སི་རི་ཡའི་གཞུང་ཕྱོགས་ཀྱི་སཱ་ནཱ་གསར་འགྱུར་ཁང་གིས་བསྒྲགས་པ་ལྟར་ན། ཚེས་ཉེར་བདུན་ཉིན་སི་རི་ཡའི་སྲིད་གཞུང་དམག་དང་ངོ་རྒོལ་ཕྱོགས་ཁག་གི་དྲག་ཆས་པས་སྔར་བཞིན་ཨ་ལིག་ཕོ་དང་རྒྱལ་ས་ཏ་མ་སི་ཁི་སོགས་ས་ཁུལ་དུ་དམག་འཐབ་རྒྱག་བཞིན་ཡོད་ཟེར།

ཚེས་ཉེར་བདུན་ཉིན་སི་རི་ཡའི་སྲིད་གཞུང་དམག་གིས་ཨ་ལིག་ཕོ་གྲོང་ཁྱེར་ཉེ་འཁོར་དུ་ངོ་རྒོལ་ཕྱོགས་ཁག་གི་དྲག་ཆས་པར་འཇབ་རྒོལ་བྱས་པ་དང་། མཚོན་ཆ་ཆེ་རིགས་དང་འབར་གཏོར་སྒྲིག་ཆས་སྦྱར་བའི་རླངས་འཁོར་མང་པོ་རྩ་གཏོར་དུ་བཏང་བ་མ་ཟད། ངོ་རྒོལ་ཕྱོགས་ཁག་གི་དྲག་ཆས་མི་སྣ་མང་པོ་བསད། རྒྱུས་ལོན་བྱུང་བ་ལྟར་ན། སི་རི་ཡའི་སྲིད་གཞུང་དམག་གིས་ད་དུང་ཨ་ལིག་ཕོ་གྲོང་ཁྱེར་ཕྱི་རོལ་དུ་དམག་དཔུང་མང་པོ་རུབ་འཛོམས་བྱས་ཏེ། གྲོང་ཁྱེར་ནང་ཁུལ་གྱི་ངོ་རྒོལ་ཕྱོགས་ཁག་གི་དྲག་ཆས་པའི་མཐའ་ནས་བསྐོར་རྒྱུར་གྲ་སྒྲིག་བྱས་ཡོད་ཟེར།

ཨ་ལིག་ཕོ་ནི་རྒྱལ་ས་ཏ་མ་སི་ཁོའི་རྗེས་ཀྱི་སི་རི་ཡའི་གྲོང་ཁྱེར་ཨང་གཉིས་པར་གཏོགས་ལ། སི་རི་ཡའི་ཚོང་ལས་དང་བཟོ་ལས་ཀྱི་གྲོང་ཁྱེར་གཙོ་བོ་ཡིན་ཞིང་། ཕལ་ཆེར་མི་གྲངས་ས་ཡ་བཞི་ལ་ཉེ་བ་ཙམ་ཞིག་ཡོད།

དེ་ལས་གཞན། སྨྱན་བྱད་ཀྱིས་མཉམ་འབྲེལ་དྲ་རྒྱ་ལས་བླངས་པའི་བརྙན་རིས་ལྟར་ན། ཚེས་ཉེར་བདུན་ཉིན་སི་རི་ཡའི་སྲིད་གཞུང་དམག་དང་ངོ་རྒོལ་ཕྱོགས་ཁག་གི་དྲག་ཆས་པས་ད་དུང་ཏ་མ་སི་ཁོའི་ལྷོ་ཁུལ་གྱི་ཉེ་འགྲམ་ས་ཁུལ་དུ་དམག་འཐབ་རྒྱག་བཞིན་ཡོད་པ་དང་། ངོ་རྒོལ་ཕྱོགས་ཁག་གི་དྲག་ཆས་པས་ད་དུང་སྲིད་གཞུང་གི་གྱེན་འཕུར་གནམ་གྲུ་ཞིག་ཐང་ལ་འཕངས། ཡིན་ན་ཡང་སྨྱན་བྱད་ཀྱིས་བརྙན་རིས་ཀྱི་དོན་དངོས་རང་བཞིན་ལ་ད་དུང་ཁག་ཐེག་བྱེད་ཐུབ་མེད་ཟེར།

སི་རི་ཡའི་གསར་འགྱུར་ཁང་གིས་ཚེས་ཉེར་བདུན་ཉིན་སི་རི་ཡའི་སྲིད་གཞུང་དམག་གི་དཔོན་པོ་ཞིག་གི་སྐད་ཆ་དྲངས་ནས་བཤད་རྒྱུར། ཧའོ་མུའུ་སི་གྲོང་ཁྱེར་དུའང་ཉིན་དེའི་དགོང་མོར་འགས་གཏོར་དོན་རྐྱེན་བྱུང་། འགས་གཏོར་དོན་རྐྱེན་དེ་འབྱུང་སྐབས་དྲག་ཆས་པ་སྐོར་ཞིག་གིས་འགད་རྫས་འཇོག་བཞིན་ཡོད་པས། དྲག་ཆས་པ་མང་པོ་འགས་གཏོར་དོན་རྐྱེན་ཁྲོད་རྐྱེན་ལམ་དུ་ཤོར་ཟེར།