མེས་པོའི་ཕྱག་རྒྱུན་སྦྲང་དཀར་རྩམ་པ་དང་། །
ལག་ཤེས་བཟོ་རྩལ་བོད་ཆས་སྣམ་བུའི་རིགས། །
བརྡ་སྤྲོད་ཚད་ལྡན་བོད་ཀྱི་སྐད་ཡིག་ལ། །
མི་རིགས་གཞན་གྱི་སྐུ་མགྲོན་བློ་ཁ་ཕྱོགས། །
 
ཐག་རིང་ངལ་བར་མ་འཛེམས་ས་མཐོར་བྱོན། །
མཛེས་པའི་རི་ཀླུང་ཀུན་ལ་ལྗོངས་རྒྱུར་ཕེབས། །
སྔོ་ལྗང་ཟས་རིགས་སྣ་ཚོགས་ལོངས་སུ་སྤྱོད། །
བསྔགས་བརྗོད་མཐེ་བོང་གྱེན་ལ་བསྒྲེངས་འདི་རྨད། །
 
ཁ་བའི་ཡུལ་ན་འཚོ་བའི་གཞོན་སྐྱེས་ཚོ། །
ཁ་བ་ཅན་གྱི་གོམས་གཤིས་ཟས་གོས་དང་། །
མེས་པོའི་ཤུལ་བཞག་སྲོལ་རྒྱུན་རིག་གནས་ལ། །
སྣང་མེད་མཐོང་ཆུང་བྱས་ན་ངོ་རེ་ཚ། །
 
བཅུད་ལྡན་བོད་ཟས་སྐུ་ཁམས་བདེ་བའི་རྒྱུ། །
སྣམ་བུ་དར་ཕྲུག་དྲོ་སྐྱིད་འབྱུང་བའི་གཞི། །
ཡ་རབས་གོམས་གཤིས་ཀུན་གྱི་རྒྱན་ཆ་ལགས། །
སྣང་མེད་རིང་དུ་མ་འདོར་གཞོན་སྐྱེས་ཚོ། །