ཤེལ་དཀར་པོ། 2020-09-14
སེམས་ཀྱི་འདང་གི་ཆུ་མོ་ཕར་ལ་བཞུར།།
མིག་གི་དཔལ་གྱི་འཛུམ་རིས་ཚུར་ལ་གཡོ།།
དྲན་པའི་བཅུད་ཀྱི་མར་ལོའི་ཁུ་ཞག་འཁྱིལ།།
ཆ་མེད་ཚོར་བའི་རླུང་བུ་ཡད་ཡུད་རྒྱུ།།
ལྷིང་འཇགས་ཟས་སུ་ཟ་བའི་ནམ་གུང་ལ།།
སྨག་ཚོགས་གཏིང་ལ་འཕྱོ་བའི་ཚོར་བ་ཞིག།
སྟོན་རླུང་ཆུ་བུར་རྡོལ་བའི་སྦུབ་རྒྱ་ནས།།
ཚེས་རིས་ཟླ་བའི་ཟེར་ལ་འདུན་མ་འཕྲོས།།
ལྷགས་རླུང་མྱ་ངན་མཆེད་པའི་མཚན་ལམ་དུ།།
རྨི་ལམ་ཁམས་ལ་གྱེས་བའི་བར་དོ་ཞིག།
སྒོ་ཁྱིའི་གཅོང་སྐད་འཐོར་བའི་སྔངས་མཐའ་ནས།།
སྐར་མ་འཛུམ་པའི་ཟུར་མིག་སྙིང་ལ་སྡུག།
མཁའ་ཡི་ཕྲ་ལ་བཏབ་པའི་དགུ་ཚིགས་ཀྱི།།
བསིལ་བར་བྱེད་ལ་མཆོག་པའི་ཟླ་བ་ཡི།།
མ་བཅོས་པད་མའི་རང་མདངས་མ་ཡལ་བའི།།
འཛུམ་པ་རང་གྲོལ་དེ་ཡང་སྨག་གིས་ཟོས།།
མུན་པའི་རལ་ཁ་གསིག་པའི་མལ་ཁང་དུ།།
བདེ་སྡུག་གཉིས་ཀྱིས་མནར་བའི་སྣང་བ་ཡིས།།
རྟོག་བཏགས་རི་མོ་འགྱུ་བའི་ཕ་མཐའ་ནས།།
ཁེར་རྐྱང་གདུང་བ་བསལ་བའི་སྙན་ངག་དྲན།།
རྩོམ་གསར། 10