གངས་འཁྱམ་གསར་བུ། 2020-09-16
མི་རྣམས་ཀྱི་ངག་རྒྱུན་དུ།
ཁྱོད་ནི་གསང་རྒྱའི་བན་བུན་གྱིས་གྲུབ་པའི་མུ་ཏིག་ཅིག་
རེད་ཟེར།
མཚན་མོ་གཅིག་གི་དུས་ཡུན་དུ།
ཁྱོད་རང་རང་ཉིད་ཀྱི་མངའ་རིས་ནས་གར་སོང་
ཆ་མེད་དུ་སོང་ཟེར།
དུས་དེ་ནས་ཟུང་།
ལོ་ཟླའི་རྣག་ཁྲག་ཤིང་རྟས་དྲུད་ཅིང་།
རླུང་གི་མེ་རོས་མཐོ་སྒང་ཚིག་པར་བྱས།
ང་རང་། ཁྱོད་ཀྱི་ནམ་མཁར་བྲིས་པའི།
དབུགས་རྒྱུ་སྐམ་པའི་ཕྱེ་ལེབ་ཅིག་ཡིན་ཕྱིར།
ཁྱོད་ཀྱི་རི་བོའི་དངོ་དང་གངས་རིའི་རྩིབ་མ།
ཁྱུར་མིད་དུ་བཏང་ཐབས་བྱས།
གཟན་ཤམ་སྨུག་པོ་གཅིག
ཀེང་རུས་ཇི་བཞིན་ཀེམ་ཀེམ་དུ་གཡོ་དུས།
ཁྱོད་ཀྱི་ཐོར་ཅོག་གི་གཟི་མིག་དགུ་པ།
ཕ་གིའི་བྲག་སྟོད་ཀྱི་རྒོད་པོ་ཇི་བཞིན།
ནམ་མཁའ་ཡོངས་སུ་མནན་ཞིང་།
སེང་གེས་སྡེར་མོ་བགྲད་པའི་མཆོད་རྟེན་གྱི་
ཨི་གུང་ཞིག་ཏུ།
ཨུ་ཚུགས་ཀྱིས་འཕུར་ནས། ནམ་ཡང་གཉིད་སོང་།
གཟན་ཤམ་སྨུག་པོ་དེ་ནས་མདའ་གྲིའི་དམར་གྲི་
འཐུལ་བྱུང་།
ཉི་མ་ནུབ་རིའི་རྩེ་མོ་ནས་ཟུམ་རྗེས།
མཐོ་སྒང་ནི་ཁེར་རྐྱང་གི་རྒྱབ་གཟུགས་ཤིག་རེད།
གུ་གེ་གནའ་ཤུལ།
མིད་པ་བརྣངས་བྱུང་ངམ།
འོ་དོད་དང་སྨྲེ་སྔགས་ང་ལ་ལབ་རོགས།
མཐོ་ལྡིང་དགོན་པ།
ཁྱོད་ཀྱི་གསང་བའི་སྒེའུ་ཁུང་ཕྱེ་རོགས།
ང་ནི་ན་ཟུག་གིས་གཟེར་བའི་ཕྱེ་ལེབ་ཅིག་ཡིན་པས།
ཁྱོད་ཀྱི་རུམ་ཁུང་དུ་གནས་ཚང་གཡར་རོགས།
རྩོམ་གསར། 10