བཀྲ་ཤིས་རྣམ་རྒྱལ། 2017-12-06
ཀ་ཁ་སྦྱངས་ནས་ལོ་མང་འགོར་ན་ཡང་། །
ཁ་གཡེང་མིག་གཡེང་བྱས་པའི་འབྲས་བུ་ལ། །
ག་ས་གང་དུ་སྐྱོད་ཀྱང་ཐ་མར་ལྷུང་། །
ང་ཡི་སེམས་ལ་འགྱོད་སེམས་མཁའ་རླངས་འཁྲིགས། །
ཅ་ཅོའི་འཆལ་གཏམ་བཤད་ནས་ཉི་མ་བཏང་། །
ཆ་ལུགས་གཡོ་སྒྱུ་ཅན་གྱི་རྗེས་སུ་འབྲངས། །
ཇ་ཆང་ལོངས་སྤྱོད་ཕྱོགས་ལ་སེམས་པ་ཤོར། །
ཉ་མོ་ཆུ་དང་བྲལ་འདྲའི་ཡིད་སེམས་སྐྱོ། །
ཏ་ཐའི་སློབ་མ་བཟང་པོའི་རྗེས་སུ་འབྲངས། །
ཐ་མའི་བྱ་སྤྱོད་ངན་པ་བཤོལ་ན་ལེགས། །
ད་ལྟའི་སློབ་སྦྱོང་གོ་སྐབས་དམ་འཛིན་གྱིས། །
ན་ཟླ་ངེད་ཚོ་མ་འོངས་བདག་པོ་ཡིན། །
པ་སངས་ཤེས་བྱ་གནང་མཁན་བཤེས་གཉེན་མཆོག །
ཕ་རོལ་གཞན་དོན་འཕྲིན་ལས་སྒྲུབ་མཁན་ཚོ། །
བ་ལང་ཤ་ཚུགས་མཁན་རྣམས་འདྲེན་མཁན་མཆོག །
མ་ལུས་ཡོན་ཏན་འབྱུང་སྒོ་སློབ་དཔོན་བསྟེན། །
ཙ་རི་གནས་སྐོར་སེམས་ནས་འདོད་ན་ཡང་། །
ཚ་ཚ་འུར་འུར་མ་བྱས་སྙིང་རེ་རྗེ། །
ཛ་དྲག་འགྲན་རྩོད་ཆེན་པོས་འཛམ་གླིང་འཕེལ། །
ཝ་ལེར་བསམ་ན་རང་རིགས་རྗེས་སུ་ལུས། །
ཞྭ་མོ་གྱོན་གོས་སུ་བཟང་མི་འགྲན་ལ། །
ཟ་རྒྱུ་བཏུང་རྒྱུ་ཁོ་ན་མི་བསམ་པར། །
འ་ཅག་འཕེལ་རྒྱས་འགྲོ་བར་རིག་གནས་སྦྱོང་། །
ཡ་རབས་ཤེས་བྱ་ཐམས་ཅད་ཚུར་ལེན་དགོས། །
ར་རོ་ཆང་སོགས་སྤྱོད་ངན་རིང་དོར་ཏེ། །
ལ་རྒྱའི་དར་ཆ་འཕྱར་ཏེ་ཡོན་ཏན་སྦྱང་། །
ཤ་ཞེན་དོན་དང་ལྡན་པའི་རིག་གནས་འདི། །
ས་གཞིའི་སྟེང་དུ་རྐང་པ་ཚུགས་དགོས་ན། །
ཧ་ཧ་བོད་ཀྱི་ན་གཞོན་ཤེས་ལྡན་ཚོ། །
ཨ་གསར་མེད་པར་རིག་པའི་གནས་ལ་སྦྱོང་། །
རྩོམ་གསར། 10