འགྲམ་པ་མཉམ་གཤིབ་བྱས་པའི་འདྲིས་གཤིན་གྱི་སྙིང་སྡུག་མ་ཞིག་ཐོལ་བྱུང་ཁྱོད་དང་ཁ་གྱེས་མ་ཐག ལོ་ངོ་མང་པོར་ལུས་དང་གྲིབ་མ་ཇི་བཞིན། ཆུ་དང་ཉ་མོ་ལྟར་བརྩེ་དགའི་བདེ་སྐྱིད་ཀྱི་འཚོ་བའི་རི་མོ་རེ་རེ་མིག་གི་རྒྱལ་མོར་རྡུལ་ཕྲན་བཞིན་ལང་ལོང་འཚང་སྲིད། བརྩེ་དུང་ལ་གས་ཆག་ཤོར་ཉིན་ནས་བཟུང་། ཁེར་རྐྱང་གི་གོམ་སྒྲ་དང་ལྷན་དུ་ཁྲོམ་ར་ནས་ག་ལེར་བགྲོད་དུས། མདུན་ཕྱོགས་ནས་ཆེས་རྒྱུས་ཡོད་ཀྱི་གྲིབ་གཟུགས་ཤིག་མཐོང་མ་ཐག སྙིང་གི་དགའ་མ་ཡིན་སྙམ་པའི་ཚོར་ཤེས་འབྱུང་ལ། རྒྱུས་ཡོད་ཀྱི་སྐད་གདངས་ཤིག་ཐོས་འཛིན་གྱི་བུ་གར་ལྷུང་མ་ཐག སྙིང་སྡུག་མའི་སྐད་སྒྲ་ཡིན་པར་འཁྲུལ་སྣང་སྐྱེས། ཐ་ན་བསིལ་བསིལ་གྱི་རླུང་བུས་ཁེར་རྐྱང་གི་སྒོ་མོ་དར་ཅིག་རྡུང་མ་ཐག ཁོ་མོས་འཛུམ་བག་མེ་ཏོག་གི་ཞལ་ཁ་ཕྱེས་ནས་རང་ཁྱིམ་ལ་ཕྱིར་ལོག་ན་སྙམ་པའི་དགའ་སྣང་བྱུང་།

   འཚོ་བའི་གྲུབ་ཆ་རུ་གྱུར་བའི་སེམས་ཁོང་གི་སྙིང་སྡུག་ཅིག་འདི་ལྟར་གྱེས་པའི་མོད། རང་གི་ཉེ་འཁོར་གྱི་བྱ་དངོས་མཐའ་དག་ལ་ཁོ་མོའི་རྣམ་ཤེས་ཀྱི་ཞབས་རྗེས་བབས་པ་ལྟར་དཔུང་བ་མཉམ་གཤིབ་སྒོས་འཆམ་འཆམ་དུ་བསྐྱོད་མྱོང་བའི་གནས་མཆོག་རེ་རེ་དང་། དཀའ་བ་མཉམ་སྤྱད་ཀྱིས་གྲུ་ལག་རྫེ་མྱོང་བའི་གནས་ས་རེ་རེ་ནི་བརྗེད་བྱང་དུ་གྲུབ་པའི་དྲོད་ལམ་ལམ་གྱི་ཕྱིར་དྲན་ཟིན་དེབ་ཅིག་ཏུ་གྱུར། སྙིང་སྡུག་མ་ཞིག་འདི་ལྟར་བདེ་སྐྱིད་ཀྱི་འཚོ་བའི་ཁྲོད་སྐར་མདའ་བཞིན་གློ་བུར་ཡལ་བའི་ཚེ་ན་དེ་ནི་ཆེས་གདུག་རྩུབ་ཀྱི་ན་ཟུག་ཅིག་ཡིན་ལ། དེ་ནི་ཆེས་ཉན་མི་སྤྲོ་བའི་མིག་ཆུ་སློང་བྱེད་ཀྱི་གཏམ་རྒྱུད་སྐྱུར་བོ་ཞིག་གོ། ཡིན་ཡང་། མ་འོངས་འབྱུང་འགྱུར་གྱི་ལོ་ཟླའི་ཁྲོད་དུ་ཆ་མེད་རྒྱུས་མེད་ཀྱི་འབྲེལ་ཐག་རིང་བོ་རིང་བོ་ཞིག་རྐྱོང་བཞིན་རང་རང་སར་འདུར་དགོས་པ་ཆོས་ཉིད་དུ་འཁུམས་སོ།།

   དང་ཐོག་ནས་བཟུང་བརྩེ་དུང་ལ་མཇུག་འབྲས་མེད་པ་བསམ་ན། གསེར་ལས་ལྷག་པའི་བཅུ་དྲུག་གི་ལང་ཚོའི་དུས་བཟང་དོན་མེད་དུ་ཆུད་ཟོས་བྱ་དགོས་དོན་གཏན་ནས་མེད། བརྩེ་དུང་ལ་གས་ཆག་ཤོར་བ་ནི་འཇིག་རྟེན་སྟེང་ཡོད་ཚད་ཤོར་བའི་ཉེན་བརྡ་ཞིག་གཏན་ནས་མིན་ཏེ། ཆེས་སྐྱོ་ཡུས་འདོན་ས་ནི་རྒྱུས་མེད་ནས་རྒྱུས་ཡོད་དང་རྒྱུས་ཡོད་ནས་བརྩེ་བ་ཟབ་པའི་མཐོ་རླབས་ཀྱི་ཆ་དེ་གློ་རྡེག་ཏུ་གསེར་སྐུད་ལྟར་དུམ་སེ་ཆད་པའི་སེམས་ཁུར་ལྷག་མ་དེའོ།།

   བརྩེ་དུང་ལ་བར་ཐག་ཤོར་བ་ནས་བཟུང་། དོ་མི་མཉམ་པའི་ངའི་སེམས་ཁམས་དང་ཁྱོད་ཀྱི་སེམས་ཁམས་གཉིས་གཅིག་པ་གཅིག་མཚུངས་ཡིན་ནམ་སྙམ་པའི་དོགས་གཞི་སྐྱེས་འོངས་ཤིང་། རྒྱུན་ལྡན་མིན་པའི་སྙིང་གི་འཕར་ཚད་ཀྱང་ཕལ་ཆེར་གཅིག་འདྲ་ཡིན་སྙམ་པའི་ཚོར་ཤེས་སྐྱེས།

འཚོ་བའི་གྲུ་ཟུར་རེ་རེ་ནས་གློ་བུར་དུ་ཡིད་སེམས་ཀྱི་རྩྭ་ལྗང་ལ་རླུང་བུས་བྲབ་ཐེངས་རེར་སྐྱོ་སྡུག་གི་ན་བུན་ཞིག་ཡ་ཆུང་གི་མཁའ་དབྱིངས་ནས་ཧྲིལ་གྱིས་འཐིབས་ཏེ་མཐར་མཇུག་ཁྲ་ཆུང་མིག་ཟུང་ལས་མཆི་མའི་དོག་པར་རང་དབང་མི་འདུག ཏག་ཏག་སྐབས་དེར། འདས་སོང་འགྲིག་ཅིང་མཐུན་པའི་བརྩེ་དུང་གི་གཏམ་རྒྱུད་དམར་པོའི་ཀློང་དུ་ཁད་ཀྱིས་འཐིམ་ན་སྙམ་མོད། ལེ་བདའ་དང་འགྱོད་སྣང་། སྡུག་ཡུས་དང་རེ་ཆད་ཀྱི་ཐ་སྙད་ནག་པོས་ཀུན་ནས་གཙེ་འོང་། གང་ལྟར། སྦྲང་རྩི་ལྟ་བུའི་འདས་སོང་གི་འཚོ་བ་མངར་མོར་དུས་ཀྱི་མདུང་རྩེ་ཕྱིར་ལྡོག་མི་ངེས་ལ། རྦད་ཀྱིས་སྣོག་པའི་བརྩེ་དུང་གི་རི་མོ་ཡང་བསྐྱར་བཞེངས་བསམ་ན་ནི་སྟོང་བསམ་དུ་མངོན་པས། ཡོད་ཚད་བསྐྱུར་ནས་རླུང་བུ་བཞིན་བགྲོད་དུ་ཆུགས། ཆུ་མོ་ལྟར་བཞུད་དུ་ཆུགས། རང་གི་རྡོག་ལམ་མ་ནོར་བར་མུ་མཐུད་དུ་མདུན་ཕྱོགས་སུ་སྐྱོད་དང་། ཁྲིགས་ཁྲིགས་མེད་ན་ཆེས་ལེགས་ཤིང་ཆེས་མཛེས་པའི་འབད་ཚིགས་གསར་བ་ཞིག་གིས་ཁྱོད་ལ་རེ་ཞིང་སྒུག་ཡོད་དོ།།