བྱས་ལས་དེའི་དབང་གིས།
ཁྱོད་སྔ་མོ་ནས་བདུད་རྒྱལ་དུ་བརྩིས་ཤིང་།
རྟོག་བཏགས་ཀྱིས།
ཁྱོད་ཀྱི་དབུ་ལ་གླང་རྭ་ཞིག་ཀྱང་བཙུགས་ཟིན།
 
གཤེགས་ཁ་མར།
ཡང་ན་ལོ་གསུམ་གྱིས་སྔས་སོང་ལ།
ཡང་ན་ལོ་གསུམ་གྱིས་འཕྱིས་གསུངས་པ།
དཔྱོད་ཤེས་ཀྱི་བསྡུས་ཚིག་ཅིག་ཡིན་ཚུལ།
ངས་ཁོ་ཚོར་ཇི་ལྟར་འགྲེལ་ཨང་།
 
མདའ་མོ་གཅིག་གིས།
ཁྱོད་སྐྱོ་ལྷང་ངེར་ཕྱི་མར་བརྫངས་པ་ནས།
འོད་སྲུངས་དང་ཡུམ་བརྟན་གྱི་མཇུག་མ་རིང་མོས།
གངས་ཁྲོད་ལ་ས་རྡུལ་རྐྱང་རྐྱང་གཏིབས་པས།
ལོ་རྒྱུས་ཀྱི་ཆུ་བོ་རྩ་ནས་རྙོག་སོང་ལ།
ཁོད་ཡངས་པའི་མདུན་ལྗོངས་ཀྱང་།
ཡོངས་སུ་སྐྱ་བོར་བཏང་སོང་།