འཇང་རི་སྨུག་པོ་དང་རྗེས་སུ་འབྲེལ་བའི་སི་ཏུ་ཆོས་ཀྱི་འབྱུང་གནས་འཇང་དུ་ཕེབས་ཐེངས་གསུམ།

ཀརྨ་རྒྱལ་མཚན་གྱིས་བསྡུས། 2016-05-23

སི་ཏུ་ཆོས་ཀྱི་རྒྱལ་མཚན་ཕྱི་མ༼༡༥༧༦―༡༦༥༧༽ལ་ཀརྨ་པ་དབང་ཕྱུག་རྡོ་རྗེས་བརྙེན་རྫོགས་མཛད།གོ་ཤྲཱིའི་ལས་ཀ་དང་ཤེལ་ཐམ།ཞྭ་དམར་སོགས་གནང་།མདོ་སྨད་དུ་བྱོན་ནས་ཀཾ་པོ་གནས་ནང་ཞིག་གསོ་མཛད།འཇང་ས་ཐམ་རྒྱལ་པོ་མི་ཕམ་བསོད་ནམས་རབ་བརྟན་གྱིས་སྤྱན་དྲངས་ཏེ་བསྙེན་བཀུར་རྒྱ་ཆེན་བསྟབས།རྒྱལ་པོས་ད་ནས་བཟུང་ངེད་རྒྱལ་བུ་རིམ་བྱུང་ནས་ཁྱེད་སི་ཏུ་ན་རིམ་དབུར་སྤྱི་བོར་བཀུར་བའི་རྩ་བའི་བླ་མ་བྱེད་རྒྱུ་ཡིན་པ་དང་།ཁྱེད་སི་ཏུ་ན་རིམ་ནས་ཀྱང་ངེད་རྣམས་ཐུགས་རྗེའི་མངའ་འོག་ནས་མ་དོར་བ་མཁྱེན་ཅེས་གསུངས་ཏེ་འབྲས་ཞིང་དང་སྡེ་དུད་མང་པོ་གནང་བ་ནས་བཟུང་འཇང་རྒྱལ་པོས་སི་ཏུ་ན་རིམ་དབུ་བླར་སུ་བསྐོས་ཏེ་ཕྱིས་སུ་སི་ཏུ་ན་རིམ་འཇང་སུ་ཕེབས་ཏེ་དགོན་སྡེ་གསར་བཙུགས་དང་ཆོས་འབྲེལ་གྱི་ཟམ་ལམ་རྒྱ་ཆེར་སྤེལ་ཏེ་འཇང་དུ་ཀར་དགོན་བཅུ་གསུམ་ཡོད་པར་གྲགས།

དེའང་སི་ཏུ་ཆོས་ཀྱི་འབྱུང་གནས༼༡༦༩༩―༡༧༧༤༽ལ་གར་དབང་ཐམས་ཅད་མཁྱེན་པ་ནས་ཐེག་ཆེན་ཤིང་རྟ་གཉིས་ཀྱི་ལམ་སྲོལ་མ་འཁྲུལ་པར་སོ་སོར་སྐྱོང་དགོས་ཚུལ་དང་།ཤར་ཕྱོགས་སྤུངས་རི་དང་ཀཾ་པོ་གནས་ནང་དུ་ཕེབས་ནས་སྙིང་པོའི་བསྟན་པའི་རྟེན་འབྱུང་བསྒྲིགས་དགོས་ཚུལ་གྱི་གསུང་ཤོག་རིམ་པ་ཕེབས་པ་ལྟར།རྗེ་ཉིད་ས་བྱ༼སྤྱི་ལོ༡༧༢༩༽ལོར་འཇང་ཕྱོགས་སུ་ཕེབས་ཐེངས་དང་པོ་དང་།ས་རྟ༼སྤྱི་ལོ༡༧༣༨༽ལོར་འཇང་ཕེབས་གཉིས་པ།ས་སྟག༼སྤྱི་ལོ༡༧༥༨༽ལོར་འཇང་ཕེབས་ཐེངས་གསུམ་པ་སྟེ་སྔོན་རྗེས་སུ་ད་ལྟའི་ཡུན་ནན་བདེ་ཆེན་རང་སྐྱོང་ཁུལ་དང་།ལི་ཅང（丽江ས་ཁུལ།ཏཱ་ལི（大理）གྲོང་ཁྱེར།རི་བོ་བྱ་རྐང་སོགས་སུ་ཕེབས་ཏེ་དགོན་སྡེ་གསར་འདེབས་དང་།དབང་བཀའ་ཆོས་འབྲེལ་སོགས་ཀྱིས་བུ་སློབ་བསྐྱངས་ཏེ་བསྟན་པ་སྤེལ་ཞིང་འགྲོ་དོན་རྒྱ་ཆེན་མཛད།ལི་ཅང་གྲོང་ཁྱེར་གྱི་ཉེར་ཕྱོགས་དེང་སང་མངོན་སུམ་མཐོང་ཐོས་སུ་ཡོད་པའི་དགོན་ཁག་ལྔ་ལས།ཕེབས་ཐེངས་དང་པོའི་སྐབས་དེང་ལི་ཅང་གྲོང་ཁྱེར་གྱི་ནུབ་ཕྱོགས་སྤྱི་ལེ་བཅོ་བརྒྱད་ཙམ་གྱི་ལ་གཤིས（拉市）སུ་ཕེབས་ཏེ་སྔོན་ཀླ་ཕི་དམ་པས་སྒྲུབ་ཆུ་བཏོན་སའི་གཏེར་ཕུག་ཡོད་ས་དགོན་པ་བཏབ་ན་འགྲོ་དོན་ཆེན་པོ་ཡོད་ཅེས་གསུངས་ཏེ་ས་སློང་མཛད་ནས་ངེས་དོན་ཕུན་ཚོགས་གླིང་ཞེས་པའི་དགོན་པ་ཕྱག་བཏབ།དེ་དུས་འཇའ་འོད་དཀར་པོ་ཤར་སར་མཛུབ་རྩེས་བསྟན་པས་ཀུན་གྱིས་མཇལ།རྒྱ་སྐད་དུ་འདིའི་དོན་ལྡན་པའི་དགོན་མིང་ཀྲིའི་ཡེན་ཟི（指云寺）ཞེས་པ་ད་བར་ཆགས་ཡོད།དེ་ནས་རྗེ་ཉིད་ཀྱིས་སྔ་རྗེས་སུ་གསང་སྔགས་དགའ་ཚལ་གླིང་（文峰寺）དང་།འོག་མིན་རྣམ་གྲོལ་གླིང་།（福国寺）བཀྲ་ཤིས་ཕུན་ཚོགས་གླིང་།（玉峰寺）ཐར་པའི་ལག་འཛིན་གླིང་།（普济寺）ཐེག་ཆེན་དར་རྒྱས་གླིང་།（兴化寺）བཀྲ་ཤིས་དགའ་ཚལ་གླིང་（林昭寺）སོགས་གསར་བཞེངས་ལ་རབ་གནས་དང་བཅའ་བཀོད།གང་ལ་གང་འཚམས་ཀྱི་དབང་ལུང་མན་ངག་འདུས་སྡེ་ལ་རྒྱུ་འབྲས་སྤང་བླང་སོགས་ཀྱིས་བསྟན་འགྲོའི་འཕྲིན་ལས་དབྱར་མཚོ་ལྟར་རྒྱས་པ་མཛད།རྗེ་ཉིད་ཀྱིས་འཇང་ཕྱོགས་དགོན་སྡེ་དང་མི་དཔོན་བླ་དྲག་སོགས་ལ་ཕུལ་བའི་སྨོན་ལམ་དང་།ཞབས་བརྟན།འབུལ་ཡིག ཡུལ་ཕྱོགས་ཀྱི་གཞི་བདག་ཆོས་སྐྱོང་རྣམས་ལ་འཕྲིན་བཅོལ་དང་།བསང་ཡིག ས་ཐམ་རྒྱལ་པོས་རྒྱ་སྐད་དུ་བརྩམས་པའི་སྒྲོལ་མའི་བསྟོད་པ་བོད་སྐད་དུ་བསྒྱུར་བ།ཤ་ཝ་ལེགས་མཛད་ལས་རྒྱ་ཡི་སྨན་སྦྱོར་འགའ་རེ་གསན་པའི་ཟིན་བྲིས་བཅས་རྗེ་ཉིད་ཀྱི་བཀའ་འབུམ་དཔལ་སྤུངས་པར་མའི་ནང་དུ་གསལ་བ་ལས།དཔེ་མཚོན་ཙམ་ཞིག་བཀོད་པ།དཔེར་ན།

༄།། འཇང་རི་སྨུག་པོ་ལ་ཉེ་བར་བརྟེན་པའི་ལྷ་སྲུང་རྣམས་ཀྱི་གསོལ་མཆོད་བསངས་སོགས་ཀྱི་ཞར་དུ་བགྱིད་པར་སྤྲོ་ན།རང་ཉིད་ལྷར་གསལ་མདུན་དུ་སྟོང་ཉིད་ཀྱི།།ངང་ལས་འགགས་མེད་རྟེན་འབྱུང་མཆོད་པའི་སྤྲིན།།རོ་མཆོག་བརྒྱ་ལྡན་བཟའ་བཅའ་ལྡག་གཞིབ་ཀྱི།།གཏོར་མའི་ཚོགས་དང་འདོད་ཡོན་རྒྱ་མཚོ་འདི།།གནས་མཆོག་འདི་དང་ཡུལ་འདིར་གནས་པ་ཡི།།བླ་མ་ཡི་དམ་རྒྱལ་བའི་དཀྱིལ་འཁོར་དང་།།རྡོ་རྗེའི་ཆོས་སྲུང་དཔའ་བོ་མཁའ་འགྲོ་དང་།ཕྱོགས་སྐྱོང་ཞིང་སྐྱོང་ཡུལ་ལྷ་གཞི་བདག་ལ།།རབ་ཏུ་དྭངས་བའི་ཡིད་ཀྱིས་འབུལ་བར་བགྱི།།འཇིག་རྟེན་འདས་དང་མ་འདས་ཡོན་ཏན་གྱི།། སྤྲིན་ཕུང་ཚར་་དུ་དངར་བས་ཆོས་དབྱིངས་ཀྱི།། ནམ་མཁའ་རྒྱས་པར་འགེངས་པའི་ངོ་མཚར་ལ།།དགའ་བས་བསྔགས་པའི་མེ་ཏོག་ཅི་ཡང་འཐོར།།དེས་ན་མཆོད་པའི་ཡུལ་རྣམས་ཐུགས་བརྩེ་བས།།དཔལ་ལྡན་བླ་མའི་ཞབས་པད་བརྟན་དང་།།ཀརྨའི་བཀའ་བརྒྱུད་དར་ཞིང་རྒྱས་པ་དང་།།བདག་ཅག་དཔོན་སློབ་སྦྱིན་བདག་བཅས་པ་ཡིན།།ནད་གདོན་བགེགས་ཞི་ཚེ་དཔལ་འབྱོར་པ་རྒྱས།།གྲུབ་གཉིས་དབང་འདུས་དགྲ་འདྲེ་གནོད་བྱེད་ཐུལ།།མདོར་ན་བསམ་ཀུན་ཡོངས་སུ་གྲུབ་པར་མཛོད།།ཁྱད་པར་གསང་སྔགས་དགའ་བའི་ཚལ་གནས་པའི།།དགེ་འདུན་འདུས་པ་མཐུན་ཞིང་རྒྱས་པ་དང་།། མི་དང་མི་མིན་གདོན་བགེགས་ཉེར་འཚེ་ཞི།། བསམ་དོན་ཀུན་འགྲུབ་བཀྲ་ཤིས་དཔལ་འབར་མཛོད།།ཅེས་བརྗོད་ཅིང་གཏོར་མཆོད་དབུལ་ལོ།།དེ་ལྟར་གསང་སྔགས་དགའ་ཚལ་བ་རྣམས་ཀྱི་ཐུགས་བཞེད་བཞིན་སི་ཏུ་པས་བྲིས་པ་དགེ་ལེགས་འཕེལ།།ཞེས་པ་དང་།ཡང་།

༄། ། འཇིག་རྟེན་དབང་ཕྱུག་ཀརྨ་པའི་འཕྲིན་ལས་ཀྱི་བྱེད་པོ་གནམ་བསྐོས་གོང་མའི་ལུང་གིས་ཀྭན་ཏིང་ཡྭན་ཐོང་མྱའུ་ཙི་གཱེ་གསིར（圆通流教灌顶大司徒）འབོད་པ་བསྟན་པའི་ཉིན་བྱེད་ཀྱི་ཡི་གེ་འཇང་ཡུལ།ས་ཐམ།ཉི་ནག གླ་ཕི་སོགས་ཀྱིས་མཚོན་ཉེ་ཆར་འཁོད་པའི་ལྷ་སྡེ་མི་མཆོག་དམན་ཀུན་གྱིས་ཐུགས་ངེས་རྒྱུར།ཀུ་རྡོས་ཐེག་ཆེན་དར་རྒྱས་གླིང་གི་འདུས་སྡེའི་འདྲེན་པར།སྒྲུབ་ཆེན་དེ་ཉིད་ཞིང་ལ་གཤེགས་ཁར་ཞལ་ཆེམས་ཀྱི་ཚུལ་དུ།འོག་མིན་གླིང་གི་གཉེར་ཆེན་བདེ་བ་ལ་བཀོད་འདོམས་དང་།རྩིས་སྤྲོད་གནང་འདུག་པ་ལྟར།ངེད་ཀྱིས་ཀྱང་བསྐོ་བཞག་བགྱིས་ཤིང་།ཀྭན་འཇའ་བྱིན་ཡོད་པར།ཁྱེད་ཐམས་ཅད་ཀྱིས་དད་པ་དང་བཀུར་སྟིའི་ཡུལ་དུ་བྱེད་ཅིང་མཐུན་རྐྱེན་སྒོ་དུ་མ་ནས་ཡང་དག་པར་སྒྲུབ་པ་དང་།གནོད་འགལ་ལོག་པར་འགྲོ་བའི་རིགས་མི་བྱེད་པ་གལ་ཆེ་ཞིང་།ཁྱད་པར་འདུས་སྡེ་འདིར་བརྟེན་པའི་གྲྭ་རིགས་རྣམས་དང་།དབུ་ཆོས་སོགས་ལས་བྱེད་དུ་བསྐོས་པ་རྣམས་ཀྱིས་ཀྱང་།བླ་མའི་གསུང་ངག་ལྷུར་ལེན་པའི་མགོ་འོག་ལུས་ཚུད་ཡོད་པ་དང་།བྱ་མིག་གྱེན་ལྟ།ཕྱ་ར་གྲུ་འགྱོགས་ཡོད་པ་གལ་ཆེ་ཞིང་།འདི་པས་ཀྱང་སྒྲུབ་བརྒྱུད་རིན་པོ་ཆེའི་བསྟན་པའི་སྲི་ཞུར།སྒོ་གསུམ་ཆིག་དྲིལ་གྱི་བགྱི་བ་ལྷུར་ལེན་པ་གལ་ཆེ།ཞེས་པའི་ཡི་གེ་སྐྱེས་བདག་ཞེས་པ་ལྕགས་ལུག་ལོའི་ཡར་ཚེས་ལྷ་སྟེང་གི་དབེན་གནས་ནས་སྤེལ་བ་མདྒ་ལཾ།གུ་ཎས་ཞུས།ཡང་།

༄།།སྭསྟི་བྷ་བ་ཏུ།ཕྱི་ལྟར་འཇིག་རྟེན་དབང་ཕྱུག་ཕོ་བྲང་སྟེ།།ནང་དུ་བདེ་མཆོག་འཁོར་ལོའི་དཀྱིལ་འཁོར་དངོས།།གསང་བ་རྡོ་རྗེ་བཙུན་མོའི་མཁའ་དབྱིངས་མཆོག །གནས་ཆེན་ཁྱད་པར་འཕགས་ལ་ཕྱག་བགྱིའོ།།དེ་ཡང་གནས་ཆེན་འཇང་རི་སྨུག་པོར་གྲགས་པ་འདི་ཡི་ལོ་རྒྱུས་ཅུང་ཟད་བརྗོད་ན།འཛམ་བུའི་གླིང་དུ་གནས་ཆེན་པོ་ཉེར་བཞི་དང་ཡུལ་ཆེན་པོ་སོ་གཉིས་ཐམས་ཅད་རྩོད་དུས་ཀྱི་ཐོག་མར་འཁོར་ལོ་བདེ་མཆོག་གིས་དྲག་པོ་ཆུང་མ་དང་བཅས་པ་འདུལ་བའི་ཚེ་བྱིན་གྱིས་བརླབས་པས་སྤྱོད་པ་སྐྱོང་བའི་གནས་ཆེན་དུ་གྱུར་ཅིང་།དེ་དག་དངོས་དང་ཡན་ལག་ཉིང་ལག་དུ་མས་འཛམ་གླིང་ཐམས་ཅད་ཁྱབ་པའི་ཕྱིར།གནས་ཆེན་འདི་ཡང་དེ་དག་ཏུ་གཏོགས་སམ་སྙམ་སྟེ།སྔོན་ཚེ་ཡུལ་འདིར་རྒྱ་གར་གྱི་རྒྱལ་པོས་དབང་བསྒྱུར་ཅིང་དེ་དུས་གྲུབ་པའི་སློབ་དཔོན་མང་དུ་བྱོན་ཅིང་བྱིན་གྱིས་བརླབས་པ་ནི།ཏའི་ལིའི་ཕྱོགས་སུ་རྒྱ་གར་གྱི་རྡོ་རིང་གི་ཡི་གེ་མཐོང་བ་དང་གནས་འདིའི་ཉེ་སྐོར་རྣམས་ནས་བདེ་མཆོག་གསང་འདུས་ཕུར་པ་སོགས་ཀྱི་ཕུར་གདབ་ཀྱི་ལྷའི་སྐུ་བརྙན་དང་སྔགས་ཀྱི་དམ་ཚིག་རྡོ་རྗེ་སོགས་རྫས་ཁྱད་པར་ཅན་མང་པོས་འོག་ནས་ད་ལྟའང་ཐོན་པ་བཅས་རྗེས་དཔག་ཚད་མས་ཤེས་པ་ནུས་ལ།དེའི་བྱེ་བྲག་ཇི་ལྟ་བུ་ཡིན་ནི་ཁ་ཚོན་གཅོད་པར་མི་ནུས་ཀྱང་།སྤྱིར་རང་ཉིད་ཀྱི་བསམ་ཚོད་མོས་བློས་ཡར་གཞལ་ཙམ་ལ།ཕྱི་ལྟར་ནི་སྤྱན་རས་གཟིགས་ཀྱི་ཕོ་བྲང་གི་རྣམ་པ་ཡིན་ཏེ།འཛམ་བུའི་གླིང་དུ་ཐོག་མར་གནས་ཡུལ་ཐམས་ཅད་དབང་ཕྱུག་གིས་བདག་ཏུ་བྱས་ཤིང་དབང་ཕྱུག་དེ་སྤྱན་རས་གཟིགས་ཀྱི་སྤྲུལ་པ་ཡིན་པར་མདོ་ཟ་མ་ཏོག་དུ་གསུངས་པ་དང་།འཇིག་རྟེན་དབང་ཕྱུག་ཀརྨ་པས་ཀྱང་གོང་མས་བྱིན་གྱིས་བརླབས་པའི་གནས་ཡིན་པར་ལུང་བསྟན་པས་ཀྱང་ཤེས་པར་ནུས་ལ།ཁོ་བོའི་འཁྲུལ་སྣང་ལའང་ཤར་ཕྱོགས་སྤུངས་རིའི་གནས་ཡིན་ནོ་སྙམ་པ་བྱུང་བ་བཅས་ཀྱི་དོན་དེར་སྣང་བའོ།།ནང་ལྟར་འཁོར་ལོ་བདེ་མཆོག་གི་གནས་སུ་རུང་སྟེ།ཁོ་བོ་གནས་སུ་ཆས་པའི་ཚེ་བདེ་མཆོག་གི་སྐུ་བརྙན་བྱིན་ཅན་སྟེར་མཁན་བྱུང་བ་དང་།གནས་སུ་བསྡད་པའི་རྨི་ལམ་དུའང་བདེ་ཕག་གི་དཀྱིལ་འཁོར་སུག་བྲིས་སུ་བསྟར་ཞིང་བུད་མེད་མང་པོས་གྲོགས་བྱེད་པ་བྱུང་བ་དང་གོང་བཤད་ཀྱི་རྒྱུ་མཚན་དེ་དག་གིས་ཀྱང་ཤེས་པར་ནུས་སོ།།གསང་བ་རྡོ་རྗེ་བཙུན་མོའི་མཁའ་དབྱིངས་སུ་གྱུར་པ་སྟེ།ཁོ་བོའི་རྨི་ལམ་དུ་གནས་དེའི་བདག་པོ་གཙོ་བོར་གྱུར་པ་བུད་མེད་མི་ལས་འདས་པ་ཞིག་གོ་སྙམ་པ་བྱུང་བ་དང་།རིའི་དབྱིབས་ཆོས་འབྱུང་ཉིས་བརྩེགས་ཀྱི་རྣམ་པར་སྣང་བ་དང་།རྣལ་འབྱོར་མ་རྒྱུད་ཀྱི་གནས་ཀྱི་མཐར་ཐུག་དེར་སྣང་བའི་ཕྱིར་རོ།།དེས་ན་སྤྱན་རས་གཟིགས་དང་འཁོར་ལོ་བདེ་མཆོག་ཡབ་ཡུམ་གྱི་བསྐྱེད་རྫོགས་ཉམས་སུ་བླང་བ་དང་།ཁྱད་པར་སྙིང་པོའི་དོན་གྱི་རྣལ་འབྱོར་ནཱ་རོ་ཆོས་དྲུག་དང་ཕྱག་རྒྱ་ཆེན་པོ་ཉམས་སུ་ལེན་པའི་གནས་ཁྱད་པར་ཅན་ཡིན་ནོ།།གཞན་ཡང་གྲུབ་པའི་ཕུག་དང་རང་བྱོན་གྱི་ལྷ་སྐུ་ལ་སོགས་པ་ནི་ཆེས་མང་བ་དག་ཕྱོགས་སུ་ཡོད་པར་སྣང་བ་རིམ་བཞིན་གསལ་བར་འགྱུར་ཞིང་འདིར་ནི་ཡི་གེ་མང་བ་དང་རེ་ཞིག་སྐབས་སུའང་མ་བབས་པས་སྤྲོས་པ་སྐྱུངས་བ་ཡིན་ནོ།། དེ་ལྟར་གནས་ཆེན་འཇང་རི་སྨུག་པོའི་རྟོགས་བརྗོད་ཅུང་ཟད་གླེང་བ་ནི།གནས་དང་རྗེས་སུ་འབྲེལ་བའི་གསང་སྔགས་དགའ་ཚལ་གྱི་ཞབས་ཏོག་ལ།ཀརྨ་མི་བསྐྱོད་དང་ཀརྨ་དཔལ་དབྱངས་གཉིས་ཀྱིས་ནན་དུ་བསྐུལ་བའི་ངོར་བསྟན་པའི་ཉིན་བྱེད་ཀྱི་སྤེལ་བ་མངྒ་ལཾ།ཞེས་པ་ལྟའོ།དེ་ལྟར་འཇང་ས་ཐམ་རྒྱལ་པོ་དང་ཀཾ་ཚང་ཡབ་སྲས་བར་གྱི་འབྲེལ་བ་ནི་ཡོན་མི་ཆིང་རྒྱལ་རབས་གསུམ་གྱི་རིང་ལས།འབྲེལ་བ་ཆེས་ཟབ་ཞིང་དམ་པ་ནི་མིང་རྒྱལ་རབས་ཀྱི་སྐབས་སུ་ཡིན།ལྷག་པར་དུ་སི་ཏུ་ཆོས་ཀྱི་འབྱུང་གནས་འཇང་དུ་ཐེངས་གསུམ་ཕེབས་ཏེ་ཆོས་ལུགས་ཙམ་མ་ཡིན་པ་འཇང་བོད་མི་རིགས་གཉིས་ཀྱི་རིག་གནས་བརྗེ་རེས་ཐད་སྙིང་པོའི་དོན་གྱི་ལྡན་པ་བོད་ཡིག་གི་ཆོས་འབྱུང་དེབ་ཐེར་རྣམ་ཐར་ལས་ཤེས་ཐུབ་པའོ།།

འཇང་རི་སྨུག་པོ་དང་རྗེས་སུ་འབྲེལ་བའི་སི་ཏུ་ཆོས་ཀྱི་འབྱུང་གནས་འཇང་དུ་ཕེབས་ཐེངས་གསུམ།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10