ལྕགས་ལམ་དང་གཞུང་ལམ། གློག་ཤུགས། གློག་འཕྲིན་སྐུད་ལམ། རྡོ་སྣུམ་དང་རང་བྱུང་སོལ་རླངས་ཀྱི་སྦུ་གུ་སོགས་བདག་གཉེར་ལས་ཁུངས་ཀྱིས་ངེས་པར་དུ་དེའི་རྩྭ་ཐང་མེ་འགོག་གི་འགན་འཁྲི་མངའ་ཁོངས་ནང་མེ་འགོག་བྱེད་ཐབས་དངོས་འབེབས་བྱས་ཏེ། རྩྭ་ཐང་ལ་མེ་སྐྱོན་འབྱུང་བ་སྔོན་འགོག་བྱེད་དགོས།
     རྩྭ་ཐང་འགན་གཙང་ལེན་དང་བདག་གཉེར་བྱས་པའི་མི་སྒེར་གྱིས་འགན་གཙང་ལེན་དང་བདག་གཉེར་བྱས་པའི་རྩྭ་ཐང་སྟེང་མེ་ཁུངས་དོ་དམ་ལ་ངེས་པར་དུ་ཤུགས་སྣོན་པ་དང་མེ་སྐྱོན་འབྱུང་བའི་མངོན་མེད་རྐྱེན་ངན་མེད་པར་བཟོ་བ། རྩྭ་ཐང་མེ་འགོག་གི་འོས་འགན་ལག་བསྟར་བྱེད་དགོས།
    དོན་ཚན་ཉེར་བཞི་བ། ཞིང་ཆེན་དང་རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་ཀྱི་མི་དམངས་སྲིད་གཞུང་གིས་རང་ས་གནས་ཀྱི་དོན་དངོས་ལྟར་རྩྭ་ཐང་མེ་འགོག་ཁུལ་གཙོ་བོ་དབྱེ་འབྱེད་གཏན་འབེབས་བྱས་ཏེ། རྒྱལ་སྲིད་སྤྱི་ཁྱབ་ཁང་གི་རྩྭ་ཐང་སྲིད་འཛིན་གཙོ་གཉེར་སྡེ་ཁག་ལ་ཡར་ཞུ་བྱས་ཏེ་ཐོ་འགོད་བྱེད་དགོས།
    རྩྭ་ཐང་མེ་འགོག་ཁུལ་གཙོ་བོའི་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་དང་རང་བྱུང་སྲུང་སྐྱོང་ཁུལ་གྱི་དོ་དམ་ལས་ཁུངས་ཀྱིས་དགོས་མཁོ་ལྟར་ཆེད་ལས་ཅན་གྱི་མེ་གསོད་རུ་ཁག་འཛུགས་པ་དང་། འབྲེལ་ཡོད་ཞང（གྲོང་རྡལ）དང་སྡེ་བས་མང་ཚོགས་ཅན་གྱི་མེ་གསོད་རུ་ཁག་འཛུགས་དགོས། མེ་གསོད་རུ་ཁག་ལ་ཆེད་ལས་གསོ་སྦྱོང་བྱེད་དགོས་པ་མ་ཟད། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་བཀོད་འདོམས་དང་བཀོད་སྒྲིག་དང་ལེན་བྱེད་དགོས།
    དོན་ཚན་ཉེར་ལྔ་བ། རྫོང་རིམ་པ་ཡན་གྱི་མི་དམངས་སྲིད་གཞུང་གི་རྩྭ་ཐང་མེ་འགོག་གཙོ་གཉེར་སྡེ་ཁག་དང་གནམ་གཤིས་གཙོ་གཉེར་ལས་ཁུངས་ཀྱིས་ངེས་པར་དུ་མཉམ་འབྲེལ་སྒོས་རྩྭ་ཐང་མེ་འགོག་དང་ཉེན་འགོག་ཐད་ནས་སྔོན་བརྡ་དང་ཉེན་བརྡ་སྔོན་ནས་གཏོང་བའི་ལམ་ལུགས་འཛུགས་དགོས། གནམ་གཤིས་གཙོ་གཉེར་ལས་ཁུངས་ཀྱིས་རྩྭ་ཐང་མེ་འགོག་གི་དགོས་མཁོ་དངོས་ལྟར། རྩྭ་ཐང་མེ་སྐྱོན་གནམ་གཤིས་ཀྱི་རིམ་པ་སྔོན་བརྡ་དང་ཁྱབ་བསྒྲགས་བྱེད་པའི་བྱ་བ་ལེགས་པར་བསྒྲུབ་དགོས་པ་དང་། གསར་འགྱུར་སྨྱན་བྱེད་ཀྱིས་ངེས་པར་དུ་རྩྭ་ཐང་མེ་སྐྱོན་གནམ་གཤིས་ཀྱི་རིམ་པ་དུས་ཐོག་ཏུ་བསྒྲག་དགོས།
ལེའུ་གསུམ་པ། རྩྭ་ཐང་མེ་འགོག་གྱི་མེ་གསོད་སྐོར།
    དོན་ཚན་ཉེར་དྲུག་པ།རྩྭ་ཐང་མེ་སྐྱོན་གྱི་གནས་ཚུལ་ལྟ་ཞིབ་ཚད་ལེན་བྱེད་པ་དང་རྩྭ་ཐང་སྟེང་ཐོན་སྐྱེད་བདག་གཉེར་བྱ་འགུལ་སྤེལ་བའི་ལས་ཁུངས་དང་མི་སྒེར་གྱིས་རྩྭ་ཐང་ལ་མེ་སྐྱོན་བྱུང་བ་ཤེས་ན། ངེས་པར་དུ་དགོས་ངེས་ཀྱི་བྱེད་ཐབས་སྤྱོད་དགོས་པ་མ་ཟད། ས་གནས་དེའི་མི་དམངས་སྲིད་གཞུང་དང་ཡང་ན་རྩྭ་ཐང་མེ་འགོག་གཙོ་གཉེར་སྡེ་ཁག་ལ་དུས་ཐོག་ཏུ་ཡར་ཞུ་བྱེད་དགོས། རྩྭ་ཐང་ལ་མེ་སྐྱོན་བྱུང་བ་ཤེས་པའི་ལས་ཁུངས་དང་མི་སྒེར་གཞན་གྱིས་ཀྱང་ངེས་པར་དུ་ས་གནས་དེའི་མི་དམངས་སྲིད་གཞུང་དང་ཡང་ན་རྩྭ་ཐང་མེ་འགོག་གཙོ་གཉེར་སྡེ་ཁག་ལ་དུས་ཐོག་ཏུ་ཡར་ཞུ་བྱེད་དགོས།
      ས་གནས་དེའི་མི་དམངས་སྲིད་གཞུང་དང་ཡང་ན་རྩྭ་ཐང་མེ་འགོག་གཙོ་གཉེར་སྡེ་ཁག་གིས་ཡར་ཞུ་འབྱོར་རྗེས། མྱུར་དུ་མི་སྣ་མེ་སྐྱོན་བྱུང་སར་འགྲོ་བར་རྩ་འཛུགས་བྱས་ནས་ལ། མེ་སྐྱོན་གྱི་གནས་ཚུལ་ཞིབ་བཤེར་གཏན་འབེབས་བྱེད་པ་དང་། ཚོད་འཛིན་དང་མེ་གསོད་བྱེད་ཐབས་སྤྱད་ནས་རྩྭ་ཐང་མེ་སྐྱོན་མཆེད་པར་སྔོན་འགོག་བྱེད་དགོས།
     དོན་ཚན་ཉེར་བདུན་པ། ས་གནས་དེའི་མི་དམངས་སྲིད་གཞུང་དང་ཡང་ན་རྩྭ་ཐང་མེ་འགོག་གཙོ་གཉེར་སྡེ་ཁག་གིས་རྩྭ་ཐང་མེ་འགོག་བྱུང་བའི་དུས་ཚོད་དང་ས་གནས། ཚོད་དཔག་བྱས་པའི་མེ་ཤོར་རྒྱ་ཁྱོན། མེ་སྐྱོན་མཆེད་ཚུལ་སོགས་གནས་ཚུལ་གོང་རིམ་མི་དམངས་སྲིད་གཞུང་དང་དེའི་རྩྭ་ཐང་མེ་འགོག་གཙོ་གཉེར་སྡེ་ཁག་ལ་དུས་ཐོག་ཏུ་ཡར་ཞུ་བྱེད་དགོས། མངའ་ཁོངས་ཕྱིའི་རྩྭ་ཐང་མེ་འགོག་མེ་སྐྱོན་དེས་རང་རྒྱལ་གྱི་རྩྭ་ཐང་བདེ་འཇགས་ལ་འཇིགས་སྐུལ་བཏང་ཚེ། མངའ་ཁོངས་ཕྱིའི་རྩྭ་ཐང་མེད་སྐྱོན་དང་རང་རྒྱལ་མཐའ་ཁུལ་ས་མཚམས་བར་གྱི་བར་ཐག་དང་མཐའ་ཁུལ་དུ་མཆེད་ཚད་དང་རང་རྒྱལ་རྩྭ་ཐང་ལ་འཇིགས་སྐུལ་ཐེབས་ཚད་སོགས་ཀྱི་གནས་ཚུལ་ཡར་ཞུ་བྱེད་དགོས།
     རྩྭ་ཐང་ལ་མེ་སྐྱོན་བྱུང་ཚུལ་གསང་བ་དང་རྫུན་ཞུ་བྱེད་པའམ་མི་གཞན་པར་གསང་ཞུ་དང་རྫུན་ཞུ་བྱེད་དུ་འཇུག་པ་གཏན་འགོག་བྱེད་དགོས།