ཨ་མེ་རི་ཁའི་ཅཱ་ལེ་ཧྥུའུ་ནེ་ཡཱ་ཀྲིག་ལྷོ་ཕྱོགས་ཀྱི་གྲོང་ཁྱེར་ཨ་ནཱ་ཧེ་མུའུ་ནས་བསྟུད་མར་ཉིན་བཞིའི་རིང་ཁྲོམ་སྐོར་བྱེད་པའི་མང་ཚོགས་དང་ཉེན་རྟོག་པའི་བར་འཁྲུག་རྩོད་བྱུང་། ཚེས་ཉེར་བཞི་ཉིན་ནས་ཚེས་ཉེར་ལྔའི་ཉིན་གྱི་ཞོགས་པའི་བར་བྱུང་བའི་འཁྲུག་རྩོད་ཁྲོད། ཉུང་མཐར་ཡང་མི་དྲུག་ལ་རྨས་ཕོག་པ་དང་། རྔམ་སྟོན་ཁྲོམ་སྐོར་མཁན་ཉེར་བཞི་འཛིན་བཟུང་བྱས།

ཚེས་ཉེར་བཞི་ཉིན་གྱི་ཕྱི་དྲོར། མི་དྲུག་བརྒྱ་ལྷག་གིས་ཨ་ནཱ་ཧེ་མུའུ་གྲོང་སྲིད་ཐིན་གྱི་སྒོ་ཁ་ནས་རྔམ་སྟོན་ཁྲོམ་སྐོར་བྱས་ཏེ། ཉེན་རྟོག་ཕྱོགས་ཀྱིས་གང་འདོད་དུ་མེ་མདའ་བཀོལ་ནས་མི་ལ་ཤི་རྨས་བཟོས་པར་ངོ་རྒོལ་བྱས། རྔམ་སྟོན་ཁྲོམ་སྐོར་བྱེད་སྐབས་ཨ་ནཱ་ཧེ་མུའུ་གྲོང་ཁྱེར་གྲོས་ཁང་གིས་འདེམ་ཤོག་འཕང་སྟེ་རྒྱལ་ཕྲན་མཉམ་འབྲེལ་དབང་འཛིན་ལས་ཁུངས་གདན་དྲངས་ནས་གྲོང་ཁྱེར་དེའི་མེ་མདས་བརྒྱབ་པའི་དོན་རྐྱེན་ལ་འབྲེལ་བའི་ཉེན་རྟོག་པར་རྟོག་ཞིབ་བྱེད་མིན་ལ་བརྡས་ཐག་གཅོད་བཞིན་ཡོད། རྔམ་སྟོན་ཁྲོམ་སྐོར་མཁན་གྱིས་གྲོང་སྲིད་ཐིན་གྱི་སྒོ་ཁ་ནས་ཉེན་རྟོག་པར་རྡོ་དང་ཤེལ་དམ་སོགས་དངོས་པོས་བརྒྱབ་པ་དང་། མི་ལ་ལས་སྲང་ལམ་དུ་དངོས་རྫས་མེར་བསྲེག་པར་མ་ཟད་ཚོང་ཁང་རེ་འགའི་སྒོ་དང་དྲ་མ་བཅགས་པས་གནས་བབ་རྙོག་འཛིང་དུ་གྱུར། རྔམ་སྟོན་ཁྲོམ་སྐོར་མཁན་གྱིས་ད་རུང་སྲང་ལམ་དུ་ཁྲོམ་སྐོར་བྱས་ཏེ་འགྲིམ་འགྲུལ་ལ་བཀག་རྒྱ་བཟོས།

ཉེན་རྟོག་ཕྱོགས་ཀྱིས་ཐེངས་འདིའི་རྔམ་སྟོན་ཁྲོམ་སྐོར་ནི་ཁྲིམས་འགལ་གྱི་འདུ་ཚོགས་ཤིག་ཡིན་པར་བཤད་པ་དང་། མང་ཚོགས་ཀྱིས་ཚེས་ཉེར་བཞི་ཉིན་གྱི་དགོང་མོའི་དུས་ཚོད་དགུའི་སྔོན་ལ་ངོ་རྒོལ་བྱ་འགུལ་མཇུག་སྒྲིལ་དགོས་བའི་རེ་བ་བཏོན་པ་དང་དེ་ལྟ་མིན་ཚེ་འཛིན་བཟུང་བྱེད་རྒྱུའི་བསམ་ཚུལ་བསྟན། ཉེན་རྟོག་ཕྱོགས་ཀྱིས་ཚེས་ཉེར་བཞི་ཉིན་གྱི་དགོང་མོའི་དུས་ཚོད་དགུའི་རྗེས་ནས་བཟུང་མི་ཚོགས་གཏོར་བ་དང་། ཚེས་ཉེར་ལྔ་ཉིན་གྱི་ཞོགས་པའི་དུས་ཚོད་གཉིས་ཡས་མས་སུ། ས་དེའི་གནས་བབ་ཧ་ལམ་ཞི་འཇགས་སུ་སོང་ཡོད།