དུས་ནམ་ཞིག་ན་རྒྱལ་རྩེ་རི་ནང་ཚོ་ཆེན་དུ་དཔོན་པོ་སྒྲ་ཆེན་པ་བྱ་བ་མེ་ལས་དབལ་ཚ་བ།ཆུ་ལས་རྦ་དྲག་པ།རྔ་མ་ལས་ཉག་ཕྲ་བ།རྒྱ་གཡེར་ལས་ཁ་ཚ་བ།སྲན་མ་ལས་རྡོག་འགྲིལ་བ།བག་ཕྱེ་ལས་རྩི་ཞིབ་པ་གཅིག་ཡོད།སྣང་གསལ་འོད་འབུམ་གྱི་རྣམ་ཐར་ལས་བཤུས།
མེ་ཡི་ཁྱད་ཆོས་ནི་དབལ་ཚ་བ་དང་ཆུ་ཡི་ཁྱད་ཆོས་ནི་རྦ་དྲག་པ།རྔ་མའི་ཁྱད་ཆོས་ནི་ཉག་ཕྲ་བ།རྒྱ་གཡེར་གྱི་ཁྱད་ཆོས་ནི་ཁ་ཚ་བ།སྲན་མའི་ཁྱད་ཆོས་ནི་རྡོག་འགྲིལ་བ།བག་ཕྱེའི་ཁྱད་ཆོས་ནི་རྩི་ཞིབ་པ་ཞིག་ཡིན་པར་བརྗོད་པའི་ཤུགས་སུ།རི་ནང་དཔོན་པོ་སྒྲ་ཆེན་པ་ནི་གདུག་རྩུབ་ཆེ་བ་དང་སེམས་རྒྱ་དོག་པ།གཞན་ལ་བརྙས་བཅོས་དང་ཕོག་ཐུག་བཟོ་བ།རང་ཚུགས་མེད་པའམ་འགྱུར་སྐྱེན་པ།བླང་དོར་འཇུག་ལྡོག་གི་ལུགས་ལ་རྨོངས་པ་ཞིག་ཡིན་ཚུལ་གོ་རུ་བཅུག་ཡོད།
  འཇིག་རྟེན་ན་དབལ་ཚ་བ་ནི་མེ་དང་རྦ་དྲག་པ་ནི་ཆུ།ཉག་ཕྲ་བ་ནི་རྔ་མ།ཁ་ཚ་བ་ནི་རྒྱ་གཡེར།རྡོག་འགྲིལ་བ་ནི་སྲན་མ།རྩི་ཞིབ་པ་ནི་བག་ཕྱེ་བཅས་ཡིན་ནའང་།རི་ནང་དཔོན་པོ་སྒྲ་ཆེན་པའི་ཁྱད་ཆོས་ནི་དཔེའི་ཁྱད་ཆོས་དག་ལས་ཀྱང་ཚབས་ཆེ་བ་ཞིག་ཡིན་པ་ནི།མི་རྣམས་ཀྱི་མཐོང་ཆོས་སུ་གྱུར་པའི་གོ་སླ་བའི་དཔེ་འདི་འདྲ་ལ་བརྟེན་ནས་ཐེར་འདོན་གནངས་ཡོད་པར་མ་ཟད།ཚིག་ཐུང་ཞིང་དོན་འདུས་པའི་སྒོ་ནས་རི་ནང་དཔོན་པོ་སྒྲ་ཆེན་པའི་ཁྱད་ཆོས་དེ་གཟུགས་ཅན་བཞིན་བསྟན་འདུག་གོ