གི་གནད་དོན་རེ་ལ་སྡོམ་ཚིག་རེ་བཀོད་པ་དང་།སྡོམ་ཚིག་དེ་རྣམས་ལ་དེང་རབས་སྒྲུང་གཏམ་གྱི་སྣང་ཚུལ་ལ་ཤས་མཚོན་པའི་སྡོམ་ཚིག་འགའ་ཞིག་གིས་རིམ་བཞིན་བརྩམས་ཆོས་དངོས་ལ་གཞིགས་ཏེ་གནས་ལུགས་ཞིབ་ཏུ་མརྗོད་པས།སྡོམ་ཚིག་རྣམས་ནི་སྡོམ་ཚིག་ཙམ་དུ་ལུས་ཏེ་གསལ་བཤད་ཀྱི་ནུས་པ་དེ་ཙམ་མེད་པར་གྱུར།འདི་ལྟར་སྤྲོས་བརྗོད་བྱས་པ་ན།ཀློག་མཁན་ཕལ་མོ་ཆེ་ལ་ཚོགས་ཆེན་གལ་ཆེན་སྐབས་ཀྱི་སྦྱོར་ཡིག་རིགས་མཐུན་རྣམས་ཕྱོགས་གཅིག་ཏུ་བསྡུས་པར་བལྟས་པའི་ཚོར་སྣང་ཞིག་དང་དེ་འདྲ་ནི་དགོས་མཁོ་མེད་པའི་སྣང་བ་ཞིག་སྟེར་བ་ལས་བློ་སྐྱེས་སྔ་ན་མེད་པ་ཞིག་ནི་འབྱུང་དཀའ་བ་འདྲ།དཔེར་ན།ཐུན་མོང་དུ་གྲུབ་པའི་ཉམས་མྱོང་གིས་བྱེ་བྲག་གི་ཉམས་མྱོང་གསོན་ཉམས་ལྡན་པ་དག་བཅོམ་པ་དང་།སྒྲུང་གཏམ་གྱི་བརྗོད་བྱ་རིགས་གཅིག་དེ་སྔར་བས་རྒྱ་ཆེ་བ་དང་གཏིང་ཟབ་པར་སྔོག་འདོན་བྱེད་མི་ཐུབ་ཅེས་པ་དང་།《ལྷགས་རླུང》ལས་མངོན་པ་ཡང་ཐུན་མོང་གི་བག་ཆགས་དེ་ལས་དམིགས་བསལ་གྱི་ཚོར་བ་ཅང་མི་འདུག་ཅེས་པ་དང་།《ལྷགས་རླུང》གི་ཁྲོད་ཀྱི་མི་སྣ་ཁོ་ཡི་མཐོང་སྣང་ལས་བྱུང་བའི་ཉམས་མྱོང་དག་ཀྱང་དམིགས་བསལ་དང་བྱེ་བྲག་པའི་ཁྱད་ཆོས་གང་ཡང་མི་འདུག་ལ་ཞེས་པ་དང་།《ལྷགས་རླུང》ལྟ་བུར་མཁོ་བའང་ཞིང་རྣང་མའི་ཕྱི་ནང་དང་ཐབ་གོ་ཁའི་ཐོག་ཞོལ་སོགས་ཀྱི་འཚོ་བ་བྱེ་བྲག་པ་དང་ཉམས་མྱོང་ཐུན་མིན་པ་དག་ཡིན་ལ།ཡིན་ཀྱང་འོས་སོ་ཞེས་པ་ལྟ་བུའི་སྡོམ་ཚིག་རྣམས་འགོད་སྐབས།གལ་སྲིད་གཞུང་རྟ་བསྐྱུར་ཏེ་ཡལ་ག་ལ་མི་འཇུ་བར་སྐབས་སུ་བབ་པའི་བརྩམས་ཆོས་ཉིད་ལ་གཞིར་བཅས་ཏེ།ཐུན་མོང་དུ་གྲུབ་པའི་ཉམས་མྱོང་གིས་བྱེ་བྲག་གི་ཉམས་མྱོང་གསོན་ཉམས་ལྡན་པ་དག་ཇི་ལྟར་བཅོམ་པ་དང་།ཁོ་ཡི་མཐོང་སྣང་ལས་བྱུང་བའི་ཉམས་མྱོང་དག་ལ་དམིགས་བསལ་དང་བྱེ་བྲག་པའི་ཁྱད་ཆོས་ཇི་ལྟར་མེད་པ།དེ་མིན།《ལྷགས་རླུང》གིས་ཞིང་རྣང་མའི་ཕྱི་ནང་དང་ཐབ་གོ་ཁའི་ཐོག་ཞོལ་སོགས་ཀྱི་འཚོ་བ་བྱེ་བྲག་པ་དེ་དང་ཉམས་མྱོང་ཐུན་མིན་པ་དག་ཇི་ལྟར་མཚོན་མེད་པ་དང་།ཇི་ལྟར་མཚོན་ན་ལེགས་པ་དེ་བརྩམས་ཆོས་དངོས་ལ་བརྟེན་ནས་གནས་ལུགས་གང་ཡིན་ཞིབ་ཏུ་བརྗོད་ན།སྡོམ་ཚིག་རྣམས་ལ་གནས་ལུགས་ཀྱི་ཟིལ་ཤུགས་ལྡན་པར་འགྱུར་བ་དང་།《ལྷགས་རླུང》ཟེར་བའི་སྒྲུང་ཐུང་དེ་ལ་སྐྱོན་བརྗོད་གནད་དུ་ཕོག་པ་ཞིག་བྱེད་ཐུབ་པར་མ་ཟད།རྩོམ་མཁན་དང་ཀློག་མཁན་གཉིས་ཀ་ལའང་བློ་སྐྱེད་མི་དམན་པ་ཞིག་འབྱུང་ངེས་ཡིན།མཚམས་འདིར་གསལ་བཤད་བྱེད་དགོས་པ་ཞིག་ནི།བློ་མཐུན་ཨ་བུ་ལགས་ཀྱིས་སྡོམ་ཚིག་དེ་དག་འགོད་སྐབས།སྐབས་རེར་དེང་རབས་སྒྲུང་གཏམ་གསར་རྩོམ་ཐད་ཀྱི་སྣང་ཚུལ་རེ་འདྲེན་པ་དང་།མཚམས་རེར་གསུང་རྩོམ་གྲགས་ཅན་གྱི་བཞེད་དགོངས་བཀོད་འདུག་མོད།ཀློག་མཁན་རྣམས་ལ་གསལ་བ་ལྟར།སྣང་ཚུལ་མང་བོ་ཞིག་གིས་སྡོམ་ཚིག་དེ་ལ་གསལ་བཤད་ཀྱི་ནུས་པ་འདོན་མི་ཐུབ་པར་མ་ཟད།ནང་འགལ་དུ་སོང་བའི་སྐབས་ཀྱང་གདའ།
གཉིས་པ།ལྟ་བ་འཁྲུགས་པའི་སྐྱོན།
རྩོམ་ལུས་མི་འདྲ་བའི་བརྩམས་ཆོས་གང་ཞིག་ཡིན་རུང་།ཚིག་སྦྱོར་བརྡ་སྤྲོད་དང་མི་མཐུན་པ་དང་།རྩོམ་མཁན་གྱི་ལྟ་བ་འཁྲུགས་པའི་དབང་གིས་དོན་སྔ་ཕྱི་ལ་འབྲེལ་མ་ཆགས་ན།འབྲི་མཁན་ལ་ནི་ཅི་ཞིག་བརྗོད་སོང་སྙམ་པའི་འཕྲུལ་སྣང་གི་གདེང་ཚོད་ཅིག་ཡོད་རུང་།ཀློག་མཁན་ཕལ་མོ་ཆེ་ཡིས་འབྲི་མཁན་གྱི་བསམ་དོན་དེ་ཇི་བཞིན་རྟོགས་དཀའ་བས།གོལ་ས་འདིའི་རིགས་ལ་པར་ཐོགས་རྣམས་ཀྱིས་ནམ་ཡང་གཟབ་གཟབ་བྱེད་དགོས་པའི་གནད་དམ་པ་ཞིག་ཏུ་གྱུར་འདུག བློ་མཐུན་ཨ་བུ་ལགས་ཀྱི《སྒོ་འགྲམ་གྱི་འགྲུལ་བ་གཏོལ་མེད།》ལ་ཆ་མཚོན་ན།ཚིག་སྦྱོར་ཐད་དུ་བོད་མི་རང་ལ་བརྗོད་ལུགས་འདི་འདྲ་ཡོད་དམ་སྙམ་པའི་དོགས་གནས་རེ་གཉིས་མཆིས་པར་མ་ཟད།ལྟ་བ་འཁྲུགས་ཏེ་དཔྱད་རྩོམ་ལ་དོན་སྔ་ཕྱི་འབྲེལ་མི་ཆགས་པའི་ནོར་སྐྱོན་མི་ཉུང་བ་འདུག་ཅེས་བཤད་རུང་།སྒྲོ་འདོགས་ལ་བརྟེན་ནས་དཔྱོད་མཁན་ལ་ཁྱད་གསོད་བྱས་པའི་གཏམ་ཡན་གནས་ལུགས་མེད་པ་ཞིག་གང་དྲན་དྲན་དུ་བརྗོད་པའི་སྣང་ཚུལ་ནི་འབྱུང་མི་སྲིད་པ་འདྲ་སྟེ།དེ་ལྟར་ཡིན་པའི་རྒྱུ་མཚན་ནི་གཤམ་གྱི་གནས་ལུགས་འགའ་ལས་ཀྱང་ལེགས་པར་རྟོགས་ཐུབ།དཔེར་ན།བློ་མཐུན་ཨ་བུ་ལགས་ཀྱིས་《སྒོ་འགྲམ་གྱི་འགྲུལ་བ་གཏོལ་མེད》ཅེས་པ་མགོ་བརྩམས་མ་ཐག་རང་རེའི་སྒྲུང་གཏམ་པ་ཕལ་མོ་ཆེས་མི་སྒེར་གྱི་མཐོང་ཐོས་མྱོང་གསུམ་ལས་འདས་ཤིང་ཐུན་མོང་སྤྱི་ལ་ཡོད་པའི་ཉམས་མྱོང་སྟེ།འདས་ཟིན་གྱི་གནའ་གཏམ་མི་རབས་ནས་མི་རབས་དང་ངག་ནས་ངག་ཏུ་བརྒྱུད་པའི་ས་བོན་གང་རུང་བརྗོད་གཞིར་བྱས་ཐོག་ཅེས་བཀོད་འདུག་ལ།སྒྲུང་གཏམ་རྩོམ་མཁན་ཞིག་ལ་མཚོན་ན།མི་སྒེར་གྱི་མཐོང་ཐོས་མྱོང་གསུམ་གལ་ཆེ་བ་ནི་ཧ་ཅང་བདེན།འདས་ཟིན་པའི་གནའ་གཏམ་ཞིག་ཡིན་ན་རྩོམ་མཁན་གྱིས་མཐོང་ཐབས་དང་མྱོང་ཐབས་མེད་རུང་།
ངག་སྒྲོས་དེ་ངག་ནས་ངག་ཏུ་བརྒྱུད་དེ་སྒྲུང་གཏམ་གྱི་བརྗོད་བྱར་གྱུར་ཡོད་ན།དེ་ནི་ཁྱོད་ཀྱི་མཐོང་ཐོས་མྱོང་གསུམ་གྱི་ཐོས་པའི་གྲས་སུ་མི་གཏོགས་པའི་རྒྱུ་མཚན་ནི་ཅི་ཡིན།ལྷག་པར།འདས་ཟིན་པའི་གནའ་གཏམ་ཡིན་ན་ཐུན་མོང་སྤྱི་ལ་ཡོད་པའི་ཉམས་མྱོང་ཡིན་པའི་ངེས་པ་ནི་གཏན་ནས་མེད་དེ།རྒྱུ་མཚན་ནི།ཡུལ་གྲུ་སོ་སོར་ངག་སྒྲོས་ཐུན་མོང་མ་ཡིན་པ་སྣ་ཚོགས་མཆིས་པར་མ་ཟད།ངག་ནས་ངག་ཏུ་བརྒྱུད་པའི་འདས་ཟིན་པའི་གནའ་གཏམ་གཅིག་ལའང་འཆད་མཁན་གྱི་འདོད་བློ་བསྲེས་ཏེ་གནས་ཚུལ་གཅིག་ལ་བཤད་ལུགས་སྣ་ཚོགས་བྱུང་བ་ན།ངག་སྒྲོས་ཡོད་ཚད་ནི་ཐུན་མོང་སྤྱི་ལ་ཡོད་དེ་གཏན་ནས་མེད་དོ།།འདས་པ་ཐམས་ཅད་ཐུན་མོང་གི་ཉམས་མྱོང་ཡིན་པའི་ལྷ་བ་དེ་མཁྲེགས་འཛིན་བྱས་ཏེ《ལྷགས་རླུང》གི་བརྗོད་བྱའང་ཐུན་མོང་གི་ཉམས་མྱོང་ཡིན་པར་བརྗོད་ན།རིག་གནས་གསར་བརྗེ་ཆེན་པོའི་སྐབས་སུ།བོད་ཀྱི་ཁྱིམ་ཚང་ཐམས་ཅད་ནི་མ་བུ་གཉིས་ཀྱིས་གྲུབ་འདུག་པ་དང་།འཐབ་རྩོད་བྱེད་སྐབས་ཨ་མ་ཀུན་གྱི་ལུས་སྨད་ལ་རྡོག་ཐོས་གཞུས་པའི་དབང་གིས་རྐང་བ་ཞ་བ་དང་།མའོ་ཀྲུའུ་ཞི་སྐུ་གཤེགས་པ་དུས་ལྟར་མ་གོ་བས།བུ་རྣམས་ཁྲིད་དེ་འཐབ་རྩོད་བྱས་པའི་གནས་ཚུལ་འབྱུང་དགོས་འདུག་པས།གཏམ་ལོག་ཡ་ང་བ་ཞིག་བརྗོད་པ་མ་ཡིན་ནམ།
བློ་མཐུན་ཨ་བུ་ལགས་ཀྱི་རྩོམ་ལ་གཞིགས་ན།སྒྲུང་གཏམ་གསར་རྩོམ་ལ་སྐབས་རེར་མཐོང་ཐོས་མྱོང་གསུམ་མཁོ་བ་དང་།མཚམས་རེར་མྱོང་བ་ཁོ་ན་ལས་མི་མཁོ་བ་འདྲ།ཁོས་རང་གི་ལྟ་བ་ཕྱི་མ་དེ་ཡང་དག་ཡིན་པ་ར་སྤྲོད་བྱེད་ཆེད།སྐུ་ཞབས་ལུའུ་ཞུན་ལགས་ཀྱི་གསུང་ཡང་རྒྱབ་རྟེན་དུ་དྲངས་ཡོད་མོད།འོན་ཀྱང་།དེ་ནི་རླབས་ཆེ་བའི་རྩོམ་པ་པོ་དེས་མ་དགོངས་པར་གསུངས་ཟེར་རམ་ཡང་ན་རྩོམ་མཁན་ཁོ་རང་གིས་ལོག་སྒྱུར་བྱས་པ་གཉིས་ལས་གང་ཡིན་མི་ཤེས་མོད།གང་ལྟར་ལུང་ཚིག་དེའི་ཉིང་དོན་ནི།སྐུ་ཞབས་ལུའུ་ཞུན་གྱིས་སྒྲུང་གཏམ་ལེགས་པོ་ཞིག་འཁྱོངས་དགོས་ན་རྩོམ་མཁན་གྱི་མྱོང་བ་དངོས་དེ་བརྩམས་ཆོས་ཀྱི་བརྗོད་བྱར་འཛོམས་དགོས།གལ་སྲིད་ལུའུ་ཞུན་གྱིས་བཞེད་པའི་མྱོང་བ་དངོས་དེ་ཨ་བུ་ལགས་ཀྱིས་བཞེད་པའི་མཐོང་ཐོས་མྱོང་གསུམ་ཁྲོད་ཀྱི་མྱོང་བ་དེ་ཡིན་པར་མ་ཟད།མྱོང་བ་ནི་རང་གིས་དངོས་སུ་ལག་ལེན་བྱས་ནས་བདེན་དཔང་བྱས་པའི་ཤེས་ཡོན་ལ་འཇུག་པ་དང་།ལུའུ་ཞུན་ལགས་ཀྱིས་རྩ་དོན་དེ་དང་བསྟུན་ནས་སྒྲུང་གཏམ་གསར་རྩོམ་བྱས་པ་ཡིན་ན།《ཨQཡི་དངོས་རྣམ》སྐབས་སུ།རྩོམ་པ་པོ་གྲགས་ཅན་དེས་ཨQཡི་འཚོ་བའི་བརྒྱུད་རིམ་རིང་མོ་དེ་དངོས་སུ་མྱངས་པ་དང་།སྲོག་ཆད་བཅད་རྗེས་འདས་ལོག་བྱས་པ་ན་རང་གི་མི་ཚེའི་མྱོང་བ་འདོར་ལེན་བྱས་ཏེ་སྒྲུང་གཏམ་གྲགས་ཅན་དེ་བརྩམས་པ་ཡིན་དགོས།དེ་ནི་གཏན་ནས་མི་སྲིད་པ་ཞིག་སྲིད་པར་གྱུར་པ་མ་ཡིན་ནམ།
བློ་མཐུན་ཨ་བུ་ལགས་ཀྱི་《སྒོ་འགྲམ་གྱི་འགྲུལ་བ་གཏོལ་མེད》ནང་དུ།ཐུན་མོང་སྤྱི་ལ་ཡོད་པའི་ཉམས་མྱོང་དང་བྱེ་བྲག་མི་སྒེར་གྱི་ཉམས་མྱོང་གནད་དུ་བཟུང་ནས《ལྷགས་རླུང་།》ལ་སྐྱོན་བརྗོད་བྱས་པར་མ་ཟད།《ལྷགས་རླུང་》