ཤེལ་དཀར་པོ། 2019-03-20
བརྩེ་དུང་གློག་བརྙན་ཞིག་ལ་
བལྟས་པས་ཞའོ་མོའི་ཚབ་ཏུ་བྲིས་པ།
དམར་ཆུང་སྙིང་ལ་འཛུལ་ཡོད།།
མིག་ཟུང་མདངས་ལ་སིམ་ཡོད།།
ལས་ཀྱི་ལས་གྲོགས་ཆུང་ཆུང་།།
ལས་ཀྱི་མཐའ་ན་ལུས་ཡོད།།
འཁོར་བའི་སྒྲུང་ཆེན་ནང་གི།
མར་ལོ་བཅུད་ཀྱི་ཉིང་ཁུ།།
སེམས་ཀྱི་གྲིབ་ཡོལ་འོག་ནས།།
ཉི་མས་ཚ་ཁུ་མ་བཅུག།
གསོལ་བ་ལྷ་ལ་བཏབ་ནས།།
ལོ་ཟླ་ཆུ་ལ་བསྐྱུར་ཏེ།།
ཉིན་སྲིབ་གཉིས་ཀའི་མཚམས་སུ།།
ཁྱོད་ཉིད་མིག་གིས་འཚོས་བཞག།
དུང་དུང་ངག་གིས་མ་ཁྲོལ།།
དགའ་དགའ་ལུས་ཀྱིས་མ་བསྟན།།
སེམས་ཀྱི་རྟ་རྒོད་འཆོར་ཡང་།།
ཁྱེད་ཉིད་ཟིན་དུས་མེད་ཁུ།།
ལས་ཀྱི་ལ་མོ་ཐང་ནས།།
ལས་ཀྱི་བང་ཁ་བཙན་པས།།
ལས་ཀྱི་སོ་སོའི་གནས་ལ།།
ལས་ཀྱི་ངང་གིས་གྱེས་ཐལ།།
སེམས་ལ་སྨུག་པ་ལང་ལོང་།།
ལས་ལམ་རབ་བེ་རིབ་བེ།།
རི་དྭགས་སྐྱོ་གླུའི་གཞས་དེ།།
ངག་ནས་སྐྱོར་དགོས་བྱུང་ཐལ།།
རི་ཆུ་ཁྲག་ཁྲིག་བར་ནས།།
རྣ་བས་ཁྱོད་ལ་ཉན་འདུག།
ཡིད་ཀྱིས་ཁྱོད་རང་རུམ་འདུག།
རེ་བས་ཁྱོད་རང་སྒུག་འདུག།
ཡུལ་སྡེའི་མི་ཁ་རླུང་རེད།།
རླུང་བུ་ལྡང་ན་ལྡང་ཡང་།།
བུ་ལ་འཚེས་སྣང་མེད་པར།།
ཉིན་མཚན་སོར་མོས་བརྩིས་ཡོད།།
ཁུ་བྱུག་ལྷོ་ལ་འཕུར་སོང་།།
ཚང་ཚིང་ཤུལ་དུ་ལུས་སོང་།།
ནམ་ཞིག་ཕྱི་ལ་བསླེབས་ན།།
ཚང་མལ་ཚང་ཚིང་ཨེ་བཅའ།།
ཁ་བ་འབབ་ཐེངས་མང་བས།།
རྐང་ལམ་ཁ་བས་མནན་སོང་།།
བཙལ་འདོད་ཞེ་ལ་འཁོར་ཡང་།།
ལམ་བུ་འཁྲུལ་བའི་གནས་རེད།།
ཀུ་མུད་འདབ་མ་རྒྱས་དུས།།
ཟླ་བ་སྤྲིན་གྱིས་བསྒྲིབས་སོང་།།
ཟླ་བ་འཛུམ་གྱིས་ཚེས་དུས།།
ཀུ་མུད་སད་ཀྱིས་བཅོམ་སོང་།།
ང་ནི་ཉི་མ་སེར་པོ།།
ཁྱོད་ནི་ཟླ་བ་དཀར་པོ།།
བསྐལ་བརྒྱ་ཡུན་གྱིས་འདས་ཀྱང་།།
འཛོམས་པའི་དུས་ཤིག་མེད་དོ།།
རྩོམ་གསར། 10