རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གིས་གཏན་ཁེལ་བྱས་་པའི་རྩྭ་ཐང་མེ་འགོག་གཙོ་གཉེར་སྡེ་ཁག་གིས་རང་སྲིད་འཛིན་མངའ་ཁོངས་ནང་གི་རྩྭ་ཐང་མེ་འགོག་བྱ་བར་གཙོ་བདག་བྱ་རྒྱུ།
     རྫོང་རིམ་པ་ཡན་གྱི་མི་དམངས་སྲིད་གཞུང་འབྲེལ་ཡོད་སྡེ་ཁག་གཞན་དག་གིས་རང་སོ་སོའི་འགན་དབང་ཁྱབ་ཁོངས་ནང་གི་རྩྭ་ཐང་མེ་འགོག་བྱ་བ་ལེགས་པར་བསྒྲུབ་དགོས།
    དོན་ཚན་དྲུག་པ། རྩྭ་ཐང་གི་བདག་གཉེར་བཀོལ་སྤྱོད་ལས་ཁུངས་དང་མི་སྒེར་གྱིས་བདག་གཉེར་དང་བཀོལ་སྤྱོད་བྱེད་པའི་ཁྱབ་ཁོངས་ནང་གི་རྩྭ་ཐང་མེ་འགོག་བྱ་བའི་འགན་འཁུར་དགོས།
    དོན་ཚན་བདུན་པ། རྩྭ་ཐང་མེ་འགོག་བྱ་བ་དེ་སྲིད་འཛིན་མངའ་ཁོངས་གཉིས་ཡན་དང་ཡང་ན་ནགས་ཚལ་མེ་འགོག་དང་གྲོང་ཁྱེར་གྱི་མེ་འགོག་མེ་གསོད་དང་འབྲེལ་བ་ཡོད་ན། འབྲེལ་ཡོད་ཀྱི་ས་གནས་མི་དམངས་སྲིད་གཞུང་དང་འབྲེལ་ཡོད་སྡེ་ཁག་གིས་ངེས་པར་དུ་མཉམ་འབྲེལ་སྔོན་འགོག་ལམ་ལུགས་འཛུགས་དགོས་པ་དང་། མཉམ་འབྲེལ་སྔོན་འགོག་མངའ་ཁོངས་དང་མཉམ་འབྲེལ་སྔོན་འགོག་བྱེད་ཐབས་གཏན་ཁེལ་བྱས་ནས། ཆ་འཕྲིན་འབྲེལ་མཐུད་དང་ལྟ་སྐུལ་ཞིབ་བཤེར་བྱེད་པར་ཤུགས་སྣོན་དགོས།
    དོན་ཚན་བརྒྱད་པ། རིམ་པ་སོ་སོའི་མི་དམངས་སྲིད་གཞུང་དང་ཡང་ན་འབྲེལ་ཡོད་སྡེ་ཁག་གིས་རྩྭ་ཐང་མེ་འགོག་ཐད་ཀྱི་དྲིལ་བསྒྲགས་དང་སློབ་གསོའི་བྱ་འགུལ་ལ་ངེས་པར་དུ་ཤུགས་བསྣན་ནས། སྤྱི་དམངས་ཀྱི་རྩྭ་ཐང་མེ་འགོག་འདུ་ཤེས་མཐོར་འདེགས་བྱེད་དགོས།
    དོན་ཚན་དགུ་བ། རྒྱལ་ཁབ་ཀྱིས་རྩྭ་ཐང་གི་མེ་སྐྱོན་སྔོན་འགོག་དང་མེ་གསོད་བྱ་བའི་ཐད་ནས་ཚན་རིག་ལག་རྩལ་ཞིབ་འཇུག་བྱེད་པར་སྐུལ་བསྟོད་དང་རྒྱབ་སྐྱོར་བྱས་ནས། རྩྭ་ཐང་གི་མེ་སྐྱོན་སྔོན་འགོག་དང་མེ་གསོད་ཐད་ཀྱི་སྔོན་ཐོན་ལག་རྩལ་ཁྱབ་གདལ་དུ་གཏོང་དགོས།
    དོན་ཚན་བཅུ་བ། རྩྭ་ཐང་གི་མེ་སྐྱོན་སྔོན་འགོག་དང་མེ་གསོད་བྱ་བའི་ཁྲོད་བྱས་རྗེས་ཆེན་པོ་བཞག་པའམ་གྲུབ་འབྲས་མངོན་གསལ་ཡིན་པའི་ལས་ཁུངས་དང་མི་སྒེར་ལ་རྒྱལ་ཁབ་ཀྱི་འབྲེལ་ཡོད་གཏན་འབེབས་ལྟར་གཟེངས་བསྟོད་དང་བྱ་དགའ་གནང་དགོས།
ལེའུ་གཉིས་པ། རྩྭ་ཐང་གི་མེ་སྐྱོན་སྔོན་འགོག་སྐོར།
    དོན་ཚན་བཅུ་གཅིག་པ། རྒྱལ་སྲིད་སྤྱི་ཁྱབ་ཁང་གི་རྩྭ་ཐང་སྲིད་འཛིན་གཙོ་གཉེར་སྡེ་ཁག་གིས་རྩྭ་ཐང་ལ་མེ་སྐྱོན་འབྱུང་བའི་ཉེན་ཚད་དང་གནོད་ཚད་སོགས་ལ་གཞིགས་ནས། རྒྱལ་ཡོངས་ཀྱི་རྩྭ་ཐང་དེ་ཆེས་མཐོ་བ་དང་མཐོ་བ། འབྲིང་བ་དང་དམའ་བ་བཅས་རིམ་པ་བཞི་ཅན་གྱི་རྩྭ་ཐང་གི་མེ་སྐྱོན་ཉེན་ཁ་ཆེ་བའི་ཁུལ་དུ་དབྱེ་དགོས།