དུང་རིང་སྙིང་ལྕགས་བཀྲ་ཤིས། 2017-12-08
སྒྱུ་འཕྲུལ་པིར་རྩེར་ལན་གཅིག་བསྐྱོད་ནས། །
སྙན་མོ་ཚིག་འབྲུ་རེ་རེ་བཞིན་དུ། །
རང་སྣང་དུང་བ་འཚམས་པའི་གླུ་ཞིག །
དྲིན་ཆེན་ཕ་མ་དགྱེས་བར་ལེན་ནོ། །
ཕོ་ལོ་སུམ་ཅུ་མི་དྲན་དགུ་དྲན། །
བརྩེ་ལྡན་དྲིན་ཆེན་ཕ་ལོ་མ་ལོའི། །
གཞལ་མེད་སྐུ་དྲིན་སྙིང་ནས་དྲན་ན། །
སེམས་ལ་སོས་མེད་རྨ་ཁ་བཏོད་འོང་། །
ཞི་བདེ་འཚོ་བའི་ཆུ་གཏེར་ཀློང་ན། །
འཛད་འཕྲིན་རླབས་རྒྱུན་མཁའ་རུ་འཕྱོ་བའི། །
དྲིན་ཆེན་ཕ་མའི་བཀའ་དྲིན་དྲན་ན། །
ཡིད་སྨོན་སེམས་འགུལ་ཞེ་ལ་ཐེབས་སོང་། །
བུ་ཆུང་གཉོམ་ལག་རྒྱས་པའི་ཕྲེང་ནས། །
ཉིན་ཞག་དབྱེར་མེད་སྡུག་ལས་མྱོང་བ། །
དྲན་ཞིང་དྲན་ན་བཟོད་ཐབས་དཀའ་བའི། །
སྐྱོ་སྣང་མུན་པས་ཡ་ཆུང་བཀླུབས་སོང་། །
སྐྱོ་བའི་མིག་ཆུ་མར་མར་འགྲིལ་པ། །
འགྱོ ད་སྣང་སེམས་ཀྱི་གདུང་དབྱངས་སྙམ་པས། །
ཐུགས་རྗེ་འོད་ཀྱི་བྱིན་རླབས་ཙམ་ཞིག །
རྒྱང་རིང་བུ་ལ་ཟུར་ཙམ་གནང་རོགས། །
དབང་མེད་བུ་ལོ་ས་མཐར་རྫོངས་ནས། །
ཅི་བྱེད་འདི་བྱེད་རང་དབང་བོར་དུས། །
ཕ་ལོ་མ་ལོའི་གཅེས་ལངས་སྐབས་ཀྱི། །
བདེ་སྐྱིད་འཚོ་བའི་སྤྲོ་སྣང་དྲན་སོང་། །
དྲིན་ཆེན་སེམས་ཀྱི་ཉི་ཟླ་ཟུང་གི །
བདུད་རྩིའི་སྙིང་གི་བྱིན་རླབས་བསམ་ན། །
དྲན་པའི་མིག་གི་མཆི་མའི་ཐིགས་ཕྲེང་། །
བསགས་པའི་རྒྱ་མཚོའི་གཞུང་ལ་འདྲེས་ཡོད། །
སྙན་པའི་གཞས་ཀྱི་གླུ་ཚིག་འདྲ་ཞིག །
སེམས་ན་མཆིས་ཀྱང་སྙིང་པོ་བྲལ་བས། །
བདེན་ཐོག་དྲིན་ལན་ལན་གཅིག་འཇལ་བར། །
ཉིན་ཞག་དབྱེར་མེད་སྙིང་ལ་བཅངས་ཡོད། །
ལུང་ཀྱོག་སྐམ་པོའི་སྟོང་ཉིད་སྒོམ་བཞིན། །
བཙག་དང་སེར་བའི་ན་ཟུག་བསྲན་བཞིན། །
རྒྱང་རིང་ཕ་མའི་བྱམས་བརྩེ་དྲན་བཞིན། །
ངག་གི་འགྱུར་ཁུག་དབྱངས་ལ་བཀུག་ཡོད། །
མི་རྐྱང་འཚོ་བའི་སུན་སྣང་རོལ་དུས། །
ཐབས་མེད་ཆང་གིས་ཉིན་ཞག་སྐྱེལ་དུས། །
རྨོངས་པའི་ཞེ་ནས་མིག་ཆུ་ཤོར་དུས། །
བརྗེད་དཀའི་ཉིན་ཐོ་ཡིད་ལ་བྲིས་ཡོད། །
ཟག་བཅས་དལ་འབྱོར་བརླ་རྐང་ཟད་བར། །
སེམས་ཀྱི་དབྱིངས་ལ་བཀལ་བའི་ཉི་ཟླ། །
རྟེན་འདིར་ཐོབ་པའི་དྲིན་ཅན་ཡིན་ཕྱིར། །
བསམ་ཞིང་བསམ་ན་ཝ་ལེར་དྲན་འོང་། །
དཔག་མེད་སྐུ་དྲིན་གཞལ་མེད་ཡིན་པས། །
རིང་བའི་ས་མཐའི་ཡུལ་གྲུ་ཞིག་ནས། །
དྲན་པའི་ཡིད་ཀྱི་བདེ་སྡུག་རེ་རེ། །
རབ་དཀར་ཤོག་བུའི་ཐང་ལ་བཀོད་སོང་། །
རྩོམ་གསར། 10