སྤྱི་ཆ་ནས་བཤད་ན་བརྩམས་ཆོས་དེ་ནི་ཡིད་འགྱུར་མཚོན་པའི་ལྷུག་རྩོམ་ཕུལ་དུ་བྱུང་བ་ཞིག་རེད་ལ།དེའི་ནང་དུ་མི་འབོད་དང་པོའི་སྒྲ་ལ་བརྟེན་ནས་དོན་རྐྱེན་ལྷུག་བརྗོད་བྱེད་པ་དང་།དཔྱད་བརྗོད་སྤེལ་བ།ཡིད་འགྱུར་སྟོན་པ་སོགས་ལྷུག་རྩོམ་གྱིས་རྒྱུན་པར་སྤྱོད་པའི་མཚོན་ཐབས་རྣམས་འོས་འཚམ་གྱིས་སྤྱད་ཡོད་པས་མི་ཚད།
དེ་དག་གི་ཁྲོད་དུ་ལྡོག་པ་ཐ་དད་པའི་ཚིག་གི་སྦྱོར་བ་ལ་བརྟེན་ཏེ་བྱུང་རིམ་རང་བཞིན་གྱི་རྒྱུ་རྐྱེན་ངེས་ཅན་རེའང་ཐོན་པར་བྱས་ཡོད་པ་དང་།ཤུགས་དྲག་པའི་ཡིད་འགྱུར་དང་།ཕུན་སུམ་ཚོགས་པའི་ཀུན་རྟོག གོ་སླ་ཞིང་སྡེབ་ལེགས་པའི་ཚིག་སྦྱོར་སོགས་ཡིད་འགྱུར་མཚོན་པའི་བརྩམས་ཆོས་ཀྱི་སྒྱུ་རྩལ་ཁྱད་ཆོས་དང་།གཏིང་ཟབ་ཅིང་སྔོན་དུ་ཐོན་པའི་བསམ་བློ་དག་གིས་ལེགས་པར་བལྟམས་ཡོད།
འདིར་དེ་དག་ལས་གཙོ་བོ་འགའ་རོབ་ཙམ་བརྗོད་ན།
༡མི་འབོར་དང་པོའི་སྒྲ་སྤྱད་པ་ལ་དགེ་མཚན་ངེས་ཅན་ཞིག་ཡོད་པ་སྟེ།ལྷུག་རྩོམ་འདིའི་ནང་དུ་ངའི་མཐོང་ཐོས་དྲན་རེག་ཏུ་གྱུར་པའི་རྐང་ལམ་ཕྲ་མོ་བརྗོད་པ་བརྒྱུད་ནས་ང་ལ་ཐོག་མར་གཟི་བརྗིད་ཀྱི་ཚོར་སྣང་བྱུང་ཚུལ་དང་།དེ་ནས་འཇིགས་སྐྲག་གམ་བྲེལ་འཚབ་ཀྱི་སེམས་བྱུང་སྐྱེས་ཚུལ།མཐར་ཡིད་ཆེས་དང་སྤོབས་པ་བརྟས་ཚུལ་སོགས་རིམ་པར་བསྟན་ཡོད་པ་ཟོལ་མེད་ཅིང་བདེན་སྣང་གིས་ཕྱུག་པའི་རྒྱུ་མཚན་གཙོ་བོ་ཞིག་འདི་ལ་རག་ལས་ཡོད་དོ།།
༢ལྷུག་རྩོམ་དེའི་ནང་དུ་རྩོམ་པ་པོས་སོས་དུས་ཀྱི་ཉི་མ་འཕུད་ཐབས་བྱེད་སྐབས་ཞེས་དང་།ཆར་བ་ཟིམ་ཟིམ་འབབ་པའི་ཉིན་ཞིག་ལ།ལོ་ཞིག་ལ།བཅིངས་འགྲོལ་བྱས་རྗེས་ལ་སོགས་དོན་གྱི་བྱུང་བ་བརྗོད་པའི་བརྩམས་ཆོས་དག་གི་ཁྲོད་དུ་དོན་རྐྱེན་བྱུང་རིམ་གྱི་སྔ་ཕྱི་སྟོན་དུས་རྒྱུན་པར་སྤྱོད་པའི་ཚིག་འདི་རིགས་སྤྱད་ནས་དོན་རྐྱེན་གཟབ་འབྲི་བྱས་ཏེ་བྱུང་རིམ་ངེས་ཅན་ཞིག་གོ་རིམ་བཞིན་བཀོད་སྒྲིག་བྱས་ཡོད་ཀྱང་།དེ་ནི་ཆ་ཤས་དང་ཡན་ལག་ལྟ་བུའི་བྱུང་རིམ་གྱི་རྒྱུ་རྐྱེན་ཤ་སྟག་ཡིན་པས།མི་སྣའི་གཤིས་རྒྱུད་ཀྱི་འཕེལ་རིམ་ལོ་རྒྱུས་ཆ་ཚང་ཞིག་གྲུབ་མེད་ནའང་།རྒྱུ་རྐྱེན་དེ་རིགས་ཀྱིས་རྩོམ་པ་པོས་ཡིད་འགྱུར་མཚོན་པ་ལ་རམ་འདེགས་ཀྱི་ནུས་པ་གལ་ཆེན་ཞིག་ཐོན་ཡོད་པས་མི་ཚད།ཁ་ཚང་མ་ཡིན་པའི་བྱུང་རིམ་གྱི་རྒྱུ་རྐྱེན་དེ་དག་གིས་ཀློག་པ་པོའི་རོལ་མྱོང་གི་ཀུན་རྟོག་ལ་སྟོང་ཆ་ངེས་ཅན་ཞིག་བཞག་སྟེ།ཚིག་ངོས་ནས་དངོས་སུ་མ་ཐོན་པའི་དོན་རྐྱེན་གྱི་སྔ་ཕྱིའི་བྱུང་རིམ་རྣམས་ཀློག་པ་པོ་རང་ཉིད་ཀྱི་བསམ་གཞིག་དང་ཀུན་རྟོག་ལ་བརྟེན་ནས་ཁ་སྣོན་དང་གསར་སྐྲུན་བྱ་ཆོག་པར་བྱས་པ་དེས་བརྩམས་ཆོས་ཀྱི་ཤུགས་བསྟན་རྒྱ་བསྐྱེད་པ་དང་།དེ་ལ་བརྟེན་ནས་བརྩམས་ཆོས་ཀྱིས་བསྟན་འདོད་པའི་དགོངས་དོན་གཙོ་ཕལ་རྣམས་བླ་ལྷག་གིས་མཚོན་ཡོད་དོ།། ༣ཇི་སྐད་དུ།གང་དུ་དོན་དམ་སྒྲ་ཡི་དོན་དེ་ཉིད།ཉེ་བར་མཚོན་པར་བྱས་ཤིང་རང་གི་དོན།གསལ་བར་གྱུར་པ་སྙན་ངག་ཁྱད་པར་སྟེ།སྒྲ་ཙམ་ཞེས་པར་མཁས་པ་རྣམས་ཀྱིས་བཤད།ཅེས་པ་བཞིན་ལྷུག་རྩོམ་དེའི་ནང་དུ་བསྡུས་བརྗོད་རང་བཞིན་གྱི་མཚོན་ཐབས་སྤྱད་ཡོད་པ་རྩོམ་བྱང་ནས་བཟུང་རིམ་བཞིན་རྟོགས་པར་འགྱུར་ལ། སྡུད་བྱེད་རྐང་ལམ་ཕྲ་མོའི་ཤུགས་ལ་བསྡུ་བྱ་མི་རིགས་ཤིག་གི་ཤེས་རིག་དང་ལོ་རྒྱུས་ཀྱི་བཞུད་ལམ་བསྡུས་ཏེ་བརྗོད་ཡོད་པ་དེ་ནི་དོན་ལ་དོན་སྤྱིའི་བྱ་དངོས་ཤིག་བྱེ་བྲག་དང་གཟུགས་ཅན་གྱི་ལྗོངས་སྣང་ཞིག་ཏུ་བསྒྱུར་ནས་ཀློག་པ་པོའི་མཐོང་ལམ་དུ་བཤམས་པ་ཡིན་པས།དེས་ལྷུག་རྩོམ་དེའི་སྒྱུ་རྩལ་བདེན་སྣང་དང་ཡིད་ཡུལ་གྱི་མཛེས་པ་ཁྱད་པར་བ་ཞིག་གྲུབ་པར་བྱས་པའི་ཞར་ལ་རྩོམ་པ་པོའི་ཡིད་འགྱུར་ཤུགས་དྲག་སྒོས་མཚོན་པ་ལ་གཏན་ཚིགས་ཀྱི་བདེན་སྟོབས་དང་བརྩམས་ཆོས་ཧྲིལ་བོའི་བསྟན་བྱ་རྒྱ་བསྐྱེད་པའི་ཐད་ལའང་ནུས་པ་བསམ་གྱིས་མི་ཁྱབ་པ་ཐོན་འདུག
 གཞན་ཡང་ཚིག་གི་སྡེབ་སྦྱོར་དང་མཚོན་ཐབས་སྣ་ཚོགས་ཟུང་འབྲེལ་བྱས་པ།དགོངས་དོན་རྒྱ་ཆེ་བ་སོགས་ཀྱི་ཐད་དུའང་བརྗོད་འོས་ཤིང་གླེང་དགོས་པའི་རིགས་མང་དུ་ཡོད་ཀྱང་།
སྟབས་བདེ་བའི་ཆེད་དུ་མདོར་དྲིལ་ནས་བརྗོད་ན།ལྷུག་རྩོམ་དེའི་ནང་དུ་རྩོམ་པ་པོས་སྡེབ་ལེགས་ཤིང་གོ་སླ་བའི་ཚིག་སྦྱོར་དང་།བདེན་པར་གྲུབ་ལ་མངོན་པར་གསལ་བའི་ཡིད་ཡུལ།ཟོར་ཡང་ཞིང་རྣམ་གྲངས་མང་བའི་མཚོན་ཐབས་ལ་སོགས་པར་བརྟེན་ནས་རང་མི་རིགས་ལ་བཅངས་པའི་བརྩེ་སེམས་དང་འདས་པའི་ལོ་རྒྱུས།ད་ལྟའི་གནས་བབ།མ་འོངས་པའི་མདུན་ལམ་སོགས་ལ་གནང་བའི་དཔྱོད་ཤེས་ཀྱི་བསམ་གཞིག་ཞིབ་མོ་དང་།དེ་ལས་འཕེལ་བའི་ངོས་ཟིན་དང་ཡིད་འགྱུར་སྣ་ཚོགས་འདུ་ཕུལ་ཆེ་བའི་སྒོ་ནས་བྲིས་པ་བརྒྱུད།རང་མི་རིགས་ཀྱི་སྲོལ་རྒྱུན་རིག་གནས་དང་དེང་རབས་རིག་གནས་བར་གྱི་དངོས་ཡོད་འགལ་བ་གསལ་བོར་མཚོན་པ་དང་རྩོམ་པ་པོ་རང་ཉིད་དེང་རབས་རིག་གནས་ལ་མངོན་པར་ཕྱོགས་པའི་སེམས་འདུན་གསལ་བོ་ཞིག་བརྗོད་པའི་ཤུགས་ལ་དེ་ནི་མི་རབས་ཤིག་གི་ལོ་རྒྱུས་ཀྱི་གདམ་ག་ཡིན་པའང་བསྟན་ཡོད་ཅེས་བརྗོད་ཆོག་སྙམ་མོ།།