རེ་གཅིག  སྒྲུང་གཏམ་དུ་མི་སྣའི་འདོད་པ་བཙལ་ཀྱང་མི་རྙེད་པའི་འགལ་བ་འདྲེན་དོན་ཅི།

   ལན། སྲིད་པའི་ཁྱོན་གྱི་མི་ཕལ་བ་རྣམས་ལ་ཆ་མཚོན་ན། “ཕན་གནོད་ཕྲན་ཚེགས་ཙམ་གྱིས་དགའ་བ་དང་མི་དགའ་བར་འགྱུར”སྲིད་དེ། དཔེར་ན་དུས་དང་རྣམ་པ་ཀུན་ཏུ་གང་ཞིག་རྙེད་ན་དགའ་བ་དང་མ་རྙེད་ན་མི་དགའ་བ། གཏམ་སྙན་པ་ཐོས་ན་དགའ་བ་དང་མི་སྙན་པ་ཐོས་ན་མི་དགའ་བ། གཞན་གྱིས་བསྟད་ན་དགའ་བ་དང་སྨད་ན་མི་དགའ་བ། བདེ་བ་ཐོབ་ན་དགའ་བ་དང་མི་བདེ་བར་འཕྲད་ཚེ་མི་དགའ་བར་འགྱུར་ཡིན་ལ། སྒྲུང་གཏམ་སྐོར་ཞིག་བློས་སློང་བྱེད་སྐབས། གལ་སྲིད་མི་སྣ་གང་ཞིག་མི་འདོད་པ་དང་མི་དགའ་བའི་རྒྱ་ལ་དྲངས་ཏེ་བྱུང་རིམ་མདུན་ལ་དེད་ན། མི་སྣའི་སྣང་བརྙན་གསར་སློང་བྱེད་པ་དང་། དུས་རབས་དང་འཚོ་བའི་ཁྱད་ཆོས་མཚོན་པ། བྱུང་རིམ་གྱིས་ཀློག་མཁན་གྱི་ཡིད་སེམས་འགུགས་པ་སོགས་ལ་ཕན་པར་འདོད། ཁོ་བོས་སྒྲུང་གཏམ《གལ་ཏེ》དང་།《ཨ་ཁུ་ཁྱི་སྐྱག་རྟ་ལ་དགའ》དང་།《སྒྲོལ་མ་ཉེར་གཅིག》གི་བཅུ་བདུན་པ་སྟེ《དཔྱིད་ཀྱི་ཉི་འོད》ལ་སོགས་པ་བློས་སློང་བྱེད་སྐབས། མི་སྣས་འདོད་པ་བཙལ་ཀྱང་མི་རྙེད་པའི་འགལ་བ་དེ་དམིགས་སུ་བཟུང་ནས་བྱུང་རིམ་མདུན་ལ་དེད་ཡོད།

རེ་གཉིས། སྒྲུང་གཏམ་དུ་མི་སྣ་འབྲི་སློང་བྱེད་སྐབས་མི་འདོད་པ་ཐོག་ཏུ་འབབ་པའི་འགལ་བ་འདྲེན་དོན་ཅི།

   ལན། མི་རྣམས་ཀྱིས་བྱ་བ་གང་ཞིག་གཉེར་སྐབས། རྐྱེན་ངན་དང་འཕྲད་དེ་མཇུག་འབྲས་ཕྱིན་ཅི་ལོག་པ་སྨིན་པའི་སྐབས་ཡོད་པ་མ་ཟད། སྐབས་རེར་ཕྱིན་ཅི་ལོག་པའི་མཇུག་འབྲས་སྐོར་ཞིག་ནི་སྡུག་བསྔལ་དང་སྐྱོ་གར་གྱི་འབྱུང་གཞིར་འགྱུར་སྲིད་པས། གལ་སྲིད་རྩོམ་པ་པོས་སྒྲུང་གཏམ་བློས་སློང་བྱེད་སྐབས་སྣང་ཚུལ་འདི་ཉིད་སྤྱོད་ལུགས་ལེགས་ན། སྒྲུང་གཏམ་ལ་བྱུང་རིམ་ཡིད་དབང་འཕྲོག་པ་ཞིག་འབྱུང་བར་རྨང་གཞིའི་ཆ་རྐྱེན་འཛོམས་པར་འགྱུར་པར་འདོད། ཁོ་བོས་སྒྲུང་གཏམ་རྣམས་ལས《ཤ》དང་། 《དྲེད་མོང》དང་། 《སྒྲོལ་མ་ཉེར་གཅིག》གི་བརྒྱད་པ་སྟེ《བོར་ཟིན་པ་དེ་འཚོལ་བ》ལ་སོགས་པ་བློས་སློང་བྱེད་སྐབས། མི་སྣས་བྱ་བ་གང་ཞིག་གཉེར་བ་ལ་མཇུག་འབྲས་ཕྱིན་ཅི་ལོག་པ་སྨིན་པ་དམིགས་སུ་བཟུང་ནས་བྱུང་རིམ་མདུན་ལ་དེད་པ་ཡིན།  

རེ་གསུམ། སྒྲུང་གཏམ་ལས་མི་སྣའི་འགལ་བ་ཐང་མར་བརྡལ་སྐབས་ཕྱོགས་གང་དག་ལ་ཡིད་འཇོག་བྱ་དགོས།

   ལན། སྒྲུང་གཏམ་ལས་མི་སྣའི་འགལ་བ་ཐང་མར་བརྡལ་དགོས་ན། ཡིད་འཇོག་བྱ་དགོས་པ་འདི་འདྲ་ཡོད་པར་འདོད་དེ། གཅིག རྩོམ་མཁན་གྱིས་བརྗོད་བྱ་དང་མི་སྣར་ཞིབ་ཏུ་དཔྱད་དེ་འགལ་བ་གཙོ་བོ་ཡིད་ལ་ངེས་དགོས་པ་མ་ཟད། འགལ་བ་གཙོ་བོ་དེ་གནད་དུ་བཟུང་ནས་བྱུང་རིམ་མདུན་ལ་འདེད་དགོས། གཉིས། འགལ་བ་གཙོ་བོ་དེ་དཔེ་མཚོན་རང་བཞིན་ལྡན་པའི་བྱུང་རིམ་གྱིས་མཚོན་དགོས། གསུམ། དགོས་མཁོ་ཡོད་ན་འགལ་བ་ཕལ་བས་འགལ་བ་གཙོ་བོ་ལ་རམ་འདེགས་བྱས་ཏེ་བྱུང་རིམ་མདུན་ལ་འདེད་དགོས།

རེ་བཞི། ཅི་ཞིག་ལ་བྱུང་རིམ་ལྷན་དུ་སྡེབ་ལུགས་ཟེར།

   ལན། སྒྲུང་གཏམ་བློས་སློང་གི་ལས་ལ་འཇུག་སྐབས། རྩོམ་པ་པོས་སྐབས་སུ་བབས་པའི་སྒྲུང་གཏམ་གྱི་བརྗོད་བྱའི་ཁྱད་ཆོས་དང་བསྟུན་ཏེ་མི་སྣ་དང་དོན་དག དངོས་པོ། མི་སྣའི་སེམས་ཀྱི་འགྱུར་བ་དང་ཡིད་ཀྱི་འཆར་སྒོ་བཅས་ལས་གང་ཞིག་གནད་དུ་བཟུང་སྟེ། ཕྲེང་བའི་ཕྲེང་རྡོག་རྣམས་ཕྲེང་ཐག་གཅིག་ལ་རྒྱུ་བ་ནང་བཞིན་འབྲེལ་ཡོད་རྒྱུ་ཆ་རྣམས་ཕྱོགས་གཅིག་ཏུ་སྒྲིག་ལུགས་ལ་བསམ་བློ་གཏང་དགོས་འདུག་ལ། རྩོམ་རིག་གཞུང་ལུགས་ལྟར་ན་ལས་ཀ་འདི་ལ་བྱུང་རིམ་ལྷན་དུ་སྡེབ་པ་ཟེར་དགོས་འདུག

རེ་ལྔ། སྒྲུང་གཏམ་ལ་བྱུང་རིམ་ལྷན་དུ་སྡེབ་ལུགས་གང་དག་ཡོད།

   ལན། སྒྲུང་གཏམ་ལ་བྱུང་རིམ་ལྷན་དུ་སྡེབ་ལུགས་སྣ་ཚོགས་ཤིག་ཡོད་ངེས་ཀྱང་། རྒྱུགས་ཆེ་བ་རྣམས་ཕྱོགས་གཅིག་ཏུ་བསྡུས་ན་མི་སྣ་གནད་དུ་བཟུང་སྟེ་བྱུང་རིམ་ལྷན་དུ་སྡེབ་པ་དང་། དོན་དག་གནད་དུ་བཟུང་སྟེ་བྱུང་རིམ་ལྷན་དུ་སྡེབ་པ་དང་། དངོས་པོ་གནད་དུ་བཟུང་སྟེ་བྱུང་རིམ་ལྷན་དུ་སྡེབ་པ་དང་། མི་སེམས་གནད་དུ་བཟུང་སྟེ་བྱུང་རིམ་ལྷན་དུ་སྡེབ་པ་དང་། ཡུལ་གནད་དུ་བཟུང་སྟེ་བྱུང་རིམ་ལྷན་དུ་སྡེབ་པ་བཅས་ལྔ་ཡོད་དོ།།  

རེ་དྲུག མི་སྣ་གནད་དུ་བཟུང་སྟེ་བྱུང་རིམ་ལྷན་དུ་སྡེབ་ལུགས་ནི་ག་འདྲ་ཞིག་ཡིན་ནམ།

   ལན། སྒྲུང་གཏམ་སྐོར་ཞིག་བློས་སློང་བྱེད་སྐབས། མི་སྣ་ཞིག་གི་བདེ་སྡུག་ཉམས་སུ་མྱངས་པའི་གོ་རིམ་མམ་འཚར་ལོངས་བྱུང་བའི་བརྒྱུད་རིམ་དེ་གནད་དུ་བཟུང་སྟེ། མི་སྣ་དང་འབྲེལ་བ་ཡོད་པའི་དོན་རྐྱེན་རབ་དང་རིམ་པ་རྣམས་གུང་བསྒྲིགས་ཏེ་བརྩམས་ཆོས་ཀྱི་བརྗོད་བྱ་གཏན་ལ་འབེབ་བཞིན་ཡོད་ལ། བྱུང་རིམ་འདི་ལྟར་བཀོད་སྒྲིག་བྱས་པའི་སྒྲུང་གཏམ་ནི་མི་སྣ་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་པའི་གྲས་སུ་གཏོགས་པར་འདོད། ཁོ་བོའི་སྒྲུང་གཏམ་རྣམས་ལས《བསོད་ནམས་རྒྱ་མཚོ》དང་།《ཤ་ཡུ་མོ་ཤེའུ》དང་།《ཤ》དང་།《བྱང་ཆུབ་སེམས་དཔའ་རི་བོང་བློ་ལྡན་གྱི་རྟོགས་བརྗོད》དང་།《དར་ལྕོག རླུང་བུ། ད་དུང་ལྷེམ་ལྷེམ་གཡོ་བའི་རླུང་རྟ》སོགས་ནི་གསར་རྩོམ་བྱེད་སྐབས་མི་སྣ་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་ཡོད།

   ལན། སྒྲུང་གཏམ་སྐོར་ཞིག་བློས་སློང་བྱེད་སྐབས། གོ་རིམ་རྙོག་དྲ་ཅན་གྱི་དོན་དག་ཅིག་གམ་དོན་དག་ཅིག་ལ་བརྟེན་ནས་བྱུང་བའི་རྙོག་དྲ་ཅན་གྱི་དོན་དག་གནད་དུ་བཟུང་སྟེ། དོན་དག་དེ་ཉིད་ཐོག་མར་ཇི་ལྟར་བྱུང་བ་དང་། བར་དུ་ཇི་ལྟར་འགྱུར་བ། མཐོ་རླབས་གང་ནས་འཕྱུར་བ། མཇུག་འབྲས་ག་འདྲ་སྨིན་པ་རྣམས་རྒྱས་བསྡུས་གསལ་བའི་སྒོ་ནས་གཞི་གཅིག་ལ་བསྒྲིགས་ཏེ་བརྗོད་བཞིན་ཡོད་ལ། བརྩམས་ཆོས་ཀྱི་བརྗོད་བྱ་གཏན་ལ་འབབ་ལུགས་འདི་ནི་དོན་དག་གནད་དུ་བཟུང་སྟེ་བརྗོད་དོན་གཏན་ལ་འབེབས་པའི་བློས་སློང་བྱེད་སྟངས་ཀྱི་གྲས་སུ་གཏོགས་དགོས་འདུག ཁོ་བོའི་སྒྲུང་གཏམ་རྣམས་ལས་མུ་འབྲེལ་སྒྲུང་གཏམ་ཡིག་བརྒྱ་མ《སྒྲོལ་མ་ཉེར་གཅིག》གི་བཅུ་གཉིས་པ་སྟེ《ཤར་ཕྱོགས་ལྷུན་པོའི་ཀླད་ཀྱི་སྤྲིན་དཀར》དང་། སྒྲུང་ཐུང་སྟེ《མེད》དང་།《བསོད་ནམས》དང་།《གྱོད》དང་།《དྲེད་མོང》དང་།《ཀྱེ་མ། ཛམ་བྷ་ལ་མི་ཡུལ་ལ་ཕེབས་བྱུང》སོགས་ནི་གསར་རྩོམ་བྱེད་སྐབས་དོན་དག་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་ནས་བརྩམས་པ་ཡིན།  

རེ་བརྒྱད། དངོས་པོ་གནད་དུ་བཟུང་སྟེ་བྱུང་རིམ་ལྷན་དུ་སྡེབ་ལུགས་ནི་ག་འདྲ་ཞིག་ཡིན་ནམ།

   ལན། སྒྲུང་གཏམ་སྐོར་ཞིག་བློས་སློང་བྱེད་སྐབས། སྐབས་རེར་དངོས་པོ་ཞིག་གནད་དུ་བཟུང་སྟེ་བྱུང་རིམ་མདུན་ལ་འདེད་བཞིན་ཡོད་པ་དང་། བྱུང་རིམ་མདུན་ལ་འདེད་སྐབས། དངོས་པོ་དེ་ལ་བརྟེན་ནས་མི་དང་མི་བར་གྱི་འགལ་བ་དང་འབྲེལ་བ་ཅི་ཞིག་བྱུང་བ་དེ་བྱུང་རིམ་ལ་བརྟེན་ནས་གཟུགས་རིས་གསལ་བའི་སྒོ་ནས་བརྗོད་བཞིན་ཡོད། ཁོ་བོས་མིག་སྔའི་བར་དུ་དངོས་པོ་གནད་དུ་བཟུང་ནས་སྒྲུང་གཏམ་མང་པོ་བྲིས་མི་འདུག་པས། གནད་འདི་ལྟར་བརྩམས་པའི་དཔེར་བརྗོད་ལ་མུ་འབྲེལ་སྒྲུང་གཏམ་ཡིག་བརྒྱ་མ《སྒྲོལ་མ་ཉེར་གཅིག》གི་ལྔ་པ་སྟེ《རྨ་ཆུ། འདི་ནས་རྒྱང་ལ་འཐེན》དང་བཅུ་དགུ་པ་སྟེ《ས་སྲོས་ཀྱི་འབྲུག་སྒྲ》དང་། སྒྲུང་ཐུང་སྟེ《རྒྱན་བྱང》དང་། སྒྲུང་འབྲིང་སྟེ《ནས》དང་། སྒྲུང་ཐུང《དཔལ་འབྱོར》རྣམས་དྲངས་ན་རུང་བར་འདོད་དོ།།  

རེ་དགུ། མི་སེམས་གནད་དུ་བཟུང་སྟེ་བྱུང་རིམ་ལྷན་དུ་སྡེབ་ལུགས་ནི་ག་འདྲ་ཞིག་ཡིན་ནམ།

   ལན། སྒྲུང་གཏམ་སྐོར་ཞིག་བློས་སློང་བྱེད་སྐབས། མི་སྣ་གང་ཞིག་གི་སེམས་ཁམས་དང་ཡིད་ཀྱི་འཆར་སྒོ་ཀྱི་གནད་དུ་འཛིན་པ་དང་། སེམས་ཁམས་དང་འཆར་སྒོ་དེ་མཚོན་པར་ནུས་པའི་བྱུང་རིམ་དཔེ་མཚོན་རང་བཞིན་ལྡན་པ་རྣམས་ལྷན་དུ་བསྡེབས་ཏེ། སྒྲུང་གཏམ་གྱི་བྱུང་རིམ་བཀོད་སྒྲིག་བྱེད་བཞིན་ཡོད་ལ། མི་སྣའི་སེམས་ཁམས་དང་འཆར་སྒོ་ཁུངས་སྣེ་བྱས་ཏེ་བྱུང་རིམ་ལྷན་དུ་བསྡེབས་ན། མི་སྣའི་སྣང་བརྙན་དང་མི་གཤིས་མཚོན་པ་མ་ཕན་པ་ཆེན་པོ་ལྡན།

བདུན་ཅུ། མི་སེམས་གནད་དུ་བཟུང་སྟེ་བྱུང་རིམ་ལྷན་དུ་སྡེབ་ལུགས་ལ་རིགས་ག་འདྲ་ཡོད་དམ།

 ལན། གསར་རྩོམ་ལ་འཇུག་པའི་ལག་ལེན་དངོས་ལ་གཞིགས་ན། སྒྲུང་གཏམ་བློས་སློང་བྱེད་སྐབས། མི་སེམས་གནད་དུ་བཟུང་སྟེ་བྱུང་རིམ་ལྷན་དུ་སྡེབ་ལུགས་གཉིས་ཡོད་དགོས་འདུག་ཅིང་།གཅིག་ནི་མི་སྣའི་སེམས་ཁམས་ཀྱི་འགྱུར་ལྡོག་དང་གནད་དུ་འཛིན་པ་དང་། གཞན་ཞིག་ནི་མི་སྣའི་ཡིད་ཀྱི་འཆར་སྒོ་གནད་དུ་འཛིན་པ་དེ་ཡིན་ནོ།།

དོན་གཅིག སྒྲུང་གཏམ་ལས་མི་སྣའི་སེམས་ཁམས་ཀྱི་འགྱུར་ལྡོག་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་ན་དགེ་མཚན་ཅི།

   ལན། སྒྲུང་གཏམ་བློས་སློང་བྱེད་སྐབས། རྩོམ་མཁན་གྱིས་མི་སྣའི་སེམས་ཁམས་ཀྱི་འགྱུར་ལྡོག་གནད་དུ་བཟུང་སྟེ་བྱུང་རིམ་བཀོད་སྒྲིག་བྱས་ན། མི་སྣའི་སེམས་ཀྱི་བདེ་སྡུག་དང་གསང་བ་བྱུང་རིམ་བརྒྱུད་དེ་ཕྱི་ལ་མངོན་པ་དང་བསྟུན་ནས། མི་སྣའི་སྣང་བརྙན་ཡང་བདེ་བླག་ངང་ནས་གསར་སློང་བྱེད་ནུས་པར་འདོད་དེ། ཁོ་བོའི་སྒྲུང་གཏམ་རྣམས་ལས《སྒྲོལ་མ་ཉེར་གཅིག》གི་བཅུ་བདུན་པ་སྟེ《དཔྱིད་ཀྱི་ཉི་འོད》དང་། སྒྲུང་ཐུང་སྟེ《གལ་ཏེ》དང《མེ་ལོང་ནང་གི་ཕྱེ་མ་ལེབ》རྣམས་བློས་སློང་བྱེད་སྐབས། བརྩམས་ཆོས་སུ་འདྲེན་གྲབས་ཡོད་པའི་མི་སྣའི་སེམས་ཁམས་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་པ་ཡིན།  

དོན་གཉིས། སྒྲུང་གཏམ་དུ་ཡིད་ཀྱི་འཆར་སྒོ་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་ན་དགེ་མཚན་ཅི།

   ལན། སྒྲུང་གཏམ་སྐོར་ཞིག་བློས་སློང་བྱེད་སྐབས།མི་སྣའི་ཡིད་ཀྱི་འཆར་སྒོ་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་ཡོད་ལ། སྒྲུང་གཏམ་གྱི་བྱུང་རིམ་འདི་ལྟར་སྒྲིག་སྦྱོར་བྱས་པ་ན། བྱུང་རིམ་སྡེ་ཚན་གཅིག་ནས་སྡེ་ཚན་གཞན་ཞིག་ལ་འཕོ་ཚུལ་མྱུར་བ་མ་ཟད། སྡེ་ཚན་སྔ་ཕྱིའི་མཚམས་སུ་འཕོ་བརྒལ་གྱི་བར་སྟོང་ཆེན་པོ་ཞིག་ཡོད་མོད། འོན་ཏེ་མི་སྣའི་སེམས་ཀྱི་དྲན་ཚུལ་གཞིར་བཟུང་ནས་དཔྱད་ན་བྱུང་སྔ་ཕྱིའི་བར་ལ་གཏན་ཚིགས་ཀྱི་འབྲེལ་བ་ཡོད་པ་དང་། བྱུང་རིམ་གྱི་ཚོགས་པ་སྤྱི་ཡིས་བརྗོད་སྙིང་རིལ་པོ་གཅིག་མཚོན་ཐུབ་པ་ཞིག་ཡིན་དགོས་འདུག ཁོ་བོའི་སྒྲུང་གཏམ་རྣམས་ལས་སྒྲུང་འབྲིང་སྟེ《རླུང》དང་། སྒྲུང་ཐུང་སྟེ《མེ་ལོང》གཉིས་ཀ་ནི་ཡིད་ཀྱི་འཆར་སྒོ་གནད་དུ་བཟུང་བའི་བརྩམས་ཆོས་ཀྱི་གྲས་སུ་གཏོགས་པ་འདོད།

   ལན། སྒྲུང་གཏམ་སྐོར་ཞིག་བློས་སློང་བྱེད་སྐབས། རྩོམ་པ་པོས་ཡུལ་ལམ་གནས་ངེས་གཏན་ཅན་ཞིག་གནད་དུ་བཟུང་རྗེས། མི་སྣ་ནི་གར་སྟེགས་སུ་གྱུར་པའི་ཡུལ་ལམ་གནས་དེར་གར་གདན་འདྲེན་སྲིད་པ་མ་ཟད། མི་སྣའི་ཐུན་མིན་གྱི་བྱ་སྤྱོད་ལ་བརྟེན་ནས་སྣང་བརྙན་གསར་སློང་བྱེད་པ་དང་མི་གཤིས་མངོན་པར་གསལ་བའི་ངང་ནས་མཚོན་ཐུབ།

དོན་བཞི། ཡུལ་གནད་དུ་བཟུང་སྟེ་བྱུང་རིམ་ལྷན་དུ་སྡེབ་ལུགས་ལ་རིགས་གང་དག་ཡོད།

   ལན། གཞན་གྱི་བརྩམས་ཆོས་དང་རང་ཉིད་ཀྱི་ཉམས་མྱོང་ལ་གཞིགས་ན། ཡུལ་གནད་དུ་བཟུང་སྟེ་བྱུང་རིམ་ལྷན་དུ་སྡེབ་ལུགས་གཉིས་ཡོད་དེ། གཅིག་ནི་ཡུལ་གཅིག་ལ་མི་སྣ་སྐོར་ཁག་དུ་མ་དྲངས་ཏེ་བྱུང་རིམ་གྱི་སྐོར་ཁག་མང་པོ་ཕྲེང་བར་སྒྲིག་པ་དང་། གཞན་ཞིག་ནི་ཡུལ་གཅིག་ལ་མི་སྣ་སྐོར་གཅིག་དྲངས་ཏེ་བྱུང་རིམ་མདུན་ལ་འདེད་པ་དེ་ཡིན་ནོ།།

དོན་ལྔ། ཡུལ་ངེས་གཏན་ཅན་ཞིག་གནད་དུ་བཟུང་སྟེ་མི་སྣ་སྐོར་ཁག་མང་པོ་ནི་གང་ལྟར་འདྲེན་དགོས་སམ།

   ལན། སྒྲུང་གཏམ་གང་ཞིག་བློས་སློང་བྱེད་སྐབས། ཡུལ་ངེས་གཏན་ཅན་ཞིག་གཏན་འབེབས་བྱས་རྗེས། སྐོར་ཁག་མི་འདྲ་མི་སྣ་རྣམས་རིམ་བཞིན་ཡུལ་དེ་གར་དྲངས་ཏེ། མི་སྣའི་གཏམ་གླེང་དང་སྤྱོད་པ་ནི་ཁོར་ཡུག་བཀོད་འབྲི་དང་ལྷན་དུ་བསྡེབས་ཏེ་བྱུང་རིམ་མདུན་ལ་དེད་པ་ན། ཚོགས་པ་རིགས་མི་འདྲ་བའི་སྣང་བརྙན་ཕྲེང་བར་བསྒྲིགས་ནས་གསར་སློང་བྱེད་ཐུབ། ཁོ་བོའི་སྒྲུང་གཏམ་རྣམས་ལ་ཆ་མཚོན་ན་མི་སྣ་སྐོར་མང་པོ་ཡུལ་ལམ་གནས་གཅིག་ལ་དྲངས་ཏེ་བྱུང་རིམ་མདུན་ལ་དེད་པའི་བརྩམས་ཆོས་ཤིན་ཏུ་ཉུང་མོད། དེ་དག་ལས《འཕོ་འགྱུར》དང《མེ་ལོང》གཉིས་ཀ་ནི་ཡུལ་གནད་དུ་བཟུང་སྟེ་བྱུང་རིམ་ལྷན་དུ་བསྡེབས་པའི་སྒྲུང་གཏམ་གྱི་གྲས་སུ་འདྲེན་རུང་བར་འདོད།

དོན་དྲུག ཡུལ་ངེས་གཏན་ཅན་ཞིག་གནད་དུ་བཟུང་སྟེ་མི་སྣ་སྐོར་ཁག་གཅིག་ནི་གང་ལྟར་འདྲེན་དགོས་སམ།

   ལན། སྒྲུང་གཏམ་གང་ཞིག་བློས་སློང་བྱེད་སྐབས། རྩོམ་པ་པོས་ཡུལ་ངེས་གཏན་ཅན་ཞིག་ལ་མི་སྣ་སྐོར་གཅིག་དྲངས་ཏེ། མི་སྣའི་གཏམ་གླེང་དང་སྤྱོད་པ་ནི་ཁོར་ཡུག་གི་རྣམ་པ་དང་ལྷན་དུ་བསྡེབས་ཏེ་བྱུང་རིམ་མདུན་ལ་དེད་པ་ན། གཏམ་རྒྱུད་ཡིད་དབང་འཕྲོག་པ་ཞིག་བརྗོད་ནུས་པ་མ་ཟད། མི་སྣའི་སྣང་བརྙན་ཡང་བདེ་བླག་ངང་ནས་གསར་སློང་བྱེད་ནུས། ཁོ་བོའི་སྒྲུང་གཏམ་རྣམས་ལ་ཆ་མཚོན་ན་ཡུལ་གཅིག་གནད་དུ་བཟུང་ནས་བྱུང་རིམ་ལྷན་དུ་བསྡེབས་པ་ཅུང་མང་སྟེ། དཔེར་ན་སྒྲུང་ཐུང《ཟླ་བ་དང་མེ་ལོང》དང་།《ལམ》དང་།《གནས་རི》དང་། མུ་འབྲེལ་སྒྲུང་གཏམ་ཡིག་བརྒྱ་མ《སྒྲོལ་མ་ཉེར་གཅིག》གི་གཉིས་པ་སྟེ《མཁའ་མཐའི་ཉི་མ》དང་། ལྔ་པ་སྟེ《སྒྲོལ་མ་ཨ་ཕ།  ཆང》དང་། དགུ་པ་སྟེ《ཨ་མ》དང་། བཅུ་གཉིས་པ་སྟེ《ཤར་ཕྱོགས་ལྷུན་པོ་ཀླད་ཀྱི་སྤྲིན་དཀར》སོགས་ནི་ཡུལ་ངེས་གཏན་ཅན་ལ་མི་སྣ་ངེས་གཏན་ཅན་རེ་གཉིས་དྲངས་ཏེ་བརྩམས་པ་ཡིན།  

དོན་བདུན། སྒྲུང་གཏམ་གྱི་བྱུང་རིམ་ལྷན་དུ་སྡེབ་སྐབས་ཡིད་འཇོག་བྱ་དགོས་པ་གང་དག་ཡོད་དམ།

   ལན། སྒྲུང་གཏམ་བློས་སློང་གི་དུས་སུ་བྱུང་རིམ་ལྷན་དུ་སྡེབ་ལུགས་ལ་བསམ་བློ་གཏོང་ན། རྩོམ་པ་པོས་ཡིད་འཇོག་བྱ་དགོས་པ་འདི་འདྲ་ཡོད་པར་འདོད་དེ། གཅིག མི་སྣ་དང་དོན་དག དངོས་པོ། མི་སྣའི་སེམས་ཀྱི་འགྱུར་བ་དང་ཡིད་ཀྱི་འཆར་སྒོ་བཅས་ལས་གང་ཞིག་གནད་དུ་བཟུང་ན་སྒྲུང་གཏམ་གྱི་བརྗོད་པར་སྟོན་ནུས་པར་བསམ་བློ་གཏང་དགོས། གཉིས། བྱུང་རིམ་ལྷན་དུ་སྡེབ་སྐབས་བྱུང་རིམ་མང་པོས་ཕན་ཚུན་ལ་རམ་འདེགས་བྱ་དགོས།

དོན་བརྒྱད། སྒྲུང་གཏམ་གྱི་སྒྲུང་སྒོ་འཚོལ་སྐབས་ཕྱོགས་གང་དག་ལ་ཡིད་འཇོག་བྱ་དགོས།

   ལན། སྒྲུང་གཏམ་གསར་རྩོམ་གྱི་ལས་ལ་འཇུག་སྐབས། སྒྲུང་གཏམ་པས་ཐོག་མར་བློས་སློང་བརྒྱུད་ནས་བརྩམས་ཆོས་གསར་བ་ཞིག་གི་བརྗོད་བྱ་དང་མི་སྣ་གཏན་འབེབས་བྱས་རྗེས། ད་དུང་ཁག་གང་ཞིག་ནས་རྩོམ་མགོ་འཛིན་དགོས་པ་དང་། ཁག་གང་ནས་རྩོམ་མགོ་བཟུང་བ་ན། ད་གཟོད་སྐབས་སུ་བབས་པའི་བརྗོད་བྱའི་དོན་དེ་ཡིད་དབང་འཕྲོག་པའི་ངང་ནས་རྫོགས་པར་སྟོན་པ་དང་། མི་སྣའི་གཤིས་ཀ་གཟུགས་རིས་ལྡན་པའི་ངང་ནས་གསར་སློང་བྱེད་ཐུབ་པར་བསམ་བློ་གཏང་དགོས་འདུག སྒྲུང་གཏམ་པ་ཕལ་མོ་ཆེའི་གསར་རྩོམ་ཐད་ཀྱི་ཉམས་མྱོང་ལྟར་ན། སྒྲུང་གཏམ་གང་དང་གང་ཞིག་གསར་རྩོམ་བྱེད་སྐབས། གལ་སྲིད་ཚིག་ཐོག་མའམ་རང་བྱུང་ཚན་པ་ཐོག་མ་དེ་བརྗོད་བྱའི་ཁྱད་ཆོས་དང་ཡོངས་སུ་མཐུན་པ་དང་། རྗེས་ཀྱི་བྱུང་རིམ་ཡོད་ཚད་འདྲེན་ནུས་པའི་སྒོ་ནས་བྲིས་ཏེ། ལྡེ་མིག་གིས་ཟྭ་ཕྱེ་བ་ནང་བཞིན་སྒྲུང་གཏམ་གྱི་སྒྲུང་སྒོ་ལེགས་པར་ཕྱེ་བ་ན། རྩོམ་མཁན་གྱི་བསམ་ཕྱོགས་དང་སྤྲོ་སྣང་ནི་ཤྭ་འོད་རགས་ལས་ཤོར་བ་ལྟར་བརྡོལ་སྲིད་པ་མ་ཟད། ད་དུང་དགོས་གལ་ཆེ་བའི་བྱུང་རིམ་ལུ་གུའི་བརྒྱུད་དུ་གྲུབ་སྟེ་སྒྲུང་གཏམ་གྱི་བརྗོད་བྱའི་དོན་ནི་རྩོམ་མཁན་དང་ཀློག་མཁན་གྱི་འདོད་བློ་དང་མཐུན་པའི་སྒོ་ནས་རྫོགས་པར་སྟོན་ཐུབ། གསར་རྩོམ་ཉམས་མྱོང་དངོས་ལ་གཞིགས་ན། སྒྲུང་གཏམ་གྱི་རྩོམ་མགོ་འཛིན་ལུགས་ལ་བསམ་བློ་གཏོང་ན། ཐོག་མར་ཁུངས་སྣེ་གཏན་ལ་ཕབ་སྟེ་སྒྲུང་སྒོ་འཚོལ་བ་དང་།དེ་ནས་སྤྲོས་བརྗོད་བྱེད་སྟངས་གཏན་ལ་ཕབ་སྟེ་སྒྲུང་སྒོ་འཚོལ་དགོས་འདུག་ལ། གོ་རིམ་འདི་གཉིས་བརྒྱུད་དེ་སྒྲུང་གཏམ་གྱི་སྒྲུང་སྒོ་འོས་ཤིང་འཚམ་པ་དེ་རྙེད་རྗེས། མི་སྣ་དང་། རྒྱབ་ལྗོངས། བྱུང་རིམ། ཚོར་བ་རྣམས་ལས་གང་ཞིག་གནད་དུ་བཟུང་སྟེ་སྒྲུང་སྒོར་ཞུགས་ན་འོས་པར་བསམ་བློ་གཏང་དགོས།

   ལན། སྒྲུང་གཏམ་གྱི་བརྗོད་བྱ་སྤྱི་ལ་ཆ་མཚོན་ན། དེ་ཉིད་ནི་དོན་དག་བྱེ་བྲག་པ་མང་པོ་ཞིག་གིས་གྲུབ་པ་འདུག་པ་མ་ཟད། དོན་དག་བྱེ་བྲག་པ་དེ་དག་ནི་འབྲེལ་བ་མངོན་པར་གསལ་བ་ཞིག་ལ་བརྟེན་ནས་ལྷན་དུ་བསྡེབས་ཡོད་ལ། སྐབས་འདིའི་དོན་དག་བྱེ་བྲག་པ་རྣམས་ལྷན་དུ་སྦྲེལ་བྱེད་དེ་ལ་གཞུང་ལུགས་སྨྲ་བ་རྣམས་ཀྱིས་ཁུངས་སྣེ་ཞེས་འབོད་བཞིན་ཡོད།

བརྒྱད་ཅུ།  གང་དག་སྒྲུང་གཏམ་གྱི་ཁུངས་སྣེ་བྱས་ཆོག་པ་ཡིན།

   ལན། གསར་རྩོམ་གྱི་སྦྱོར་བ་དངོས་ལ་གཞིགས་ན། མི་སྣ་དང་། དོན་དག་དང་། དངོས་པོ་དང་། སེམས་ཁམས་རྣམས་ནི་སྒྲུང་གཏམ་གྱི་ཁུངས་སྣེ་བྱས་ཆོག་གོ།

གྱ་གཅིག མི་སྣ་ཁུངས་སྣེ་བྱེད་པ་ཞེས་པ་ཅི་ལྟ་བུ་ཞིག་ལ་གོ་དགོས།

   ལན། སྒྲུང་གཏམ་མང་པོ་ཞིག་ལ་ཆ་མཚོན་ན། མི་སྣ་ཞིག་ལ་བརྟེན་ནས་མི་སྣ་གཞན་དག་བརྩམས་ཆོས་ཁྲོད་ལ་འདྲེན་པ་དང་། མི་སྣ་དང་མི་སྣ་བར་གྱི་འགལ་བ་དང་འབྲེལ་བ། མི་སྣ་དང་ཁོར་ཡུག་བར་གྱི་འགལ་བ་དང་འབྲེལ་བར་བརྟེན་ནས་བྱུང་རིམ་མདུན་ལ་དེད་དེ་གཏམ་རྒྱུད་རྫོགས་པར་བརྗོད་བཞིན་ཡོད་ལ། འདི་ལྟར་བརྩམས་པའི་སྒྲུང་གཏམ་ནི་མི་སྣ་ཁུངས་སྣེ་བྱས་པའི་སྒྲུང་གཏམ་གྱི་གྲས་སུ་དྲངས་ཆོགཁོ་བོའི་སྒྲུང་གཏམ་རྣམས་ལས《ར་བྷ་འདྲེ་མིག་དང་རིན་ཆེན་རྐྱལ་ཁ》ཞེས་པའི་ཁྲོད་ཀྱི་ར་བྷ་འདྲེ་མིག་དང་།《གྲོང་ཁྱེར་གྱི་འཚོ་བ》ཞེས་པའི་ཁྲོད་ཀྱི་ཁྱུ་ཁྱུ།《ཧ་ཅང་ཧ་ཅང》ཞེས་པའི་ཁྲོད་ཀྱི་ཨ་ཁུ་ཐར་ལོ་རྣམས་ནི་སྒྲུང་གཏམ་གྱི་ཁུངས་སྣེ་ཡིན།

གྱ་གཉིས། མི་སྣ་སྒྲུང་གཏམ་གྱི་ཁུངས་སྣེར་འདྲེན་ན་ཆ་རྐྱེན་གང་དག་ལྡན་དགོས།

   ལན། མི་སྣ་གང་ཞིག་སྒྲུང་གཏམ་གྱི་ཁུངས་སྣེ་བྱེད་ན་ཆ་རྐྱེན་འདི་འདྲ་ལྡན་དགོས་པ་འདྲ་སྟེ། གཅིག མི་སྣ་ཞིག་གིས་ལས་གང་ཞིག་གཉེར་བའི་གོ་རིམ་མམ། མི་སྣ་གང་ཞིག་གི་ལས་དབང་ངམ་འཚར་ལོངས་བྱུང་བའི་གོ་རིམ་སོགས་ལ་བརྟེན་ནས་གཏམ་རྒྱུད་རྫོགས་པར་བརྗོད་ནུས་དགོས། གཉིས། ཁུངས་སྣེ་རུ་བཀོད་པའི་མི་སྣ་ནི་གཏམ་རྒྱུད་ཀྱི་སྲོག་ཤིང་དུ་འགྱུར་དགོས། གསུམ། སྒྲུང་གཏམ་གྱི་བྱུང་རིམ་ནི་མི་སྣའི་ལས་དབང་དང་སྤྱོད་ལམ་ལ་བརྟེན་ནས་མདུན་ལ་འདེད་དགོས་ཏེ། གལ་སྲིད་དོན་དག་གིས་མི་སྣ་བསྒྲིབས་ན་སྒྲུང་གཏམ་ནི་གཏམ་རྒྱུད་དུ་འགྱུར་བའི་ཉེན་ཁ་ཡོད་པར་འདོད།

གྱ་གསུམ། དོན་དག་སྒྲུང་གཏམ་གྱི་ཁུངས་སྣེ་བྱེད་པ་ཞེས་པ་ནི་ཅི་ལྟ་བུ་ཞིག་ལ་གོ་དགོས།

ལན།  སྒྲུང་གཏམ་སྐོར་དང་རིམ་པ་ཞིག་ཏུ། དོན་དག་གང་ཞིག་ཐོག་མར་ཇི་ལྟར་བྱུང་བ།བར་དུ་ཇི་ལྟར་འགྱུར། མཇུག་འབྲས་ཅི་ཞིག་སྨིན་པ་སོགས་གོ་རིམ་ཡོད་པ་དང་གཟུགས་རིས་གསལ་བའི་ངང་ནས་བརྗོད་བཞིན་ཡོད་ལ། གཞུང་ལུགས་སྨྲ་བ་རྣམས་ཀྱིས་འདི་ལྟར་བརྩམས་པའི་སྒྲུང་གཏམ་ནི་དོན་དག་ཁུངས་སྣེ་བྱས་པའི་སྒྲུང་གཏམ་གྱི་གྲས་སུ་དྲངས་ཆོག་པར་བརྗོད། འདོད་ཚུལ་འདི་དང་བསྟུན་ནས་ཞིབ་ཏུ་དཔྱད་པ་ན། ཁོ་བོའི་སྒྲུང་གཏམ་རྣམས་ལས《སྲིན་པོ་གཡུ་རྔོག་དང་ཉི་མ་ལྷ་ས》དང་།《གནས་རི》དང་།《ཀྱེ་མ།   ཛམ་བྷ་ལ་མི་ཡུལ་ལ་ཕེབས་བྱུང》དང་།《ཟླ་བ་དང་མེ་ལོང》སོགས་ནི་དོན་དག་ཁུངས་སྣེ་བྱས་པའི་སྒྲུང་གཏམ་གྱི་གྲས་སུ་གཏོགས་པར་འདོད།

གྱ་བཞི།  དོན་དག་སྒྲུང་གཏམ་གྱི་ཁུངས་སྣེར་འདྲེན་ན་ཆ་རྐྱེན་གང་དག་ལྡན་དགོས།

   ལན། དོན་དག་གང་ཞིག་སྒྲུང་གཏམ་གྱི་ཁུངས་སྣེ་བྱེད་ན་ཆ་རྐྱེན་འདི་འདྲ་ལྡན་དགོས་པ་འདྲ་སྟེ། གཅིག སྒྲུང་གཏམ་གྱི་བརྗོད་བྱར་གྱུར་པའི་དོན་དག་ནི་མགོ་མཇུག་ཚང་པ།ཡིད་དབང་འཕྲོག་པ། འགྱུར་ལྡོག་རང་བཞིན་ལྡན་པ་ཞིག་ཡིན་དགོས། གཉིས། སྒྲུང་གཏམ་གྱི་ཁུངས་སྣེ་ནི་དོན་དག་ཡིན་རུང་། བརྩམས་ཆོས་སྲོག་ཤིང་ནི་ཅིས་ཀྱང་མི་སྣ་ཡིན་དགོས་ཏེ། གལ་སྲིད་དོན་དག་བརྗོད་དེ་མི་སྣ་ལ་རང་དབང་མེད་པར་གྱུར་པ་དང་། དོན་དག་གིས་མི་སྣ་ཡོངས་སུ་བསྒྲིབས་པའམ། ཡང་ན་མི་སྣ་ནི་དོན་དག་བརྗོད་པའི་ཡོ་བྱད་ཅིག་ཏུ་གྱུར་པ་ན། སྒྲུང་གཏམ་ནི་གཏམ་རྒྱུད་དུ་གྱུར་པ་ལས་མ་འདས། གསུམ། དོན་དག་ལ་བརྟེན་ནས་མི་སྣ་དང་མི་སྣའི་བར་ལ་འགལ་བ་དང་འབྲེལ་བ་འབྱུང་དགོས་པ་དང་། འགལ་བ་དང་འབྲེལ་བར་བརྟེན་ནས་མི་སྣའི་སྣང་བརྙན་གསར་སློང་བྱེད་ཐུབ་དགོས།

   ལན། དངོས་པོ་གང་དང་གང་ཞིག་གནད་དུ་བཟུང་སྟེ་མི་སྣ་དང་མི་སྣའི་བར་གྱི་འགལ་བ་དང་འབྲེལ་བ། མི་སྣའི་རིན་ཐང་ལྟ་ཚུལ། མི་སྣའི་ལས་དབང་གི་འགྱུར་ལྡོག་སོགས་བསྟན་དང་སྟོན་བཞིན་ཡོད་པའི་སྒྲུང་གཏམ་ནི་དངོས་པོ་ཁུངས་སྣེ་བྱས་པའི་སྒྲུང་གཏམ་གྱི་གྲས་དྲངས་ཆོག་པར་བརྗོད། ཁོ་བོའི་སྒྲུང་གཏམ་རྣམས་ལས《དཔལ་འབྱོར》དང་།《མེད》དང་།《རྒྱན་བྱང》དང་།《སྒྲོལ་མ་ཉེར་གཅིག》གི་བཅུ་དགུ་པ་སྟེ《ས་སྲོས་ཀྱི་འབྲུག་སྒྲ》བཅས་ནི་དངོས་པོ་ཁུངས་སྣེ་བྱས་པའི་སྒྲུང་གཏམ་གྱི་གྲས་སུ་གཏོགས་དགོས་འདུག

གྱ་དྲུག དངོས་པོ་སྒྲུང་གཏམ་གྱི་ཁུངས་སྣེར་འདྲེན་ན་ཆ་རྐྱེན་གང་དག་ལྡན་དགོས།

   ལན། དངོས་པོ་ཁུངས་སྣེར་བཟུང་སྟེ་སྒྲུང་གཏམ་གསར་རྩོམ་བྱེད་ན་ཆ་རྐྱེན་འདི་འདྲ་ཡོད་པ་འདྲ་སྟེ། གཅིག སྐབས་སུ་བབས་པའི་དངོས་པོ་དེ་ཉིད་ལ་བརྟེན་ནས་བྱུང་རིམ་ཆ་ཚང་བའི་གཏམ་རྒྱུད་ཅི་རྫོགས་པར་བརྗོད་ཐུབ་དགོས། གཉིས། དངོས་པོ་འཚོལ་བ་དང་རྙེད་པ། ཐོབ་པ་དང་ཤོར་བ་སོགས་ལ་བརྟེན་ནས་མི་སྣའི་གཤིས་ཀའམ་ལས་དབང་གི་འགྱུར་ལྡོག་མཚོན་ཐུབ་དགོས།

གྱ་བདུན། སེམས་ཁམས་སྒྲུང་གཏམ་གྱི་ཁུངས་སྣེ་བྱེད་པ་ཞེས་པ་ནི་ག་འདྲ་ཞིག་ལ་གོ་ན་འགྲིག་པ་ཡིན་ནམ།

   ལན། སྒྲུང་གཏམ་གསར་རྩོམ་བྱེད་སྐབས། བྱུང་རིམ་ནི་མི་སྣའི་སེམས་ཁམས་དང་བསྟུན་ནས་མདུན་ལ་འདེད་པ་དང་། མི་སྣའི་སེམས་ཁམས་ཀྱི་འགྱུར་ལྡོག་རེ་རེ་ནི་བྱུང་རིམ་རེ་རེའི་སྐྱོག་མཚམས་བྱས་ཏེ་བརྩམས་པའི་བརྩམས་ཆོས་རྣམས་ནི་སེམས་ཁམས་ཁུངས་སྣེ་བྱས་པའི་སྒྲུང་གཏམ་གྱི་གྲས་སུ་དྲངས་ཆོག འདོད་ཚུལ་འདི་ཉིད་གཞིར་བཟུང་ནས་ཞིབ་ཏུ་དཔྱད་ན། ཁོ་བོའི་སྒྲུང་གཏམ་རྣམས་ལས《སྒྲོལ་མ་ཉེར་གཅིག》གི་གཉིས་པ་སྟེ《མཁའ་མཐའི་ཉི་མ》དང་བཅོ་ལྔ་པ་སྟེ《རྨ་ཆུ། འདི་ནས་རྒྱང་ལ་འཐེན》དང་།《གལ་ཏེ》དང་།《མེ་ལོང་ནང་གི་ཕྱེ་མ་ལེབ》དང་།《དྲེད་མོང》རྣམས་ནི་མི་སྣའི་སེམས་ཁམས་ཁུངས་སྣེ་བྱས་ཏེ་བརྩམས་པའི་སྒྲུང་གཏམ་གྱི་གྲས་སུ་གཏོགས་པ་སྙམ།

གྱ་བརྒྱད། དངོས་པོ་སྒྲུང་གཏམ་གྱི་ཁུངས་སྣེར་འདྲེན་ན་ཆ་རྐྱེན་གང་དག་ལྡན་དགོས།

   ལན། མི་སྣའི་སེམས་ཁམས་ཁུངས་སྣེར་བཟུང་སྟེ་སྒྲུང་གཏམ་གསར་རྩོམ་གྱི་ལས་ལ་འཇུག་ན། ཆ་རྐྱེན་ནི་འདི་འདྲ་ཚང་དགོས་པ་འདྲ་སྟེ། གཅིག མི་སྣའི་སེམས་ཁམས་ལ་ཐུན་མོང་མ་ཡིན་པའི་ཁྱད་ཆོས་ལྡན་དགོས། གཉིས། མི་སྣའི་སེམས་ཁམས་ཀྱི་འགྱུར་ལྡོག་ལ་བརྟེན་ནས་བྱུང་རིམ་ཆ་ཚང་བ་ཞིག་འབྲི་བར་ནུས་དགོས། གསུམ། སྒྲུང་གཏམ་གྱི་བྱུང་རིམ་ནི་མི་སྣའི་སེམས་ཁམས་ཀྱི་འགྱུར་ལྡོག་ལ་བརྟེན་ནས་མདུན་ལ་འདེད་ནུས་དགོས། བཞི། མི་སྣའི་སྣང་བརྙན་ནི་མི་སྣའི་སེམས་ཀྱི་འགྱུར་ལྡོག་དང་འགྱུར་ལྡོག་ལ་བརྟེན་ནས་བྱུང་བའི་སྤྱོད་ལམ་གྱིས་གསར་སློང་བྱེད་ཐུབ་དགོས།

གྱ་དགུ། ཅི་ཞིག་ལ་སྤྲོས་བརྗོད་བྱེད་ལུགས་ཟེར་བ་དང་། སྒྲུང་གཏམ་ལ་རྒྱུགས་ཆེ་བའི་སྤྲོས་བརྗོད་བྱེད་ལུགས་གང་དག་ཡོད།

   ལན། དོན་གྱི་བྱུང་བ་བརྗོད་པའི་བརྩམས་ཆོས་ལ་ཆ་མཚོན་ན། དེ་ཉིད་ཀྱི་བརྗོད་བྱའི་ཚན་པ་རྣམས་ལ་དུས་ཚོད་ཀྱི་རིང་ཐུང་དང་གོ་རིམ་མི་འདྲ་བའི་བརྒལ་རིམ་ཞིག་ཡོད་ལ། བརྗོད་བྱའི་དོན་གང་དང་གང་པ་དེ་བརྩམས་ཆོས་བརྒྱུད་ནས་སྟོན་སྐབས་ཀྱི་སྔ་ཕྱིའི་གོ་རིམ་སྒྲིག་ལུགས་ལ་སྤྲོས་བརྗོད་བྱེད་ལུགས་ཟེར་བར་འདོད་དེ། འོ་ན་སྒྲུང་གཏམ་ལ་སྤྲོས་བརྗོད་བྱེད་ལུགས་ག་འདྲ་ཡོད་དམ་ཞེ་ན། རྒྱུགས་ཆེ་བའི་སྤྲོས་བརྗོད་བྱེད་ལུགས་ནི་གསུམ་ཡོད་པར་བཤད་དེ། དེ་དག་ནི་རིམ་བརྗོད་དང་། ལྡོག་བརྗོད་དང་། གསབ་བརྗོད་རྣམས་སོ།།

དགུ་ཅུ། ཅི་ཞིག་ལ་རིམ་བརྗོད་ཟེར།

   ལན། སྒྲུང་གཏམ་གང་ཞིག་བློས་སློང་གི་ལས་ལ་འཇུག་སྐབས། བརྗོད་བྱའི་དོན་ལས་གང་ཞིག་སྔོན་ལ་བྱུང་ན་དེ་ཉིད་སྔོན་ལ་བརྗོད་པ་དང་། གང་ཞིག་རྗེས་ནས་བྱུང་ན་དེ་ཉིད་རྗེས་སུ་བརྗོད་དེ། བརྗོད་བྱའི་དོན་གྱི་གོ་རིམ་ནི་དོན་དག་བྱུང་བའི་དུས་ཚོད་ཀྱི་གོ་རིམ་དང་བསྟུན་བཞིན་ཡོད་ལ། བརྗོད་ལུགས་འདི་ལ་གཞུང་ལུགས་སྨྲ་བ་རྣམས་ཀྱིས་རིམ་བརྗོད་ཟེར་བ་ཡིན། འཛམ་གླིང་གི་སྒྲུང་གཏམ་ཕལ་མོ་ཆེ་ནི་རིམ་བརྗོད་ཀྱི་ལུགས་ལྟར་བརྩམས་ཡོད་པ་འདྲ་ཞིང་། ཁོ་བོའི་སྒྲུང་གཏམ་རྣམས་ལས《གལ་ཏེ》དང་།《ཤ》དང་།《མེད》དང་།《དགེ་འདུན། དགེ་བཅུའི་ཁྲིམས།ད་དུང་གཡག་རོག་པོ་བཅས་ཀྱི་གཏམ་རྒྱུད》དང་།《དར་ལྕོག རླུང་བུ། ད་དུང་ལྷེམ་ལྷེམ་གཡོ་བའི་རླུང་རྟ》སོགས་ཀྱི་སྤྲོས་བརྗོད་བྱེད་ལུགས་ནི་རིམ་བརྗོད་ཀྱི་ཁོངས་སུ་གཏོགས་པར་འདོད།