དགོད་བྲོའི་ཟློས་གར།
ཀྲུང་གོའི་གནའ་རབས་ཟློས་གར་གྱི་རྣམ་པ་ཞིག་སྟེ།ཡོན་རྒྱལ་རབས་ཀྱི་དུས་སུ་དར་བའི་རྩེ་མོར་སོན།གླུ་གར་དེ་ཐོག་མར་བྱང་ཕྱོགས་སུ་དར་མགོ་བརྩམས་ཤིང་།བྱང་ཕྱོགས་ཀྱི་དབྱངས་རྟ་བེད་སྤྱད་ནས་འཁྲབ་སྟོན་བྱེད་པས་ན་བྱང་ཕྱོགས་པའི་དབྱངས་རྟ་ཞེས་ཀྱང་ཟེར།ཐང་རྒྱལ་རབས་དང་རབས་ལྔ་མཉམ་གནས་རྒྱལ་རབས།ད་དུང་སུང་ལྷོ་མ་དང་སུང་བྱང་མའི་རྒྱལ་རབས་དུས་ཀྱི་དགོད་བྲོའི་ཟློས་གར་དང་ཙ་པན་ཟློས་གར།སྒྱུ་རྩལ་རོལ་རྩེད་སོགས་ཡོད་ཚད་ལ་དགོད་བྲོའི་ཟློས་གར་ཟེར།ཡོན་རྒྱལ་རབས་དུས་ཀྱི་དགོད་བྲོའི་ཟློས་གར་གྱི་རྩོམ་ལུས་ནི་སྤྱིར་བཏང་དུ་འཁྲབ་ཚན་བཞི་ཅན་ཡིན་ཏེ།འཁྲབ་ཚན་རེ་མི་གཅིག་རེས་གར་དབྱངས་སྒྱུར་མཁན་གཙོ་བོ་བྱེད་པ་དང་འཁྲབ་མཁན་གཞན་དག་གི་སྐབས་སུ་གཞུང་སྲོང་བ་ཙམ་ལས་མེད།གལ་ཏེ་འཁྲབ་ཚན་བཞིའི་ནང་གཏམ་རྒྱུད་ཧྲིལ་བོ་འཁྲབ་སྟེ་མི་རྫོགས་ཚེ།འཁྲབ་ཚན་དང་པོའི་སྔོན་ནམ་ཡང་ན་འཁྲབ་ཚན་རེ་རེའི་བར་དུ་ཁྱིའུ་བཞིན་སྣོན་པར་བྱེད་ལ།གཏམ་རྒྱུད་ཆེས་རིང་བའི་སྐོར་དེ་ཟློས་གར་དུ་མར་འགོད་པར་བྱེད་དེ།དཔེར་ན་ཝང་ཧྲི་ཕུའུ་ཡི་《གཞོགས་ཁང་ནུབ་མའི་གཏམ་རྒྱུད》ལ་མཚོན་ན་འཁྲབ་ཚན་ཉི་ཤུ་བོ་ཟློས་གར་ལྔར་བགོད་ཡོད་པ་ལྟ་བུའོ།དེ་ནི་རང་རྒྱལ་གྱི་བྱང་ཕྱོགས་ཁུལ་དུ་དར་ཁྱབ་ཆེ་བའི་དམངས་ཁྲོད་ཀྱི་གླུ་ཆུང་གཞས་ཐུང་གི་རྨང་གཞིའི་ཐོག དབྱངས་རྟ་གཞན་དག་གི་ལེགས་ཆ་སྡུད་ལེན་བྱས་པ་དང་།ད་དུང་གར་སྟེགས་འཁྲབ་སྟོན་གྱི་ཉམས་མྱོང་ཡང་ཚུར་ལེན་བྱས་ནས་གྲུབ་པའི་རྣམ་དག་དང་རང་རྐྱ་ཕེར་བའི་ཟློས་གར་གྱི་རྣམ་པ་ཞིག་སྟེ།ཕྱིས་སུ་ཀོན་ཧན་ཆིང་དང་ཝང་ཧྲི་ཕུའུ།མ་ཀྲི་ཡོན་སོགས་ཀྱིས་ཀྱང་བསྒྱུར་བཅོས་དང་གསར་གཏོད་བྱས་ཤིང་རང་རྒྱལ་རྩོམ་རིག་ལོ་རྒྱུས་སྟེང་གི་གཟི་འོད་རྣམ་པར་བཀྲ་བའི་ནོར་བུ་ཞིག་ཏུ་གྱུར་ཡོད།སྤྱིར་བཏང་དུ་དགོད་བྲོའི་ཟློས་གར་ནི་ཀྲུང་གོའི་ཟློས་གར་གྱི་ཆུ་མགོ་འབྱུང་སའི་གངས་རིར་གཏུག་པར་བྱེད་ལ།རང་རྒྱལ་རྩོམ་རིག་བང་མཛོད་ནང་གི་རིན་ཐང་བྲལ་བའི་ཤུལ་རྫས་སུ་གྱུར་ཡོད་དོ།།
༢གྲིབ་གཟུགས་ཟློས་གར།
དེ་ནི་ཀོ་བའི་གྲིབ་གཟུགས་ཟློས་གར་དང་ཤོག་བུའི་གྲིབ་གཟུགས་ཟློས་གར་གྱི་གནའ་བོའི་མིང་སྟེ།སྒྲོན་འོད་ཀོ་བའམ་ཤོག་བུ་ལས་བྱས་པའི་མི་སྣའི་གཟུགས་བརྙན་དྲས་མའི་སྟེང་སྤྲོས་པ་བརྒྱུད།གཏམ་རྒྱུད་གང་ཞིག་འཁྲབ་སྟོན་བྱེད་པའི་ཟློས་གར་ཞིག་ལ་བྱ།སུང་རྒྱལ་རབས་ཀྱི་དུས་སུ་དར་མགོ་ཚུགས་པ་ནས་ད་ལྟའི་བར་སྒྱུ་རྩལ་གྱི་རྣམ་པ་འདི་ཉམས་དམས་སུ་མ་སོང་ལ།བརྗོད་བྱ་ཕལ་མོ་ཆེ་ལོ་རྒྱུས་བརྗོད་པ་དང་དམངས་སྲོལ་ངག་རྒྱུན་བརྗོད་པ་ཅན་ཡིན།གྲིབ་གཟུགས་ཀྱི་མི་དེ་ལས་སྣོན་བྱེད་སྟངས་ནི།སྤྱིར་པགས་པའི་ངོས་སུ་བཀྲག་རྩི་བསྐུས་རྗེས་མིའི་གཟུགས་སུ་བྱས་ཤིང་།རྐང་ལག་བཞི་དང་མགོའི་མཚམས་སུ་རྐྱོང་སྐུམ་གཡོ་སྒུལ་བྱེད་ཆས་སྤྲད་པར་མ་ཟད།ངོ་གདོང་ནས་རྐང་མཐིལ་བར་ཁྲ་རིས་བརྐོས་ཡོད་པ་དང་།ཚོས་མདོག་ཅན་གྱི་ཤོག་བུ་སྲབ་མོས་ཀྱང་རྒྱན་པར་བྱེད་ངེས།འཁྲབ་སྟོན་བྱེད་དུས་ངག་གི་དབྱངས་དང་བསྟུན་ནས་གྲིབ་གཟུགས་སྒུལ་བར་བྱེད་པས་ན།འཁྲབ་སྟོན་བྱས་པ་དོ་མཉམ་ཞིང་གསོན་ཉམས་མངོན་པར་བརྟེན།མང་ཚོགས་ཀྱིས་དགའ་བསུ་ཆེན་པོ་བྱེད་པ་རེད།
༣ས་གནས་ཟློས་གར།
དེ་ནི་ས་ཆ་ག་གེ་མོར་དར་ཆེ་ཞིང་ས་གནས་ཀྱི་བྲོ་བ་ཆེན་པོ་ཡོད་པའི་ཟློས་གར་རིགས་མང་བོའི་སྤྱི་མིང་སྟེ།རྒྱལ་ཡོངས་སུ་རྒྱུགས་ཆེ་བའི་ཟློས་གར་གྱི་རིགས་ལ་ལྟོས་འཇོག་གིས་བཏགས་ཤིང་།དེ་ལ་རིགས་མི་འདྲ་བ་སུམ་བརྒྱ་དྲུག་ཅུ་ཙམ་ཡོད།ད་ལྟ་ད་དུང་མུ་མཐུད་ནས་འཕེལ་རྒྱས་སུ་འགྲོ་བ་དང་འགྱུར་ལྡོག་འབྱུང་བཞིན་མཆིས།དེའི་ཁྱད་ཆོས་ནི་ས་གནས་རང་བཞིན་གྱི་སྐད་ཆ་མང་དུ་སྤྱོད་པར་མ་ཟད།ཐུན་མོང་མ་ཡིན་པའི་རོལ་མོའི་མ་ལག་དང་འཁྲབ་སྟོན་གྱི་ཁྱད་ཆོས་ཀུན་ནས་འཛོམས་པས་ན།ས་གནས་ཀྱི་བྲོ་བ་ཆེ་བར་བརྟེན་ས་དེ་དག་གི་མང་ཚོགས་ཀྱིས་དགའ་བསུ་ཆེན་པོ་བྱེད་དོ།།
༤དགོད་སློང་ཟློས་གར།
དེ་ལ་བསྟན་བཤིག་སློང་བའི་ཟློས་གར་ཞེས་སྒྱུར་བའང་ཡོད་ཅིང་།སྤྲོ་གར་གྱི་རིགས་སུ་གཏོགས་ལ།དེའི་འབྱུང་ཁུངས་ནི་གནའ་བོའི་ཀེ་རི་སེའི་ལྷའུའི་ཟློས་གར་ཡིན་ཅིང་།གནའ་བོའི་རོ་མའི་དུས་སུ་འཕེལ་རྒྱས་བྱུང་སྟེ་རྣམ་དབྱིབས་གཏན་ཁེལ་ཡིན་པའི་གདོང་འབག་གྱོན་པའི་མི་སྣ་ལྔས་འཁྲབ་སྟོན་བྱེད་བཞིན་ཡོད།དུས་རབས་བཅོ་ལྔ་པར་ཡོ་རོབ་གླིང་དང་ནང་སྒོས་སུ་ཧྥ་རན་སེ་རྒྱལ་ཁབ་ཏུ་དར་ཁྱབ་ཆེན་པོ་བྱུང་བར་མངོན།བརྗོད་བྱ་གཙོ་བོ་ནི་གྲོང་མིའི་རིམ་པའི་བསམ་བློའི་འཁྱེར་སོ་དང་འགལ་འབྲེལ་མངོན་སྟངས་སོགས་མཚོན་པར་བྱེད་ལ།བྱུང་རིམ་ལ་དགོད་བྲོ་རྩེད་མཚར་གྱི་ཁྱད་ཆོས་ཡོད་ལ།ལག་ཐབས་སུ་འུད་བརྗོད་ཀྱི་རྒྱན་སྤྱོད་པས།དུས་ཕྱིས་ཀྱི་སྤྲོ་གར་གསར་རྩོམ་གྱི་ཆ་ལ་ཤུགས་རྐྱེན་མི་དམན་པ་ཞིག་ཐེབས་ཡོད།ད་ལྟའི་དུས་འདིར་ཉམས་དམས་སུ་མ་སོང་བའི་དགོད་སློང་ཟློས་གར་༡༥༠ཡོད་པ་ལས།ཆེས་ཕུལ་དུ་བྱུང་བ་ནི་དུས་རབས་བཅོ་ལྔ་པར་ཧྥ་རན་སེར་བྱུང་བའི་《པེ་ཐེ་ལན་གྱི་དགོད་སློང་ཟློས་གར》ཡིན།