ཧཱ་སག་སི་ཐན་གྱི་ཙུང་ཐུང་གསར་འགྱུར་ཅུའུ་ཡིས་ཚེས་ཉེར་དགུ་ཉིན་བཤད་རྒྱུར། ཧཱ་སག་སི་ཐན་གྱི་ཙུང་ཐུང་ནཱ་ཀྲ་ཨར་པཱ་ཡེ་ཧྥུའུ་ཡིས་ཉིན་དེར་འཚམས་འདྲིར་ཡོང་བའི་ཨུ་རུ་སིའི་ཙུང་ལི་མེ་ཏི་བེ་ཅེ་ཧྥུའུ་ལ་ལ་ཐུག་འཕྲད་བྱས་པ་དང་། ཕྱོགས་གཉིས་ཀྱིས་མུ་མཐུད་དུ་ཕྱོགས་མང་བོའི་མཉམ་ལས་ལ་ཤུགས་སྣོན་བྱེད་རྒྱུ་ནན་བཤད་བྱས།

ནཱ་ཀྲ་ཨར་པཱ་ཡེ་ཧྥུའུ་ཡིས་ཐུག་འཕྲད་བྱེད་སྐབས་བཤད་རྒྱུར། ཧཱ་སག་སི་ཐན་དང་ཨུ་རུ་སི་རྒྱལ་ཁབ་གཉིས་ཀྱིས་ལོ་ངོ་ཉི་ཤུའི་དུས་ཚོད་ནང་འདྲ་མཉམ་གྱི་ཁྱིམ་མཚེས་མཛའ་མཐུན་དང་འཐབ་ཇུས་གྲོགས་པོའི་འབྲེལ་བ་བཙུགས་པ་དང་། མེ་ཏི་བེ་ཅེ་ཧྥུའུ་ཡིས་ཙུང་ལིའི་འགན་ཁུར་བའི་རྗེས་སུ། རྒྱལ་ཁབ་གཉིས་ཀྱིས་མུ་མཐུད་དུ་སྲོལ་རྒྱུན་གྱི་མཛའ་བརྩེ་ཇེ་ཟབ་ཏུ་གཏོང་ཐུབ་པར་ཡིད་ཆེས་ཡོད་ཟེར།

མེ་ཏི་བེ་ཅེ་ཧྥུའུ་ཡིས་བཤད་རྒྱུར། ཧཱ་སག་སི་ཐན་ནི་ཁོའི་ཙུང་ལིའི་འགན་ཁུར་རྗེས་འཚམས་འདྲི་བྱས་པའི་རྒྱལ་ཁབ་དང་པོ་ཡིན་པ་དང་། ཨུ་རུ་སི་དང་ཧཱ་སག་སི་ཐན་རྒྱལ་ཁབ་གཉིས་ཀྱི་སྲོལ་རྒྱུན་མཛའ་མཐུན་མཉམ་ལས་ལ་མུ་མཐུད་དུ་ཤུགས་སྣོན་བྱེད་དགོས། ངས་གང་ནུས་ཀྱིས་རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་ཡར་སྐུལ་བྱས་ཏེ། ཨེ་ཤ་ཡཱ་དབུས་མ་ས་ཁུལ་གྱི་འཆམ་མཐུན་བརྟན་འཇགས་ལ་ཡར་སྐུལ་བྱེད་རྒྱུ་ཡིན་ཟེར།

རྒྱུས་ལོན་བྱུང་བའི་གནས་ཚུལ་ལྟར་ན། རྒྱལ་ཁབ་གཉིས་ཀྱི་མགོ་ཁྲིད་པས་ད་རུང་ནུས་ཁུངས་དང་། མཁའ་སྐྱོད་སོགས་ཁྱབ་ཁོངས་ཀྱི་མཉམ་ལས་དང་། ཐུན་མོང་གིས་སེམས་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་གལ་ཆེན་ཐད་ནས་བསམ་འཆར་བརྗེ་རེས་བྱས།