མཛེས་སྡུག་གི་དར་རྩེ་མདོ་ལ་རིང་མོར།
ཚ་བ་མེ་དྲོད་ཀྱིས་ཟུག་གཟེར་སྐྱེལ་དུས།
ཡབ་ཆེན་ཚོས་རི་གསུམ་མགོ་ནས་ཡར་དཀོན་མཆོག་ལ་ལྷ་གསང་བཏང་ཞིང་།
སྨོན་འདུན་གྱི་རླུང་རྟ་མཐོ་བའི་དབྱིངས་ལ་སྤུར།
ཡུམ་ཆེན་ཚོས་ལུང་གསུམ་མདོ་ནས་མར་ལྷ་ཀླུ་ལ་སྨོན་ལམ་བརྒྱབ་ཅིང་།
བཅོལ་གདམས་ཀྱི་འོ་ཇའི་མཆོད་ཁ་ཐེངས་གསུམ་མཆོད།
ང་ཚོས་ཀྱང་།   ནུས་ཟད་འུ་ཐུག་གིས་རྔུལ་ཁྲག་མོད་པོ་བཏོན་མྱོང་།
གང་ལྟར།   ད་ནི་ང་ཚོའི་སྐྱབས་མགོན་ལྟ་བུའི་གནམ་རྒན་མས།
གོད་ཆག་ཐེབས་པའི་དར་རྩེ་མདོ་ལ་རིང་མོའི་ངུ་སྐད་ཐོས་བ་ཡིན་ནམ།
མཁའ་རུ་ཟུག་པའི་མེ་ལྕེ་ཡིས་ཚྭ་དྲོད་དེ་ཚོར་སོང་བ་རེད།
ཡང་ན།  མཁའ་རུ་ཟུག་པའི་དུ་སྨུག་གི་མཐོང་ལམ་བཀག་སོང་པ་ཡིན་ནམ།
འགྲོ་བ་ཡོངས་ཀྱིས་མེ་སྐྱོན་འགོག་པའི་སྤྱོད་ཚུལ་གྱིས།
སེམས་འགུལ་ཐེབས་པ་རེད།
གང་ལྟར།  དེ་རིང་ཁ་བ་བབས་བྱུང་།
དར་རྩེ་མདོ་ལ་རིང་མོའི་འཕང་བ་རུ་ཤུགས་ཀྱིས་བབས་བྱུང་།
ཁ་བ་བབས་པའི་བཀྲ་ཤིས་ཉིན་མོ་འདིར།
སྐོམ་གདུང་གི་མནར་བའི་མི་སེམས་རེ་རེར།
དགའ་བ་དང་དགོད་སྒྲས་ཁེངས་ཤིང་།
ཡུལ་མི་ཚོར་སྔར་མེད་ཀྱི་བློ་སྤོབས་དང་ཡིད་ཆེས་བསྩལ་བྱུང་།
ས་གཞི་ལ་སྔར་མེད་ཀྱི་ལང་ཚོ་དང་གསོན་ཤུགས་གནང་བྱུང་།
འདི་ནི་ལྷ་ཚོགས་ཀྱིས།
ཡུལ་ཁམས་འདིར་གནང་བའི་དངོས་སྒྲུབ་མ་ཡིན་ནམ།
འདི་ནི་གནམ་རྒན་མས།
ཡུལ་གྲུ་འདིར་ཕུལ་བའི་གནམ་ལོ་གསར་བའི་ལེགས་སྐྱེས་མ་ཡིན་ནམ།