གྲང་ལྷགས་རྒོད་པའི་དགུན་གཞུང་འདིར། ཨ་ཕས་རྒྱང་རིང་གི་རི་གྲོང་ནས་གཞན་ཡུལ་གྱི་བུ་ཆུང་ང་ལ་དྲོད་ཁོལ་གྱིས་ཕྱུག་པའི་སློག་པ་ཞིག་བསྐུར་འདུག སློག་པ་དེ་ནི་ཨ་ཕས་ཁབ་དང་སྐུད་པ་རེ་རེས། བརྩེ་བ་དང་མིག་ཆུ་རེ་རེས་ང་ཁོ་ནའི་སླད་དུ་བཙེམས་གནང་བ་ཞིག་རེད། སློག་པ་དེའི་ནང་རོལ་ན། ཨ་ཕས་བུ་ཆུང་ང་ལ་བཅངས་པའི་བྱམས་པ་དང་བརྩེ་ཞེན་གྱིས་ཕྱུག་ཡོད། སློག་པ་དེ་མ་གྱོན་གོང་ནས། ངས་སློག་པ་དེའི་དྲོད་ཁོལ་ཚོར་ཐུབ། སློག་པ་དེ་མ་གྱོན་གོང་ནས། ངའི་སེམས་པ་མེ་སྟག་བཞིན་མཁའ་ལ་འཕྱུར་འོང་།

   ཨ་ཕས་བཙེམས་གནང་བའི་སློག་པ་དེ་ནི། ཨ་ཕས་ཕ་ཡུལ་ནས་བསྐུར་འོངས་པའི་ཁམས་བདེའི་འཚམས་འདྲི་ཐེངས་གཅིག་ཡིན་ལ། ངེད་གཉིས་པོའི་བརྩེ་ཞེན་གྱི་ས་བོན་གཏོར་སའི་འབྲེལ་ཐག་ཀྱང་རེད། སློག་པ་དེ་ནི་ཨ་ཕ་དྲིན་ཆེན་པོས་ཉིན་ཞག་མང་པོའི་དུས་ཚོད་ནང་ལག་ཟུང་གཉིས་པོའི་ཕུར་མཉེད་ལ་བརྟེན་ནས་བཟོས་གནང་བ་ཞིག་རེད། སློག་པ་དེ་ཨ་ཕ་དྲིན་ཆེན་པོས་རང་ཁྱིམ་གྱི་ལུག་བལ་བྲེག་ནས་བཟོས་པ་ཞིག་ཡིན་པས། སློག་པ་དེར་གཡང་དཀར་ལུག་གི་བལ་ལྟར་འཇམ་པའི་ཨ་ཕའི་གཤིས་རྒྱུད་མངའ་ཡོད།

   སློག་པ་དེ་ནི་སྤྱིར་བཏང་གི་སློག་པ་ཞིག་ག་ལ་ཡིན། སློག་པ་དེའི་སྦུབས་སུ། དྲིན་ཆེན་ཨ་ཕ་ཞིག་གིས་བུ་ཆུང་ང་ལ་ བཅངས་པའི་ལྷད་མེད་བརྩེ་དུང་གིས་ཕྱུག་ཡོད་ལ། རྒྱང་རིང་གི་ཕ་རྒན་ཞིག་གིས་གཞན་ཡུལ་གྱི་གཅེས་ཕྲུག་ང་ལ་གཟུགས་པོར་གཅེས་སྤྲས་བྱ་དགོས་པའི་བཀའ་མངགས་དང་དྲན་སྐུལ་ཐེངས་གཅིག་ཀྱང་ཡིན།

    སློག་པ་དེ་ལུས་ལ་གྱོན་ཐེངས་རེར། ངས་རང་ཉིད་ཀྱི་བྱིས་དུས་ཀྱི་འཚོ་བ་དྲན་ཡོང་། བྱིས་དུས་སུ་ཨ་ཕས་ང་རང་ པང་དུ་དམ་དུ་གཉོར་སྐྱོང་བྱེད་པའི་འཚོ་བ་དྲན་འོང་། སློག་པ་དེ་ལུས་ལ་གྱོན་ཐེངས་རེར། རང་ཉིད་ད་སོ་མ་ཨ་ཕ་ཉིད་ཀྱི་པང་ཁར་ཡོད་པའི་ཚོར་སྣང་ཞིག་སྦྱིན་ཡོང་། ངའི་ཨ་མ་ཆུང་ངུའི་དུས་ནས་ང་ཚོ་ཕུ་ནུ་མིང་སྲིང་ཚོ་དང་ཞལ་གྱེས་ཞུས་པས། ཨ་ཕ་དྲིན་ཆེན་པོས་ཕ་མ་གཅིག་ལྕོགས་ཀྱི་ཚུལ་དུ་ང་དང་ངའི་ཕུ་ནུ་མིང་སྲིང་ཚོ་བྱམས་ཀྱིས་བསྐྱངས་པས། ང་ཚོའི་ངོས་ནས་བརྗོད་ན། ཁོང་ནི་ངེད་ཚོའི་ཕ་ཡིན་ལ་མ་ཡང་ཡིན། ཨ་མ་གཤེགས་ནས་ད་བར་ལོ་ངོ་བཅུ་ལྷག་བུད་ཀྱང་། ཨ་ཕས་དེ་རིང་བར་དུ་བུད་མེད་གཅིག་ཀྱང་ཆུང་མར་བསུ་མ་མྱོང་། དེ་ནི་ངས་ནམ་རྒྱུན་ཨ་ཕ་ཁོང་མིང་དོན་མཚུངས་པའི་ཨ་ཕ་ཞིག་རེད་ཅེས་བརྗོད་པའི་རྒྱུ་རྐྱེན་ཆེ་ཤོས་ཤིག་ཡིན།

   ངེད་ཕུ་ནུ་མིང་སྲིང་ཚོ་རང་རང་གི་ལས་དོན་དང་མདུན་ལམ་གྱི་སླད་དུ་གཞན་ཡུལ་དུ་འགྲིམས་ནས་འདུག་དགོས་པས། རང་ཁྱིམ་གྱི་འགན་འཁྲི་མཐའ་དག་ལོ་ན་བགྲེས་པའི་ཨ་ཕ་གཅིག་པུའི་ཕྲག་སྟེང་དུ་བབས། ནམ་རྒྱུན་ང་རང་ཕ་ཡུལ་ལ་ལོག་ཐེངས་རེར། ཨ་ཕ་དྲིན་ཆེན་པོས་ཡང་ན་སྦྱག་མ་ལག་ཏུ་བཟུང་ནས་ཞིང་ཁར་ཆུ་འདྲེན་པར་འགྲོ་བཞིན་ཡོད་ཅིང་། སྐབས་རེ་ཐལ་རླུང་གི་ཀློང་དུ་བྱེ་ཐང་ལ་བསྒྱུར་བཀོད་བྱས་ནས་ཞིང་ཁ་རྒྱ་བསྐྱེད་པ་དང་། ནགས་ཚལ་གསར་འདེབས་བྱེད་བཞིན་པའི་ངང་ཚུལ་དེ་ཡིན། ཡང་ན་ཨ་ཕས་འུར་རྡོ་སྐེད་པར་གཟེད་ནས་ལུག་ཁྱུ་ཡི་རྗེས་སུ་འབྲངས་ཤིང་། ཡང་ན་ས་རྡོ་སྒལ་པར་ཁུར་བཞིན་ཁང་པ་གསར་རྒྱག་གི་ལས་ལ་འཇུག་བཞིན་པའི་རྣམ་པ་དེ་རེད། དུས་ད་ལྟའི་བར་ངས་བརྗེད་དཀའ་བ་ཨ་ཕའི་ཁེར་རྐྱང་གི་རྒྱབ་གཟུགས་སྐྱ་བོ་དེ་ཡིན་ལ། དྲན་སྐྱེན་པའང་ཁེར་རྐྱང་གི་རྒྱབ་གཟུགས་སྐྱ་བོ་ཁོ་ན་ཡིན།

   ད་ཆ་ཨ་ཕའི་སྐུ་ལུས་གཞུ་ལྟར་འཁྱོག་ཅིང་། སྐྲ་ལོའི་གསེབ་ན་ཁ་བའི་མདངས་ལ་འཁུ་བའི་སྐྲ་དཀར་གྱི་མེ་ཏོག་བཀང་འདུག ཨ་ཕ་དེ་ལྟར་རྒས་འདུག ཡོད་ཚད་ཀྱི་ཡོད་ཚད་རང་གི་བུ་ཕྲུག་གི་སླད་དུ་ལང་ཚོ་སྟོང་འདུག ཡོད་ཚད་ཀྱི་ཡོད་ཚད་ངེད་ཕུ་ནུ་མིང་སྲིང་ཚོའི་བདེ་སྐྱིད་ཀྱི་སླད་དུ་སྐྱེས་སུ་ཕུལ་འདུག ཨ་ཕའི་ལང་ཚོ་ལོ་ཟླའི་ཆོམ་རྐུན་གྱིས་བཅོམ་ནས་རྒས་འདུག་མོད། ནམ་ཡང་རྒས་མི་སྲིད་པ་ནི་ཨ་ཕས་བུ་ཕྲུག་ང་ཚོར་བཅངས་པའི་དྲོད་ཁོལ་གྱི་བརྩེ་བ་ཡིན། ནམ་ཡང་རྫོགས་ཐབས་བྲལ་བ་ནི་ཨ་ཕས་ང་ཚོའི་སླད་དུ་བཞུར་གྱིན་པའི་དཀའ་སྡུག་གི་རྔུལ་ཁྲག་དང་མིག་ཆུ་ཡིན། བྱམས་བརྩེའི་འོད་མདངས་ཀྱིས་ཕྱུག་པའི་ཨ་ཕའི་སྤྱན་ཟུང་དུས་ནམ་ཡང་ངེད་བུ་ཕྲུག་ཚོར་གཏད་ནས་ཡོད།

   ཀྱེ། ངའི་སྙིང་ཉེ་བའི་དྲིན་ཆེན་གྱི་ཕ་ལོ། ཆར་རླུང་དང་ཚ་གདུག ཁ་འཚུབ་དང་གྲང་ལྷགས་ཀྱིས་གཙེས་པའི་ནམ་ཟླར་ཡང་ཁྱེད་ཀྱིས་སྔར་རྒྱུན་བཞིན་སེན་མགོ་རྣག་དང་སེན་རྟིང་ཁྲག་བྱས་ཏེ་ཁྱིམ་ཚང་དང་བུ་ཕྲུག་གི་སླད་དུ་རང་ལུས་ལ་ཁབ་གཙག་འབིག་གཙག་བྱེད་བཞིན་ཡོད་པ་མ་ཡིན་ནམ། ཁྱེད་ནི་ངེད་ཕུ་ནུ་མིང་སྲིང་ཚོའི་མིག་འབྲས་སུ་འོད་དུ་འཚེར་བའི་སྐར་མ་འོད་ཆེན་དང་། སྨག་རུམ་ཁྲོད་ཀྱི་སྒྲོན་མེ་ཉག་ཅིག་ཡིན་པས། ཁྱེད་ཀྱི་བྱམས་བརྩེ་ལས་འཁྲུངས་པའི་འོད་ཟེར་དཀར་བོ་དུས་ནམ་ཡང་མི་ནུབ་པར་གྱུར་ཅིག།