ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྤྱིའི་རོགས་སྐྱོབ་རྩ་འཛུགས་ཀྱི་བྱ་བ་སྒྲུབ་མཁན་གཉིས་ཚེས11ཉིན་སོ་མ་ལེའི་དབུས་ཕྱོགས་ནས་སུ་ཡིན་མི་ཤེས་པའི་དྲག་ཆས་མི་སྣས་བཙན་ཁྲིད་བྱས།

ས་དེའི་ཚོ་དཔོན་ཅ་མ་ཡིས་ཉིན་དེའི་དགོང་མོར་ཞིན་ཧྭ་གསར་འགྱུར་ཁང་གི་འཕྲིན་གཏོང་མཁན་ལ་གནས་ཚུལ་དེ་བདེན་དཔང་བྱས། ཁོས་བཤད་རྒྱུར། བཙན་ཁྲིད་བྱས་པའི་མི་གཏའ་གཉིས་ཀྱི་ཁ་ལོ་བ་དང་སྲུང་དམག་གིས་དྲག་ཆས་མི་སྣར་ངོ་རྒོལ་བྱས་ཏེ་རྨས་ཕོག་ཟེར།

ས་དེའི་གསར་འགྱུར་ལས་ཁུངས་ཀྱིས་བསྒྲགས་པ་ལྟར་ན། རྒྱལ་སྤྱིའི་རོགས་སྐྱོབ་མི་སྣ་གཉིས་ཀ་ནི་ཁེན་ཉི་ཡ་རྒྱལ་ཁབ་ཀྱི་ཡིན་པ་དང་། སོ་མ་ལེ་རུ་མི་ཆོས་རོགས་སྐྱོབ་ལས་འགན་ལག་བསྟར་བྱེད་པའི་སྲིད་གཞུང་མིན་པའི་རྩ་འཛུགས་ཤིག་ཏུ་བྱ་བ་སྒྲུབ་བཞིན་ཡོད་ལ། ལས་ཁུངས་གང་ཞིག་གི་ཡིན་པ་གསལ་བོར་མི་ཤེས་ཟེར།

སོ་མ་ལེ་ལ1991ལོ་ནས་བཟུང་ཡུན་རིང་བོར་སྲིད་གཞུང་མེད་པ་དང་། ཉིས་སྟོང་བཞི་ལོར་བཙུགས་པའི་བར་བརྒལ་སྲིད་གཞུང་ལ་རྒྱལ་ཡོངས་སུ་ཚོད་འཛིན་བྱེད་པའི་སྟོབས་ཤུགས་མེད་པས། ལྷོ་ཕྱོགས་ས་ཁུལ་ཡུན་རིང་བོར་སྲིད་གཞུང་ལ་ངོ་རྒོལ་བྱེད་པའི་དྲག་ཆས་རྩ་འཛུགས་དབྱི་སི་ལན་ན་གཞོན་ལས་འགུལ་གྱིས་བཟུང་ཡོད་པས། མངའ་ཁོངས་ཀྱི་བདེ་འཇགས་གནས་བབ་ཟང་ཟིང་དུ་གྱུར་ཞིང་། བཙན་ཁྲིད་དང་འགས་གཏོར་སོགས་འཇིགས་སྐུལ་དོན་རྐྱེན་མཚམས་མ་ཆད་པར་འབྱུང་བཞིན་ཡོད། ཟླ་བདུན་པའི་ཚེས་གཉིས་ཉིན། བཙན་ཁྲིད་བྱས་པའི་ནོར་ཝེའི་ཡུལ་གྱར་ལས་དོན་ཨུ་ཡོན་ལྷན་ཁང་གི་བྱ་བ་སྒྲུབ་མཁན་བཞི་སོ་མ་ལེ་ནས་ཕྱིར་བཏང་། ཁོ་ཚོས་ཁེན་ཉི་ཡ་དང་སོ་མ་ལེའི་མཐའ་མཚམས་ཀྱི་ཡུལ་གྱར་བའི་སྒར་ས་ཏ་ཏ་པུའུ་ནས་བྱ་བ་སྒྲུབ་སྐབས་དྲག་ཆས་མི་སྣས་བཙན་ཁྲིད་བྱས་པ་དང་། དེའི་རྗེས་སུ་སོ་མ་ལེ་རུ་ཁྲིད། ན་ནིང་གི་ཟླ་བཅུ་བར་རྒྱལ་སྤྱིའི་རོགས་སྐྱོབ་རྩ་འཛུགས་ཤིག་གི་སི་ཕེན་པ་གཉིས་ཀྱང་ཏ་ཏ་པུའུ་ནས་བཙན་ཁྲིད་བྱས་པ་དང་། ད་ལྟ་ད་རུང་སོ་མ་ལེ་རུ་བཀག་ཡོད།  །