པད་མ་སངས་རྒྱས། 2017-10-16
མཁའ་དབྱིངས་སྔོན་པོ་ཡངས་ཤིང་རྒྱས།།
ཁྲི་གདུགས་ཉི་མའི་འཛུམ་མདངས་བཀྲ།།
དུང་མདོག་ཟླ་བའི་ཞལ་རས་དཀར།།
སྤྲིན་དང་དགྲ་གཅན་ཁྲོས་པས་བསྒྲིབས།།
ཧི་མ་ལ་ཡ་བརྗིད་ཅིང་མཐོ།།
མ་ཕམ་གཡུ་མཚོ་འཁྱིལ་ཞིང་མཛེས།།
ནེའུ་གསེང་གཡུ་ལོ་ཕྱུག་ན་ཡང་།།
དུས་ཀྱི་བསྐལ་བས་འཇིག་པའི་རྒྱུ།།
གནག་ཕྱུགས་འབྲི་མོས་ངུར་སྒྲ་སྒྲོགས།།
གཡང་དཀར་ལུག་གི་འབའ་སྒྲ་དང་།།
མདོ་བ་རྟ་ཡི་རྨིག་སྒྲ་སོགས།།
སྟག་སེང་སྤྱང་ཀིས་གཞོམ་པར་བྱེད།།
སེར་ཆེན་མེ་ཏོག་ཆོས་གོས་བཞིན།།
དཀར་ཆེན་མེ་ཏོག་ཟླ་བ་ཉིད།།
ཨུཏྤལ་སྔོན་མོ་གཡུ་ལྗང་ཅན།།
སད་དང་སེར་བས་བཅོམ་པར་བྱེད།།
རྒྱུ་ནོག་དཔོན་པོའི་ཐོབ་ཐང་ངམ།།
སྨན་ཆུང་བུ་མོའི་སྒེག་ཉམས་དང་།།
སྟག་ཤར་གཞོན་ནུའི་དཔའ་རྩལ་རྣམས།།
གཤིན་རྗེའི་ཞགས་པས་འཛིན་ལུགས་གཅིག།
མི་ཉིད་འཁོར་བར་མགོ་འཁོར་ནས།།
སེམས་ཅན་སྡིག་པའི་ལག་ཆ་བྱེད།།
ཕྱེ་ལེབ་མེ་འོབས་མཆོང་བ་བཞིན།།
འཇིག་རྟེན་སྙིང་བོ་འདི་འདྲ་རེད།།
ཡོད་ཚད་ཡོད་ཚད་ཐམས་ཅད་དེ།།
མི་རྟག་འཆི་བའི་རང་བཞིན་ལ།།
བདག་འཛིན་དམ་པོས་བཅངས་བ་འདི།།
འཇིག་རྟེན་བདེན་མེད་ཁོ་ན་འོ།།
རྩོམ་གསར། 10