད་པའི་སྦྲིད་སྨན་ཡིད་ཀྱི་ཞིང་སར་བཏབ་འདི་སྐྱོ།།
ཀྱེ་མ་སྡུག་གི་མུན་པ་འཇོམས་པའི་ཉིན་བྱེད་རིང་ནས་འཆར་བར་ཤོག།
སྤྱི་དོན་རེད་ཅེས་མིག་ཅེར་ཁ་གདངས་མི་ཐུབ་མི་ནུས་མི་བསྒྲུབ་ཟེར།།
སྒེར་དོན་ཡིན་ཞེས་མགོ་བོ་ཀྲོག་ཀྲོག་ལོས་ཐུབ་ལོས་ནུས་ལོས་བསྒྲུབ་ཟེར།།
དོན་དུ་སྤྱི་སྒེར་གཉིས་ལ་བཟུང་བའི་རྣམ་འགྱུར་མི་གཅིག་འདི་ཀོ་ཅི།།
ཨ་ཧོ་དོན་ཀུན་བསྒྲུབ་ལ་གཞོལ་པའི་སྐྱེས་བུ་དམ་པ་འཁྲུངས་པར་ཤོག།
ཕར་ལ་འགྲོ་དུས་འཁོར་བ་འདི་ལ་ར་རི་དྲི་མས་སྦགས་ཡོད་ཟེར།།
ཚུར་ལ་འོང་དུས་འཁོར་བའི་འགྲོ་བར་འདོད་སྲེད་ནག་ནོག་གོས་ཡོད་ཟེར།།
ཕར་ཚུར་འགྲོ་འོང་ཚིགས་མལ་རེ་ན་རྣམ་ཤེས་འདི་ཡང་འཕུར་ལ་ཁད།།
ཀྱི་ཧུད་ངེས་དོན་རྟེན་འབྲེལ་ལྟ་བའི་འོད་གསལ་རང་བཞིན་འཐོབ་པར་ཤོག།
དབུལ་པོས་མི་གླེང་ཕྱུག་པོས་བསམས་ཏེ་བསམ་པའི་འཁྱེར་སོ་འདི་ཡིན་ཟེར།།
ཕྱུག་པོས་མི་དྲན་དབུལ་པོས་རྟོགས་ཏེ་སེམས་པའི་ལོངས་སྤྱོད་གན་རེད་ཟེར།།
དབུལ་ཕྱུག་མཐོ་དམའི་ཁྱད་པར་བར་ནས་བསམ་བློའི་འགལ་བ་ལྟག་སྤྲོད་པ།།
ཨ་ཙི་ཞི་བའི་གནས་ལ་གོམས་པར་སྨན་པའི་ཐབས་ཇུས་ལྡན་པར་ཤོག།
ཕྱི་ཡི་མི་ཁའི་ཕྲག་དོག་མདའ་མོ་སྙིང་ལ་བསྣན་པས་ན་རབས་ཟེར།།
ཕྱི་ནང་མནར་གཅོད་བསྲན་ཐབས་བྲལ་བས་མཆི་མ་ཆུ་བོའི་ཟོལ་ཏུ་འབབ།།
ཀྱི་ཧུད་སྡུག་བསྔལ་མུན་པའི་ཞིང་ཁམས་གསལ་བའི་སྒྲོན་མེ་གནང་བར་ཤོག།