རྒྱལ་ཁབ་ཀྱི་ཀྲུའུ་ཞི་ཧུའུ་ཅིན་ཐའོ་ཡིས་ཚེས18ཉིན་མི་དམངས་ཚོགས་ཁང་ཆེན་མོའི་ནང་ཅི་པུའུ་ཐིས་རྒྱལ་ཁབ་ཀྱི་ཙུང་ཐུང་ཀེད་ལེ་ལ་གྲོས་མོལ་མཛད།

 ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཀྱི་ཀྲུའུ་ཞི་ཧུའུ་ཅིན་ཐའོ་ཡིས་ཚེས18ཉིན་མི་དམངས་ཚོགས་ཁང་ཆེན་མོའི་ནང་ཅི་པུའུ་ཐིས་རྒྱལ་ཁབ་ཀྱི་ཙུང་ཐུང་ཀེད་ལེ་ལ་གྲོས་མོལ་མཛད། ཧུའུ་ཅིན་ཐའོ་ཡིས་ཀྲུང་གོ་དང་ཅི་པུའུ་ཐིས་རྒྱལ་ཁབ་གཉིས་བར་དུ་ས་ཐག་རིང་བ་དང་རྒྱལ་ཁབ་གཉིས་ཀྱི་གནས་ཚུལ་མི་གཅིག་ནའང་རྒྱལ་ཁབ་གཉིས་དང་རྒྱལ་ཁབ་གཉིས་ཀྱི་མི་དམངས་བར་དུ་མཛའ་བརྩེ་ཟབ་མོ་ཆགས་ཡོད། ཀྲུང་གོ་ཕྱོགས་ཀྱིས་ཅི་པུའུ་ཐིས་རྒྱལ་ཁབ་ཀྱིས་ཡ་ཏེན་མཚོ་འགག་དང་སོ་མ་ལེ་མཚོ་ཁོངས་སུ་གྲུ་གཟིངས་བསྐྱོད་པར་སྲུང་སྐྱོབ་བྱེད་པའི་ཀྲུང་གོའི་མཚོ་དམག་གི་དམག་གྲུ་ལ་རོགས་སྐྱོར་བྱས་པར་བཀའ་དྲིན་ཞུས་པ་ཡིན་ཟེར།

ཧུའུ་ཅིན་ཐའོ་ཡིས་ཀྲུང་གོ་དང་ཅི་པུའུ་ཐིས་བར་གྱི་འབྲེལ་བ་དེ་མུ་མཐུད་དུ་འཕེལ་རྒྱས་སུ་སོང་བ་དང་བསྟུན་ནས་རྒྱལ་ཁབ་གཉིས་ཀྱི་མཉམ་ལས་ནང་དོན་ཡང་སྔར་ལས་ཕུན་སུམ་ཚོགས་པོར་འགྲོ་བཞིན་ཡོད་ལ། ཀྲུང་གོས་ཅི་པུའུ་ཐིས་རྒྱལ་ཁབ་ནི་ཀྲུང་གོའི་མཉམ་ལས་གྲོགས་པོ་གལ་ཆེན་དུ་བརྩིས་ཡོད་པ་དང་། ཅི་པུའུ་ཐིས་རྒྱལ་ཁབ་དང་མཉམ་དུ་གཤམ་གསལ་གྱི་ཕྱོགས་འགའ་ནས་ཧུར་བརྩོན་བྱས་ཏེ། ཀྲུང་གོ་དང་ཅི་པུའུ་ཐིས་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་སུ་གཏོང་འདོད་་ཡོད་ཟེར། གཅིག ཆབ་སྲིད་ཡིད་ཆེས་ཇེ་ཆེར་གཏོང་བ་དང་ཕྱོགས་གཉིས་དང་ཕྱོགས་མང་གྲོས་མོལ་བྱེད་པར་ཤུགས་བསྣན་ནས་མུ་མཐུད་དུ་རྒྱལ་ཁབ་སོ་སོའི་སེམས་ཁུར་བྱེད་བཞིན་པའི་གནད་དོན་གལ་ཆེན་ཐད་ནས་ཕན་ཚུན་ལ་རྒྱབ་སྐྱོར་བྱེད་པ་དང་། ཀྲུང་གོ་ཕྱོགས་ཀྱིས་ཅི་པུའུ་ཐིས་རྒྱལ་ཁབ་ཀྱིས་སོ་མ་ལེ་སོགས་ས་ཁུལ་གྱི་གནད་དོན་ཐད་ལ་ནུས་པ་འདོན་པར་མཐོང་ཆེན་བྱེད་བཞིན་ཡོད་ལ། ཅི་པུའུ་ཐིས་རྒྱལ་ཁབ་དང་མཉམ་དུ་རྒྱལ་སྤྱི་དང་ས་ཁུལ་གྱི་གནད་དོན་གལ་ཆེན་ཐད་ནས་གྲོས་མོལ་བྱེད་པ་དང་། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་ཁེ་ཕན་དང་། ས་ཁུལ་ཞི་བདེའི་ངང་འཕེལ་རྒྱས་སུ་གཏོང་བར་ཤུགས་སྣོན་འདོད་ཟེར། གཉིས། འབྱོར་ཚོང་མཉམ་ལས་རྒྱ་བསྐྱེད་དེ་རྒྱལ་ཁབ་གཉིས་ཀྱི་འབྱོར་ཚོང་མཉམ་ལས་ཨུ་ཡོན་ལྷན་ཁང་བཙུགས་ནས་མཉམ་ལས་འཆར་འགོད་ལ་ཤུགས་སྣོན་རྒྱུ། ཀྲུང་གོ་ཕྱོགས་ཀྱིས་ཀྲུང་གོའི་ཁེ་ལས་ཅི་པུའུ་ཐིས་རྒྱལ་ཁབ་ཏུ་སོང་ནས་མ་དངུལ་བཏང་སྟེ་མ་དངུལ་གཏོང་བ་དང་ཅི་པུའུ་ཐིས་རྒྱལ་ཁབ་ཀྱི་རྨང་གཞིའི་སྒྲིག་ཆས་འཛུགས་སྐྲུན་ལས་གཞི་ལ་ཞུགས་པ་དང་། ཅི་པུའུ་ཐིས་རྒྱལ་ཁབ་ཀྱི་དཔལ་འབྱོར་སྤྱི་ཚོགས་འཕེལ་རྒྱས་དང་དམངས་འཚོ་ལེགས་བཅོས་བྱེད་པར་རྒྱབ་སྐྱོར་བྱ་རྒྱུ། གསུམ། མི་ཚུལ་བརྗེ་རེས་ལ་སྐུལ་འདེད་བཏང་སྟེ་ཡང་དག་པའི་སྒོ་ནས་ཀྲུང་གོ་དང་ཨ་ཧྥེ་རི་ཁ། ཀྲུང་གོ་དང་ཨ་རབ་མཉམ་ལས་གླེང་སྟེགས་སོགས་ཀྱི་སྒྲིག་གཞི་བཙུགས་ནས་རིག་གནས་དང་སློབ་གསོ། འཕྲོད་བསྟེན། མི་ཤུགས་ཐོན་ཁུངས་གསོ་སྦྱོང་སོགས་ཀྱི་ཁྱབ་ཁོངས་སུ་བརྗེ་རེས་མཉམ་ལས་བྱས་ཏེ། རྒྱལ་ཁབ་གཉིས་ཀྱི་མཛའ་མཐུན་དམངས་ཁྲོད་རྨང་གཞི་སྲ་བརྟན་དུ་གཏོང་དགོས་ཟེར།

ཀེད་ལེ་ཡིས་ཅི་པུའུ་ཐིས་རྒྱལ་ཁབ་མི་དམངས་ཀྱི་ཀྲུང་གོར་ལྷག་བསམ་ཟོལ་མེད་ཀྱིས་མཛའ་བརྩེ་བཟུང་ཡོད་པ་དང་། ཀྲུང་གོའི་འཕེལ་རྒྱས་ཀྱི་ཉམས་མྱོང་ལག་ལེན་བྱས་ཏེ། ཀྲུང་གོའི་ཁེ་ལས་ཅི་པུའུ་ཐིས་རྒྱལ་ཁབ་ཏུ་ཡོང་ནས་མ་དངུལ་བཏང་སྟེ་ཁྱབ་ཁོངས་མང་པོ་ནས་མཉམ་ལས་བྱེད་པ་མ་ཟད། ཅི་པུའུ་ཐིས་རྒྱལ་ཁབ་ཀྱི་གནས་བབ་ལེགས་པོ་བེད་སྤྱད་དེ་ཨ་ཧྥེ་རི་ཁ་ཤར་རྒྱུད་ས་ཁུལ་དང་ཚོང་ཟོག་བརྗེ་རེས་བྱས་ཏེ། རང་ས་ཁུལ་ཕུང་བོ་གཅིག་ཏུ་འགྱུར་བར་སྐུལ་འདེད་གཏོང་དགོས་ཟེར།

ཀེད་ལེ་ཡིས་ཨ་ཧྥེ་རི་ཁ་ཤར་རྒྱུད་ས་ཁུལ་གྱི་གནས་བབ་དང་། ཅི་པུའུ་ཐིས་རྒྱལ་ཁབ་ཀྱིས་སོ་མ་ལེའི་ཞི་བདེའི་ཐད་ལ་འབད་བརྩོན་བྱས་པ་མཚམས་སྦྱོར་བྱས་ཤིང་། ཀྲུང་གོ་ཕྱོགས་ཀྱིས་དེ་ལ་རྒྱབ་སྐྱོར་བྱེད་རྒྱུའི་རེ་བ་བཅངས་ཡོད་ཟེར།   །