དེ་རིང་ངས་སྤྲིན་དཀར་མཐོང་བྱུང་།

 

             ཡུལ་ལ་ལོག་པའི་ལམ་བར་དུ།

                        —ཡང་ན་རང་བྱུང་གི་ངོ་བོར་སིམ་པའི་ཕ་ཡུལ་དྲན་སྟངས་ཤིག

                                                                     སྒྲེན་པོ།

    དར་འཕྱི་ལ་འཕེལ་དལ་བའི་འོ་སྐོལ་བོད་རྩོམ་གསར་བའི་འདས་སོང་གི་མི་ལོ་སུམ་བཅུར་ཕྱིར་མིག་ཅིག་འཕངས་ན།   བོད་རྩོམ་གསར་བ་འཕེལ་རྒྱས་ཀྱི་གོ་རིམ་ཁྲོད་དུ་རང་རེ་རླབས་ཆེན་གྱི་སྐྱེས་མ་ཚོས་ཀྱང་ཁོ་ཚོ་རང་ཉིད་ལ་དབང་བའི་གསར་རྩོམ་གྱི་སྡིངས་ཆ་ཞིག་བསྐྲུན་དང་སྐྲུན་བཞིན་པ་ནི་བོད་རྩོམ་གསར་བའི་ལས་དབང་སེམས་ཀྱིས་འཚོ་མཁན་ཞིག་ཡིན་ཙང་དགའ་བའི་གཡབ་མོ་སྒྲོན་སའི་གནས་འབའ་ཞིག་ཏུ་འཁུམ་འདོད།   ལྷག་དོན་རྩོམ་རིག་གསར་རྩོམ་གྱི་སེམས་ཤུགས་ནམ་ཞར་མ་ལྷོད་ཅིང་།   འགན་འཁྲིའི་འདུ་ཤེས་ཀྱིས་སེམས་རྒྱུད་ཀུན་ནས་བརླན་པའི་སྐྱེས་མ་སྙན་ངག་པ་འཆི་མེད་དང་དཔལ་མོ།བདེ་སྐྱིད་སྒྲོལ་མ་སོགས་ཀྱིས་མཚོན་པའི་བུད་མེད་སྙན་ངག་པའི་དཔུང་སྡེ་ཞིག་སོས་ཀའི་ལྗང་མྱུག་བཞིན་ཁད་ཀྱིས་འབུས་ནས་འོང་གིན་འདུག དཔུང་སྡེ་དེའི་ཁྲོད་ཀྱི་སྙན་ངག་པ་དཔལ་མོ་ལགས་ནི་གླེང་རིན་དང་དཔྱད་རིན་ཅི་ནས་ཆེ་བས།འདིར་ཆེད་དམིགས་ཀྱིས་ཁོ་མོའི་སྙན་ངག《དེ་རིང་ངས་སྤྲིན་དཀར་མཐོང་བྱུང་》ཞེས་པ་ཁོལ་དུ་ཕྱུང་ནས་དཔྱད་པ་རགས་ཙམ་བྱ་བ་ལ།

 

                                                        གཅིག ཐོག་མའི་མཐོང་ལམ་གྱི་“སྤྲིན་དཀར”།

སྙན་ངག་འདི་ནི་2010ལོའི《གངས་རྒྱན་མེ་ཏོག》དེབ་གསུམ་པར་འཁོད་འདུག སྙན་རྩོམ་འདིས་ང་ཚོ་ཀློག་པ་པོ་དག་ལ་ཀུན་རྟོག་འགྱུ་སའི་རང་དབང་གི་ནམ་མཁའ་མཐའ་བྲལ་བ་ཞིག་བཞེངས་ཡོད་པ་ཕུད།  དཀར་བོང་བོང་གི་ངོ་བོར་འཐིམ་པའི་རང་བྱུང་གི་ཡུལ་ཞིག་ཡིད་ཅན་རྩོམ་པ་པོའི་ནང་སེམས་ཀྱི་ཚོར་འདུ་དང་ཆུ་ལ་ཆུ་བཞག་པ་ལྟར་སྦྱར་ཐུབ་ཡོད་པ་ནི་སྙན་རྩོམ་འདི་ལེགས་འགྲུབ་བྱུང་བའི་གནད་ཀར་མཐོང་སྙམ།   སྤྱིར་སྙན་ངག་པ་ཕལ་མོ་ཆེ་ནི་དགའ་སྐྱོ་ཆགས་སྡང་གི་འདུ་ཤེས་མངོན་གསལ་དོད་པོ་ཡོད་པ་ཅན་དང་ཡང་ན་དགའ་སྐྱོ་ཆགས་སྡང་གི་ཚོར་བའི་རླབས་ཕྲེང་སེམས་ཁར་གཡེང་ནས་ཡོད་པ་དེ་རྐྱེན་དུས་དང་འཕྲད་ན་ལ་མོར་ཕྱི་རུ་འཕྱོ་རུང་དུ་མངའ་བ་ཞིག་ཡིན་དགོས།   དེ་བས་སྙན་ངག་པ་ནི་དགའ་དུས་དགོད་སླ་ལ་སྡུག་དུས་ངུ་སྤྲོ་བའི་ནང་སེམས་ཀྱི་འཇིག་རྟེན་དུ་གསོན་མཁན་ཡིན།གླེང་བྱར་གྱུར་བའི་སྙན་རྩོམ་འདིར་མཚོན་ནའང་ཐོག་མར་སྙན་ངག་པ་ཕ་ཡུལ་ལ་ལོག་པའི་ལམ་བར་དུ་སེམས་ཀྱི་འཆར་སྣང་མ་ལུས་ཚོར་ཤེས་ཀྱི་སྣེས་དྲངས་ཡོད་པ་བརྗོད་མི་དགོས་ལ།   ཚོར་འདུའི་སྒོ་མོ་ཁྲོག་སེར་ཕྱེས་མཁན་གྱི་ལྷན་ཅིག་བྱེད་རྐྱེན་ནི་རང་བྱུང་གི་ངོ་བོར་སིམ་པའི་དཀར་བོང་བོང་གི་སྤྲིན་དཀར་མ་ཡིན་ནམ།   སྤྲིན་དཀར་ནི་སྙན་ངག་པའི་ཀུན་རྟོག་འགྱུ་ཡུལ་ལམ་ཡང་ན་ཡིད་ཅན་ཁེན་སའི་རྟེན་གཞི་རུ་གྱུར་འདུག

 

རྒྱའི་སྙན་ངག་དཔྱད་བརྗོད་པ་གྲགས་ཅན་ཀྲོའུ་གོང་ཆན﹙朱光潜﹚ནས་བཤད་རྒྱུར།“མཚན་ཉིད་རིག་པ་ནི་བདེན་ལུགས་སམ་གནས་ལུགས་ཀྱི་མཐིལ་བརྟོལ་བའི་ཐབས་ལམ་ཞིག་རེད་ལ།   རྩོམ་རིག་སྒྱུ་རྩལ་ནི་སྣང་བརྙན་གྱི་ཚོགས་པར་བརྟེན་ནས་འཚོ་བ་ཚུར་སྣང་བ་ཞིག་ཡིན།   མཚན་ཉིད་རིག་པའི་ཁྲོད་ཀྱི་གནས་ལུགས་ནི་ཚྭ་ཆུའི་ནང་ནས་བཟའ་ཚྭ་འདོན་པ་བཞིན་ཚུགས་ཐུབ་གནས་ཐུབ་མོད།    སྒྱུ་རྩལ་རྩོམ་རིག་གི་བདེན་པ་དང་སྣང་བརྙན་ནི་ཚྭའི་ནང་ཆུ་བླུགས་པ་ལྟར་གསལ་བོར་དགར་མི་ནུས”།   འདི་ལས་ཤེས་སླ་བ་ནི་སྣང་བརྙན་གྱིས་རྩོམ་རིག་སྒྱུ་རྩལ་ཁྲོད་ཟིན་པའི་གོ་ས་དེ་རེད།    སྙན་ངག་འདི་ནི་མིག་ཤེས་སྣང་བརྙན﹙视觉形象﹚གཙོར་བཟུང་ནས་བྲིས་པ་ཞིག་ཡིན།   “སྤྲིན་དཀར”ནི་སྙན་རྩོམ་འདིའི་ཁྲོད་ཀྱི་མིག་ཤེས་སྣང་བརྙན་རེད།   མིག་ཤེས་སྣང་བརྙན་གྱིས་གསལ་བོར་སྟོན་བྱ་ནི་དངོས་པོའི་ཆ་ལུགས་དང་ཁ་མདོག   མཐོ་དམའ།   རིང་ཐུང་སོགས་ཡིན་པས།   སྙན་རྩོམ་འདིར་སྤྲིན་པའི་ཁ་མདོག་དང་ཆ་ལུགས།   མཐོ་དམའ་སོགས་གསལ་སྟོན་བྱས་ཡོད་པ་ནི་རེ་རེ་བཞིན།  སྤྲིན་པ་དཀར་པོ།   དུང་མདོག་གི་སྤྲིན་དཀར།   བྱ་ཆེན་གྱི་གཤོག་ཟུང་བརྐྱངས་འདྲའི་ཤར་གྱི་སྤྲིན་དཀར།   གླང་ཆེན་གྱི་སྣ་ཞགས་གུག་འདྲའི་ནུབ་ཀྱི་སྤྲིན་དཀར།   སྤྲིན་དཀར་གྱི་ཚོམ་བུ་སྦྲ་ནག་གི་ཁ་ཚུབ་ལས་བཞད་དེ།   རི་ལུང་ཐང་གསུམ་གྱི་གཡང་དཀར་ལུག་ཁྱུར་འདྲེས་པ་བཅས་ཡིན་པར་འདོད།   བརྗོད་པར་འདོད་པའི་ཡིད་ཅན་གྱི་བརྡ་འཕྲིན་གང་ཞིག་ཕྱི་རོལ་ཡུལ་གྱི་ཆོས་ག་གེ་མོའི་སྟེང་འཕོ་རུ་བཅུག་ཐོག ཕྱི་རོལ་གྱི་ཆོས་འབྲི་བའི་ཤུགས་ནས་རྩོམ་པ་པོའི་ནང་སེམས་ཀྱི་འགྱུར་བ་མཚོན་རྒྱུ་ནི་རྩོམ་རིག་སྤྱིའི་ཆོས་ཉིད་དུ་འདོད་ན།    སྙན་རྩོམ་འདིར་མཚོན་ནའང་རྩོམ་པ་པོས་བརྗོད་འདོད་ཀྱི་ཚོར་འདུ་མ་ལུས་སྤྲིན་དཀར་གྱི་སྟེང་དུ་འཕོས་ཏེ་རྗེན་པར་བསྟན་ཡོད།   འོ་ན་ང་ཚོའི་མཐོང་ལམ་ན་རྒྱུ་བའི་ཐོག་མའི “སྤྲིན་དཀར” གྱི་རྣམ་པ་ནི་ག་འདྲ་ཞིག་རེད་ཅེ་ན།   དེ་ནི་གསལ་དྭངས་དྭངས་ཀྱི།    དཀར་ བོང་བོང་གི་ངོ་བོར་སིམ་པའི་རང་བྱུང་གི་མཛེས་པ་ཞིག་རེད།   “དེ་རིང་ངས་ཨ་སྔོན་དང་སྤྲིན་དཀར་མཐོང་བྱུང་།    ཡུན་རིང་ལ་བོར་བའི་དྭངས་གཙང་གི་ཁ་དོག་མཐོང་བྱུང་།”   ང་ཚོར་འདི་ལྟ་བུའི་རང་བྱུང་ཁམས་ཀྱི་མཛེས་པར་འཁྱུད་རྒྱུའི་བགོ་སྐལ་ནི་བཟོ་ལས་གྲོང་ཁྱེར་དང་བཀྱེད་པའི་ཕ་ཡུལ་ན་མ་གཏོགས་ཡོད་པ་མ་རེད།  དེ་བས།   རྣོ་ལྕགས་དང་ཨར་འདམ་གྱི་ཁུད་ནས་འགྲེ་ལྡོག་རྒྱག་ཅིང་བྲེལ་ཟིང་དང་འབག་བཙོག་གི་ངོ་བོར་འཐིམས་ཚར་བའི་གྲོང་ཁྱེར་གྱི་བོད་མི་ཞིག་ལ་མཚོན་ནས་བཤད་ན།   ལྷིང་འཇགས་དང་དྭངས་གཙང་གི་གཤིས་སུ་བཞེངས་པའི་ཕ་ཡུལ་ནི་སེམས་ངལ་གསོ་བྱེད་མཆོག་ཅིག་ཏུ་སེམས་ངེས་ཡིན།

 

                                                       གཉིས།“སྤྲིན་དཀར”གྱི་ཀློང་ན་འཕྱོ་བའི་སེམས་འགྱུ།

“སྤྲིན་དཀར”གྱི་ཀློང་ན་འཕྱོ་ཞིང་ལྡིང་གིན་པ་ནི་ནམ་ཡང་འཇགས་ཐབས་བྲལ་བའི་རྩོམ་པ་པོའི་ནང་སེམས་ཀྱི་དགའ་སྐྱོ་ཆགས་སྡང་རེད།    ཕ་ཡུལ་གྱི་ནམ་མཁའ་ནས་འཕྱུར་མྱོང་བའི་སྤྲིན་དཀར་ལས་རྩོམ་པ་པོས་ཕ་ཡུལ་གྱི་ལུག་ཁྱུ་དྲན་བྱུང་ལ།   ལུག་བལ་འབྲེག་པར་བྲེལ་བའི་ཨ་ཕ་དང་ཞོ་གསར་བསྙལ་བར་འདྲིས་པའི་ཨ་མའི་བཟོ་ལྟ།   ད་དུང་མཐིང་མདོག་གི་ནམ་མཁའ་དང་གསེར་མདོག་གི་ཉི་མ།གཡུ་མདོག་གི་ས་གཞི་བཅས་གཟུགས་ཅན་བཞིན་སེམས་ཀྱི་མཁའ་དབྱིངས་ལ་སིལ་སིལ་བབས་འོངས།   འོད་ལམ་ལམ་དུ་འཕྲོ་བའི་གསེར་མདོག་གི་ཉི་མ་དང་།   སྔོ་ཡུག་ཡུག་ཏུ་བཀྲམ་པའི་མཐིང་མདོག་གི་ནམ་མཁའ །   ལྗང་ལྡེམ་ལྡེམ་དུ་གཡོ་བའི་གཡུ་མདོག་གི་ས་གཞི་བཅས་ཀྱི་རང་བྱུང་མཛེས་པར་འཁྱུད་པའི་ཕ་ཡུལ་གྱི་ལུག་ཁྱུ་དང་ལུག་ཁྱུར་བརྟེན་ནས་འཚོ་བ་རོལ་བར་གོམས་པའི་འོ་སྐོལ་མི་རིགས་འདིར་མཚོན་ན།   གོང་གསལ་རང་བྱུང་གི་སྣང་ཚུལ་འདི་དག་ནི་གདོད་ནས་མ་འགྱུར་བའི་ཕྱིའི་སྣོད་ཀྱི་བཀོད་པ་དང་ནང་བཅུད་སེམས་ཅན་གྱི་འཚོ་བ་སྐྱལ་སྟངས་རྣལ་མར་འགྲོ གྲོང་ཁྱེར་ཅན་དང་གྲོང་ ཁྱེར་རིག་གནས་ཀྱི་རླབས་རྒྱུན་གྱིས་གདོད་མ་ནས་རང་བྱུང་ལ་གོམས་པའི་འོ་སྐོལ་མི་རིགས་འདིའི་འཚོ་བ་སྐྱེལ་སྟངས་དང་།   མཛེས་དཔྱོད་ལྟ་གྲུབ།   ཡུལ་སྲོལ་གོམས་གཤིས་སོགས་ལ་བརྡབ་གསིག་དང་གཡོ་སྐྱོམས་སྟེར་ངེས་པ་ནི་དུས་རབས་ཀྱི་རླབས་རྒྱུན﹙时代潮流﹚ངོས་ནས་བལྟས་ན་ཟློག་ཏུ་མེད་པའི་ཆོས་ཉིད་དུ་གྲུབ་འདུག་སྙམ།

     སྙན་ངག་པ་ནི་དུས་རབས་ཀྱི་བསམ་བློའི་སྔོན་བསྐྱོད་པ་དང་རྟོགས་སད་པ་ཡིན་ཞེས་པ་ལྟར།ཉེན་ཚབས་ཀྱི་འདུ་ཤེས་ཐོག་མ་སྐྱེས་མཁན་ཡང་སྙན་ངག་པ་ཡིན་ལ།དུས་རབས་ཀྱི་གོམ་སྒྲ་ཐོག་མ་ཐོས་མཁན་ཡང་སྙན་ངག་པ་ཡིན།  དེ་བས་ན།   སྙན་རྩོམ་འདིའི་ཁྲོད་ཀྱི“ལག་ནག་ཅིག་གིས་ཨ་སྔོན་བསུབས་ཤིང་སྤྲིན་དཀར་བསྣོགས་ཏེ།   ནར་མ་སོན་པའི་བྱིས་པ་ཚོའི་སེམས་པ་ལང་ལོང་བར་བསྒྱུར་བས。。。。。。”ཞེས་པའི་སྙན་ཚིག་ཚན་པ་འདི་བྱུང་བ་རེད།   ཚན་པ་འདིས་ནར་སོན་གྱིན་པའི་བྱིས་པ་ཚོའི་མཐོང་ལམ་གྱི་སྤྲིན་དཀར་དང་རྩོམ་པ་པོས་སྤྲིན་དཀར་ལ་ངོས་འཛིན་ཚུལ་གཉིས་བསྡུར་བའི་ཤུགས་ནས།   ལོ་རབས་སྔ་ཕྱི་མི་འདྲ་བ་གཉིས་ཀྱི་སྣང་ངོའི་ཕ་ཡུལ་འགྱུར་བཞིན་པ་དེ་བསྟན་ཡོད་སྙམ།   ལྷིང་འཇགས་དང་དྭངས་གཙང་གི་ངོ་བོ་ནས་ལྗན་ལྗིན་དང་མྱགས་སྙིགས་ཅན་དུ་འགྱུར་གྱིན་པ་དེ་རེད།ཉེན་ཚབས་ཀྱི་འདུ་ཤེས་འདི་ནི་དུས་རབས་ཀྱི་རྔམ་ཟིལ་གྱིས་བསྐྲུན་ནམ་ཡང་ན་ཕ་ཡུལ་གྱི་སོ་ན་གནས་པའི་ལྷིང་འཇགས་ཀྱིས་བསྐྲུན།   ཡང་ན་དེ་ལས་གཞན་པའི་འདུ་ཤེས་འཛིན་སྟངས﹙意识形态﹚ཤིག་གིས་བསྐྲུན་ནམ།གང་ལྟར་ལག་ནག་ཅེས་པའི་ཡིད་བརྙན﹙意象﹚འདིས་ཡོད་ཚད་གབ་སྦས་ཀྱི་ཚུལ་གྱིས་བསྡུས་འདུག་སྙམ།      གཞན་ཡང་སྙན་རྩོམ་འདིའི་རྟོག་ཡུལ་ལམ་ཁམས﹙意境﹚དེ་ཐོག་མའི་དོག་མོ་ཡི་རྣམ་པ་ནས་ཡངས་པ་ཅན་དུ་བསྒྱུར་ཡོད་པར་འདོད།   ཐོག་མའི་དྭངས་གཙང་གི་ངོ་བོ་ནས་བར་གྱི་ལག་ནག་ཅིག་གིས་ཨ་སྔོན་བསུབས་ཤིང་སྤྲིན་དཀར་བསྣོགས་པ།   མཐའ་མའི་ཕ་ཡུལ་གྱི་རི་ཆུ་སྤང་ཐང་བཞིན་འགྱུར་ཉེན་ཆེ་བའི་སྤྲིན་དཀར་བཅས་ཀྱི་ཚོར་བ་དང་བརྩེ་དུངས་ཀྱི་འཕྱོ་འཇགས་སམ་འཕར་ལྡིང་གི་ཆ་དེ་ལས་མངོན་པར་རྟོགས་སླ་སྙམ།   སྙན་ངག་གི་རྟོག་ཡུལ་ལམ་ཁམས་ཞེས་པ་ནི་སྙན་ངག་པའི་རང་སྣང་གི་འཇིག་རྟེན﹙主观世界﹚དང་ཕྱི་རོལ་ཡུལ་གྱི་འཇིག་རྟེན﹙客观世界﹚གཉིས་སྙན་ངག་བརྩམས་ཆོས་དང་མཐུན་འཇུག་གིས་གྲུབ་པའི་སྒྱུ་རྩལ་གྱི་རྟོག་ལྗོངས་དེ་ལ་ཟེར་བ་ཡིན་པས།སྙན་ངག་གི་ཁམས་རྐྱང་བའི་ངོས་ནས་བཤད་ན་སྙན་རྩོམ་འདིར་གསལ་དྭངས་དྭངས་ཀྱི།   དཀར་བོང་བོང་གི་ཁྱད་ཆོས་མངོན་གསལ་ལྡན་ཡོད་པ་ཕུད།ཡིད་ཅན་པའི་དྲན་གདུང་གི་བརྩེ་བ་རྣལ་མ་དང་ཡུལ་“སྤྲིན་དཀར”རང་སྟེང་གི་དྭངས་གཙང་གི་ཆ་གཉིས་ཆུ་ལ་ཆུ་བཞག་པ་ལྟར་ངོ་བོ་གཅིག་ཏུ་གྲུབ་འདུག འདི་ནི་སྙན་རྩོམ་འདི་ལེགས་འགྲུབ་བྱུང་བའི་གནད་ཀར་མཐོང་སྙམ།  

ཆུ་ལ་ཆུ་བཞག་པ་ལྟར་དྭངས་གཙང་དང་ཕྱི་གསལ་ནང་གསལ་གྱི་མཁའ་དབུགས་ཤིག་གིས་སྙན་རྩོམ་འདི་ཕྱི་རིམ་ནང་རིམ་བྱས་ཏེ་བཏུམས་ཡོད་པ་དེས་སྙན་རྩོམ་འདིའི་ཁམས་སམ་རྟོག་ཡུལ་གྱ་ནོམ་པ་ཞིག་བཞེངས་བར་དགེ་མཚན་ཐོན་འདུག་སྙམ།  སྙན་ངག་རང་སྒྱུ་རྩལ་བརྩམས་ཆོས་གཞན་པ་དང་མི་འདྲ་བའི་གནད་ཀ་གཅིག་ནི་སྙན་ངག་ལ་དབྱངས་ཀྱི་འདེགས་འཇོག་གསལ་བས་ཡིན།   འོ་ན་སྙན་ངག་གི་དབྱངས་འགྲོས་ཞེས་པ་དེ་ག་འདྲ་ཞིག་ཏུ་གོ་དགོས་སམ་ཞེ་ན།   སྙན་རྩོམ་གྱི་སྐད་ཆའི་སྦྱོར་བ་གང་ཆོས་ཉིད་ངེས་ཅན་ཞིག་དང་བསྟུན་ནས་དེས་སྙན་ངག་པའི་ཚོར་འདུའི་དྲག་ཞན་དང་རྐྱོང་སྐུམ།  གྲིམ་ལྷོད།  འཕར་འཇགས་སོགས་ཀྱི་ཚད་མངོན་གསལ་ཅན་དུ་གཏང་བར་རོལ་དབྱངས་ཀྱི་བྱེད་ནུས་ཐོན་པ་ཞིག་ལ་གོ་ཞིང་།   རོལ་དབྱངས་ཀྱི་འདེགས་འཇོག་དེ་ཡང་ཕྱིའི་ཚིག་སྦྱོར་གྱི་སྡེབ་སྟངས་ཁོ་ནའི་དབྱངས་འགྲོས་མ་ཡིན་པར་དེ་ལ་སྙན་ངག་པའི་ཚོར་བའི་རྒྱུན་གྱི་གདངས་དབྱངས་ཡང་སིམ་ནས་ཡོད་པ་ཞིག་ཏུ་ངོས་འཛིན་བྱས་ན་འགྲིག་པས།དབྱངས་འགྲོས་ལ་ཕྱི་ནང་གི་ཁྱད་པར་འབྱེད་རྒྱུ་གལ་ཆེ་རེད་སྙམ།དབྱངས་འགྲོས་ཀྱིས་སྙན་ངག་བརྩམས་ཆོས་ཁྲོད་སྙན་ངག་གི་མཛེས་ཚོར﹙美感﹚ཇེ་དྲག་ཏུ་བསྐྱེད་པར་བྱེད་ནུས་འདོན་ན།    གླེང་བྱར་གྱུར་བའི་སྙན་རྩོམ་འདིས་ཕྱི་ནང་གཉིས་ཀྱི་དབྱངས་འགྲོས་ལ་དང་དོད་བྱས་པ་ཧ་ཅང་ལེགས་འདོད།    ཐོག་མའི་མཐོང་ལམ་གྱི་དཀར་བོང་བོང་གི་ངོ་བོར་འཁྱིལ་བའི་སྤྲིན་དཀར་ནས་བར་གྱི་སྤྲིན་དཀར་གྱི་ངོ་བོའི་སྟེང་གི་འགྱུར་བ།   མཐའ་མའི་སྤྲིན་དཀར་གྱི་ཉེན་ཚབས་དང་།    ཐོག་མའི་དྭངས་གཙང་དང་ལྷིང་འཇགས་ཀྱི་ངོ་བོར་འཐིམས་པའི་ཕ་ཡུལ་ནས་བར་གྱི་ལྗན་ལྗིན་དང་བྲེལ་ཟིང་གི་ངོ་བོར་འཕོས་ཚུལ།མཐའ་མའི་ཉེན་བརྡ་དང་སེམས་ཁྲེལ་བཅས་ཀྱི་འབྲེལ་བ་སྙོམས་སྒྲིག་བྱས་པ་ལེགས་འདུག

                                                  གསུམ། “སྤྲིན་དཀར”དང་ཉེན་བརྡ།

ཕ་ཡུལ་ནི་སྙན་ངག་པ་འཚར་ལོངས་བྱུང་ས་ཡིན་པས།སྙན་ངག་པས་ཕ་ཡུལ་དྲན་པའི་གདུང་སེམས་ཀྱི་ཁུད་དུ་ཕ་མ་ཉེ་འབྲེལ་དང་ཕུ་ནུ་མིང་སྲིང་།   ད་དུང་དེ་ལས་རྒྱ་ཆེ་བའི་མི་རིགས་ཀྱི་རུས་ཞེན་དང་དགའ་ཞེན།  མིའི་རིགས་ཀྱི་ཚེ་སྲོག་གི་རིན་དོད་དང་བདེན་དོན་བཅས་གཅུད་ཡོད་པ་ནི་སྨྲོས་མ་དགོས།   སྙན་ངག་པས་“སྤྲིན་དཀར”གྱི་ངོ་བོ་འགྱུར་བ་ལས་ཕ་ཡུལ་གྱི་ངོ་གདོང་འགྱུར་གྱིན་པ་ཚོར་བཞིན་ཡོད།བྱིས་པ་ཚོ་ལག་ཆགས་པའི་གོ་རིམ་ཁྲོད་དུ་འབོར་གྱིན་པའི་“སྤྲིན་དཀར”གྱི་རང་མདངས་དང་།  “གཟུགས་མེད་ཀྱི་བང་མཛོད་ཆེན་པོ་དེའི་མངའ་ཐང་།  ད་དུང་གཉེན་ཉེ་སྤུན་ཟླ་ཚོའི་ཐབས་ཟད་འུ་ཐུག་གི་ངོ་གདོང་དང་སྐྱེས་དཔུང་རྗོགས་མ་ནུས་པའི་རྩྭ་ཕྲན་དག་གི་ལས་དབང་བཅས་རེ་རེ་བཞིན་ཚོར་གྱིན་ཡོད།དེ་ལས་ཀྱང་ཉེན་ཁའི་ཚོར་བ་ཞིག་སྐྱེས་ཀྱིན་པ་ནི་ཕ་ཡུལ་གྱི་རི་ཆུ་སྤང་ཐང་བཞིན་འགྱུར་ཉེན་ཆེ་བའི་སྤྲིན་དཀར།   དུས་ནམ་ཞིག་མ་འོངས་ལོ་རྒྱུས་ཀྱི་གླེགས་བམ་དུ་འཁོད་ཚེ།   བུ་རྒྱུད་ཚོས་ཕ་ཡུལ་དང་ཕ་ཡུལ་གྱི་ཁ་དོག་ངོས་ཟིན་ནམ།”ཞེས་པའི་ཉེན་བརྡ་དེ་མ་ཡིན་ནམ།   འདི་ནི་སྙན་ངག་པས་རང་ཉིད་ཀྱི་བླ་སྲོག་ལ་བཏང་བའི་ཉེན་བརྡ་ཞིག་ཡིན་ལ།ང་ཚོ་ཀློག་པ་པོ་དག་ལ་སྦྲན་པའི་བསམ་གཞིག་གི་བར་སྟོང་གཏོས་ཆེ་བ་ཞིག་ཀྱང་ཡིན་ངེས།

 

                                                  བཞི། མཇུག་བསྡུ་བ།

མཇུག་ཏུ་ཞུ་རྒྱུ་ཞིག་ལ།སྙན་ངག་ནི་སྡོམ་ཚིག་གསལ་བོ་ཞིག་གི“ཕར་བཤད”མ་ཡིན་པར།   དྲི་བསུང་ལྟ་བུའམ།   སྨིག་སྤྲིན་ལྟ་བུའམ།ཡང་ན་ནམ་མཁའ་ལྟ་བུའི་མཐའ་གསལ་བོ་བཅད་དུ་མིན་པ་ཞིག་ཡིན་ན་འགྲིག རྩོམ་རིག་བརྩམས་ཆོས་ནི་ནམ་མཁའ་བཞིན་ཇི་ལྟར་ཐར་བཅད་ན་དེ་ལྟར་འགྲེམ་རྒྱུ་ཡོད་པའི་བདག་ཉིད་ཅིག་ཡིན་ན།    ངས་འདིར་རང་གི་མྱོང་ཚོར་གྱི་ངོས་ནས་སྣེ་ཙམ་སྟོན་པ་ལས་ཆ་རྫོགས་པར་བཤད་མི་ཐུབ་པ་གདོན་མི་ཟ་ཞིང་།    དེ་ཡང་སྙན་རྩོམ་གྱི་དགོངས་དོན་དངོས་དང་མཐུན་སྲིད་ལ་མི་མཐུན་ཡང་སྲིད།   ཡང་ན་དེ་ལས་འདས་པའི་བརྗོད་དོན་གཞན་ཞིག་ཀྱང་ཡོད་ཆོག་གོ །