ནམ་རྒྱུན་སྤྱི་ཚོགས་ཁྲོད་དུ།།
    གཞན་ལ་སློབ་གསོ་ཐེབས་པའི།།
    སྐད་ཆ་བཤད་འདོད་ཡོད་ཀྱང་།།
    སྤྱི་ཚོགས་ཉམས་མྱོང་མེད་པས།།
    བདག་གིས་བཤད་པའི་སྐད་ཆར།།
    གཞན་གྱིས་གདེང་འཇོག་མ་ཐོབ།།
    ནམ་རྒྱུན་སློབ་གྲྭའི་ནང་ནས།།
    སློབ་མར་སློབ་གསོ་ཐེབས་པའི།།
    རྩོམ་ཡིག་འབྲི་འདོད་ཡོད་ཀྱང་།།
    རང་གི་སྤྱོད་པ་གཙོག་པས།།
    སློབ་གསོ་ཐེབས་པའི་རྩོམ་ཡིག།
    འབྲི་བར་ངོ་རེ་ཚ་བྱུང་།།
    ནམ་རྒྱུན་བགྲོ་གླེང་ཁྲོད་དུ།།
    སློབ་གྲོགས་གཞན་པ་ཚོ་དང་།།
    བསམ་བློ་བརྗེ་འདོད་ཡོད་ཀྱང་།།
    སྐད་ཆའི་སྒྱུ་རྩལ་མེད་པས།།
    བཤད་འདོད་ཡོད་པའི་སྐད་ཆ།།
    ཁོག་པའི་ནང་ནས་རུལ་སོང་།།
    སློབ་ལ་བརྩོན་འདོད་ཡོད་ཀྱང་།།
    སློབ་སྦྱོང་བྱེད་ཐབས་མ་ཤེས།།
    འཆར་གཞི་འགོད་ཐབས་མ་འགྲིག།
    སློབ་ལ་བརྩོན་པ་བྱས་ཀྱང་།།
    འབྲས་བུ་སྤུ་ཙམ་མ་ཐོབ།།
    ཡིད་ཆེས་གཏིང་ནས་ཟད་ཐལ།།